MENGKANG BEJAGA!

Perang ba Ukraine Ngasuh Penanggul Lapar Pungkang Majak Balat Nyadi

TEBAH

Kena 19 Mei 2022, Kunsil Sekuriti Pertubuhan Bangsa-Bangsa Bersatu ninga lebih ari 75 iku pegawai ke madah “penanggul lapar pungkang nyadi ketegal pandemik COVID-19 sereta cuaca ba serata dunya berubah. Tang, pengudah perang ba Ukraine, penanggul tu majak balat nyadi.” Enda lama pengudah nya, Economist madah “perang tu ngasuh mayuh orang ba serata dunya suntuk pemakai.” Bup Kudus udah madahka penanggul tu deka nyadi ba jeman kitai, tang iya mega nulung kitai mutarka penanggul nya.

Bup Kudus udah madah pasal penanggul lapar pungkang

Jesus udah madah: “Bansa siti deka beperang ngelaban bansa siti, lalu menua siti deka beperang ngelaban menua siti, lalu lapar pungkang.”—Matthew 24:7.
Bup Pemandang udah madah pasal empat iku orang ke nepan kuda. Siku ari orang ke nepan kuda nya ngambarka perang. Bisi siku agi ke nitihka iya. Tu ngambarka lapar pungkang alai maya nya tusah ngiga pemakai lalu rega pemakai kelalu mar. “Aku lalu tepedaka siku kuda ti chelum. Orang ke nepan kuda nya megai siti dachin. Aku lalu ninga utai ti munyi nyawa mensia ba tengah-tengah empat iku utai ti idup nya bejaku, ‘Satu kilogram gandum ke gaji sehari, enggau 3 kilogram barli ke gaji sehari.’”—Pemandang 6:5, 6

Jaku benabi Bup Kudus pasal lapar pungkang benung dikeamatka kemayaharitu, lalu Bup Kudus ngumbai tu “hari ti penudi.” (2 Timoti 3:1) Kena nemu mayuh agi pasal “hari ti penudi” enggau empat iku orang ke nepan kuda ke dipadah ba bup Pemandang, peda meh video Dunya Udah Berubah Kenyau ari 1914 lalu bacha artikel “Empat Penunggang Kuda—Siapakah Mereka?” dalam jaku Melayu.

Baka ni Bup Kudus ulih nulung?

Bup Kudus ngundan jaku lalau ke ulih nulung kitai mutarka situasi ti tusah tu, nyengkaum rega pemakai ke majak niki enggau suntuk pemakai. Peda sekeda chunto ba artikel “Chara Bejimat Lebuh Kurang Belanja.”
Bup Kudus mega meri kitai harapan pasal semua utai deka nyadi manah. Bup Kudus besemaya “awakka gandum seruran mayuh di menua” lalu semua orang bisi chukup pemakai. (Masmur 72:16) Kena nemu mayuh agi pasal harapan ke jemah ila sereta kebuah nuan ulih pechayaka nya, bacha meh artikel “Pengadang ti Bendar Pasal Jemah Ila.”