Nitihka Bup Kudus, Raja David ari menua Israel idup ba abad ke sebelas S.M. lalu peturun iya merintah pengelama beratus taun. Tang sekeda pakar madahka, cherita pasal David nya semina cherita ngapa tauka ensera ke digaga orang. Kati Raja David nya orang ke amat bisi?

 Ba taun 1993, Avraham Biran, seiku arkeologi, enggau seraban orang ke sama gawa enggau iya tetemuka sebagi ari siti batu ba menua Tel Dan, utara menua Israel. Kerimpak batu nya bisi ditulis rambai jaku ke nunjukka ngagai “Rumah David.” Rambai jaku ke ditulis ba batu nya ngena urup Semitic menya ari abad ke semilan S.M. Batu nya siti begian ari tugu ke didirika orang Aram ke temegah ati ketegal udah ngalahka orang Israel.

 Siti artikel ke bisi ba Bible History Daily madahka, sekeda orang enda pechaya rambai jaku ke ditulis nya ulih nyadi bukti ke nunjukka Raja David nya amat bisi. Taja pia, mayuh pakar Bup Kudus enggau sida ke gawa nyadi arkeologi besetuju, kerimpak batu ke ditemu ba menua Tel Dan nya nunjukka Raja David, ke bisi dipadah ba Bup Kudus, endang amat bisi. Lalu tu siti ari utai ti pemadu beguna ke kala ditemu lalu ditulis ba BAR [bup pasal sains Biblical Archaeology Review.]