Presiden World Bank Group madah dalam riput bulan Jun 2022: “Sistem ekonomi ba serata dunya dalam bahaya. Rega barang majak niki lalu ba maya ti sama mayuh orang enda chukup duit kena bebelanja.”

 Seraban orang ari International Monetary Fund madah: “Rega minyak enggau pemakai jampat niki lalu tu ngasuh orang ba menua ti seranta balat merinsa.”

 Bup Kudus nulung kitai faham kebuah kitai napi penanggul ba ekonomi, chara kitai ulih napi penanggul tu, sereta madahka chara penanggul tu deka diputarka belama iya.

•   Bup Kudus madah kitai diau ba “hari ti penudi.”—2 Timoti 3:1.

•   Jesus madah, “utai ti ngenakutka” deka nyadi ba maya tu. (Luke 21:11) Mayuh orang berasai takut lebuh rega barang majak niki. Sida irau pasal jemah ila sereta sekalika sida ulih nyediaka utai ke diguna diri sebilik.

•   Bup Pemandang udah madah pasal rega barang deka niki maya hari ti penudi tu. “Aku ninga nyawa bejaku. . . .‘Sekilogram gandum, rega iya satu denari [gaji sehari,] lalu tiga kilogram barli, rega iya satu denari [gaji sehari.]’”—Pemandang 6:6.

 Kena nemu mayuh agi pasal “hari ti penudi” sereta jaku benabi ba bup Pemandang, peda meh video Dunya Udah Berubah Kenyau ari 1914 lalu bacha artikel “Empat Penunggang Kuda—Siapakah Mereka?” dalam jaku Melayu.

•   “Orang deka ngaga rumah lalu diau dia. Rumah nya enda diuan orang bukai. Sida deka bekebun anggur lalu ngelantangka diri ngirup wain. Wain nya enda diirup orang bukai.”—Isaiah 65:21, 22.

•   “Awakka gandum seruran mayuh di menua. Awakka bukit penuh laban utai ti ditanam.”—Masmur 72:16.

•   ‘‘Tang diatu Aku deka datai,’ ku Jehovah bejaku, ‘laban orang ke suntuk ditekanka orang lalu orang ke kena perinsa, bedemuh natka diri pedis.’’—Masmur 12:5. a

 Enda lama da agi, Petara deka mutarka penanggul ekonomi ba serata dunya, ukai semina ba siti menua aja. Kena nemu chara nya, bacha meh artikel “Dapatkah Sistem Ekonomi yang Adil Wujud?” dalam jaku Melayu.

 Indah kemayaharitu, Bup Kudus ulih nulung kitai napi penanggul ketegal rega barang majak niki. Baka ni? Bup Kudus meri kitai jaku lalau pasal chara kitai ngena duit enggau bejimat. (Jaku Dalam 23:4, 5; Pengajar 7:12) Kena nemu mayuh agi, bacha meh artikel “Ngatur Belanja enggau Betul” sereta “Chara Bejimat Lebuh Kurang Belanja.”