Perang ba Ukraine sereta kesan ketegal suhu bumi berubah ngujungka orang tusah bulih pemakai ba mayuh menua di serata dunya, kelebih agi sida ke diau ba menua ti seranta.

•   “Ketegal perang, suhu bumi berubah, ungkus tenaga ke dikena majak niki sereta kebuah ke bukai, kitai tusah ngasilka sereta beranjungka pemakai di serata dunya.”—António Guterres, sekretari Pertubuhan Bangsa-Bangsa Bersatu, 17 Julai 2023.

•   “Perintah Rusia enggai bekerejasama nentuka bijirin ke dieksport ari Ukraine selamat dianjung ngagai menua bukai. Ketegal tu, penanggul suntuk pemakai majak nyadi ba serata dunya lalu rega pemakai majak mar ba menua ti seranta, kelebih agi ba Afrika Utara sereta Timur Tengah.”—Atalayar.com, 23 Julai 2023.

 Peratika utai ke dipadah Bup Kudus pasal penyuntuk ba pemakai sereta utai ke deka nyadi jemah ila.

•   Jesus madah: “Bansa siti deka beperang ngelaban bansa siti, lalu perintah siti deka beperang ngelaban perintah siti. Pia mega, lapar pungkang . . . deka nyadi ba mayuh bengkah endur.”—Matthew 24:7.

•   Dalam Bup Kudus, bup Pemandang bisi nyebut sempama pasal empat iku orang ke nepan kuda. Siku ari sida ngambarka perang. Siku agi nangkanka iya lalu iya ngambarka lapar pungkang, iya nya ba maya pemakai sigi kurang lalu rega barang niki. “Aku lalu tepedaka siku kuda ti chelum. Orang ke nepan kuda nya megai siti dachin. Aku lalu ninga utai ti munyi nyawa mensia . . . bejaku, ‘Satu kilogram gandum ke gaji sehari, enggau 3 kilogram barli ke gaji sehari. Tang anang ngerusak minyak kana enggau wain!’”—Pemandang 6:5, 6, Bup Kudus Baru.

 Jaku benabi ba Bup Kudus pasal penyuntuk ba pemakai benung dikeamatka kemayaharitu, iya nya jeman ke dikumbai “hari ti penudi.” (2 Timoti 3:1) Kena nemu mayuh agi pasal “hari ti penudi” sereta empat iku orang ke nepan kuda ba bup Pemandang, peda meh video Dunya Udah Berubah Kenyau ari 1914 lalu bacha meh artikel “Empat Penunggang Kuda—Siapakah Mereka?” dalam jaku Melayu.

•   Bup Kudus ngembuan jaku lalau ke ulih nulung kitai napi penanggul baka rega barang majak niki tauka suntuk pemakai. Peda sekeda chunto ba artikel “Chara Bejimat Lebuh Kurang Belanja.”

•   Bup Kudus mega meri kitai harapan pasal semua utai deka nyadi manah agi. Iya besemaya, maya deka datai alai “gandum seruran mayuh di menua” lalu semua orang deka bisi mayuh pemakai. (Masmur 72:16) Kena nemu mayuh agi pasal harapan ke jemah ila sereta kebuah nuan ulih arapka nya, bacha meh artikel “Pengadang ti Bendar Pasal Jemah Ila.”