Nitihka riput ari Pertubuhan Bangsa-Bangsa Bersatu:

•   Kenyau ari 7-23 Oktober 2023, perang Gaza-Israel ngujungka lebih ari 6,400 iku orang mati lalu 15,200 iku da agi bakal. Mayuh ari mansa tu semina rayat biasa aja. Kelimpah ari nya, beribu iku orang patut ninggalka rumah sida lalu ngerarika diri.

•   Nyentukka 24 September 2023, perang ba entara Rusia enggau Ukraine udah ngujungka 9,701 iku rayat biasa mati, lalu 17,748 iku da agi bakal ba Ukraine.

 Nama harapan ke udah disemayaka dalam Bup Kudus ngagai sida ke merinsa ketegal perang?

 Dalam Bup Kudus bisi madahka, Petara deka “ngasuh perang badu agi nyadi di serata dunya.” (Masmur 46:9) Nengah Perintah Petara iya nya siti perintah ba serega, Petara deka nganti semua perintah mensia. (Daniel 2:44) Perintah Petara deka mai pemaik sereta pengelantang ngagai semua orang.

 Jesus Kristus deka nyadi Raja ba Perintah Petara. Peratika nama utai ke deka digaga iya:

•   “Iya ngelepaska orang ke seranta, ke ngangauka iya, enggau sida ke suntuk sereta enda dikibuhka orang. Iya sinu ati ke orang ke lemi sereta seranta. Iya ngidupka nyawa sida ke suntuk. Iya ngelepaska sida ari orang ke nekanka pengidup sida, enggau ari orang ke mangah. Iya amat balat sayauka sida.”—Masmur 72:12-14.

 Nengah Perintah Iya, Petara deka ngetuka semua asil ti enda manah ketegal perang sereta penyai ke nyadi ba dunya.

•   “Iya deka ngendas semua ai mata ari mata sida, lalu pemati deka nadai agi. Nadai agi balat tusah ati, nadai agi nyabak, nadai agi pedis. Semua utai ti lama udah nadai agi.”—Pemandang 21:4.

 Enda lama da agi Perintah Petara deka mai ubah ti besai ba bumi. Dalam Bup Kudus bisi madahka, “perang, enggau berita pasal perang” deka nyadi lalu jaku benabi tu endang amat benung nyadi kemayaharitu. (Matthew 24:6) Tu nunjukka kitai benung idup “ba hari ti penudi” dalam perintah mensia.—2 Timoti 3:1.