Dalam bulan Julai 2022, kes timbak ti ngenakutka nyadi ba serata dunya:

•   “Kes bunuh [Shinzo Abe, Perdana Menteri sebedau tu,] orang politik ti pemadu tebilang ba Jepun, ngasuh orang ba Jepun balat tekenyit sereta irau. Lalu berita tu ngasuh orang ba serata dunya mega tekenyit, kelebih agi laban penganas baka tu jarang nyadi ba Jepun, lalu menua nya bisi undang-undang ti terit pasal senapang.”—10 Julai 2022, The Japan Times.

•   “Orang Denmark tekenyit laban siku lelaki ke bisi senapang munuh tiga iku orang ba shopping mall di Copenhagen.”—4 Julai 2022, Reuters.

•   “15 iku orang bebadi pengudah seraban orang nimbak ba pub ba Soweto, Afrika Selatan.”—10 Julai 2022, The Guardian.

•   “Lebih ari 220 iku orang ditimbak lalu bebadi ba Amerika Serikat maya hari besai kena 4 Julai.”—5 Julai 2022, CBS News.

 Kati kitai bisi kebuah andal penganas baka tu deka nadai agi? Nama ku Bup Kudus pasal utai tu?

 Bup Kudus madah kitai diau ba “hari ti penudi,” lalu orang deka nyadi mangah sereta balat jai. (2 Timoti 3:1, 3) Penganas baka tu ngasuh orang balat takut. (Luke 21:11) Tang, Bup Kudus besemaya penganas deka nadai agi, lalu orang deka “nadai agi pengirau, lalu rumah sida bisi pemaik enggau pengelikun.” (Isaiah 32:18) Baka ni utai tu deka nyadi?

 Petara deka ngemunaska orang jai sereta senyata sida.

•   ‘Petara deka muai orang ke jai ari menua tu, lalu nyabut orang ke bedosa ari menua tu baka ke nyabut rumput ari tanah.’—Jaku-Dalam 2:22.

•   “[Petara] ngasuh perang badu agi nyadi di serata dunya. Iya matahka panah, ngeredakka sangkuh, lalu nunu terabai.”—Masmur 46:9.

 Petara deka ngajar orang diau bebaik enggau pangan diri. Enggau chara tu, Petara deka muai semua penganas.

•   ‘Ba Sion, Bukit Petara ti kudus, nadai utai ti jai dia, lalu nadai utai ti tau ngasuh bebadi. Dunya deka penuh laban penemu Jehovah baka ai ti ngemenuhka tasik.’—Isaiah 11:9.

•   Indah diatu, Petara ngajar orang ba serata dunya nyeliahka diri ari penganas lalu badu agi ngena senyata. Sida diasuh “nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu.”—Mikah 4:3.

 Bup Kudus besemaya, jemah ila nadai agi jenayah sereta utai ti ngenakutka. Kena nemu mayuh agi, bacha meh artikel “Nyaga Diri ari Jenayah!”

 Kena nemu mayuh agi pasal chara penganas deka diputarka, bacha meh artikel “Damai di Bumi Akhirnya!” dalam jaku Indonesia.