Kemayaharitu, kitai bulih mayuh penerang ari ke suba, nyengkaum pasal pengelikun enggau pengerai. Taja pia, nuan patut bejimat enggau penerang ti bula, baka:

•   Berita ti charut

•   Berita ti pelesu

•    Teori ti pelesu

 Ngambika chunto, maya penyakit berampit COVID-19, sekretari Pertubuhan Bangsa-Bangsa Bersatu nangkan pasal berita ti bula bekaul enggau penyakit tu. Iya madah, “Bisi mayuh penerang tauka lalau pasal nyaga pengerai ti enda beguna sereta ulih ngemediska kitai. Mayuh berita ba TV enggau radio ngerembaika berita ti bula. Bisi mega orang nabur teori pelesu nengah Internet, ngujungka pemenchi enggau salah sangka pasal seraban orang.”

 Penerang ti bula ukai utai ti baru. Taja pia Bup Kudus madahka, ba jeman kitai, “orang ke jai, enggau orang ke pura-pura ngapa, deka majak jai se-jai, nipu orang, lalu sida empu deka kena tipu.” (2 Timoti 3:1, 13) Internet mega ngemendarka kitai nerima penerang ti pelesu enggau senang sereta jampat. Pengujung iya, email, media sosial enggau ruang berita ke diterima kitai penuh enggau penerang ti charut sereta setengah betul.

 Baka ni nuan ulih nyaga diri empu ari penerang ti bula sereta teori ti pelesu? Peratika sekeda prinsip Bup Kudus ke ulih nulung.

•   Anang arapka utai ti dipeda sereta didinga nuan

   Ajar Bup Kudus: “Orang ke beli deka arapka sebarang utai, tang orang ke pintar deka nyingkang enggau bejimat.”—Jaku Dalam 14:15.

   Kitai senang ditipu enti kitai enda bejimat. Ngambika chunto, mayuh gambar seretai enggau kapsyen tauka lansa video ke diayanka ba Internet, kelebih agi nengah media sosial. Gambar tauka video ke baka tu dikumbai meme, lalu tuju iya kena ngasuh orang ketawa. Pia mega, gambar enggau klip video nya senang diubah tauka rari ari jaku sereta cherita asal. Orang ulih ngaga sesiti video lalu ulih ngasuh seseiku orang baka ke benung ngereja sesiti utai tauka nyebut sesiti jaku, taja pan orang nya nadai kala ngereja utai ba video nya.

   “Mayuh gambar enggau video ke ditemu bala pemansik ba media sosial nya ngembuan penerang ti setengah betul aja, chunto iya baka meme.”—Axios Media.

   Tanya diri empu: ‘Kati utai nya betul tauka semina meme aja?’

•   Peresa ari ni penatai penerang nya enggau utai ke dipadah ba dia

   Ajar Bup Kudus: “Uji dulu semua utai.”—1 Tesalonika 5:21.

   Sebedau pechayaka tauka nganjung sesiti cherita, taja pan cherita nya viral tauka suah ditandu ba berita, tentuka cherita nya amat. Baka ni?

   Perundingka pengamat enggau penatai cherita nya. Bisi kompeni enggau sekeda gerempung engka madahka sesiti berita kena nyukung pengawa politik sida, tauka meri penguntung ngagai sida empu. Uji bandingka utai ke dipeda nuan ba rancangan berita enggau rancangan ke bukai. Kekadang, kaban engka enda sengaja nganjung penerang ti bula nengah email tauka media sosial. Nya kebuah, anang jampat pechayaka sesiti berita, enti nuan bedau meresa cherita asal iya.

   Tentuka penerang nya utai ti pemadu baru sereta betul. Peda haribulan, fakta ti ulih dikearapka, sereta bukti ke ulih nyukung utai ke disebut dia. Bejimat meh enggau penerang ke empai tentu betul tauka penerang ti ulih ngemansangka emosi ti salah.

   “Kemayaharitu, nentuka sesiti penerang nya betul utai ti amat beguna, baka kitai ke enda tau enda nuchi jari.”—Sridhar Dharmapuri, seiku Pegawai Kanan Pasal Pemanah Pemakai enggau Pengelikun ke PBB.

   Tanya diri empu: ‘Kati berita tu ngayanka runding diri empu, nyadika fakta tauka semina cherita aja?’

•   Tentuka nuan nemu pasal fakta, ukai semina utai ke dikerinduka nuan aja

   Ajar Bup Kudus: “Nuan beli enti nuan nitihka penemu diri.”—Jaku Dalam 28:26.

   Kitai senang pechayaka sesiti penerang ke dikerinduka kitai aja. Laman web seruran mantaika utai ke dikerindu nuan, tauka utai ke kala digiga nuan ba Internet sebedau tu. Taja pia, utai ke rindu didinga kitai, ukai utai ke patut didinga kitai.

   “Mensia bisi penau berunding enggau rasional. Taja pia, ketegal kitai bisi pengingin, ngarapka sesiti utai, sereta pengirau, lalu tu meh ke meransang nerima utai ti betul, kelebih agi enti nya nyukung utai ke dipechayaka kitai.”—Peter Ditto, pakar psikologi sosial.

   Tanya diri empu: ‘Kati aku patut pechayaka penerang tu ketegal aku arapka nya?’

•   Badu ngerembaika penerang ti bula

   Ajar Bup Kudus: “Anang nusui berita ti bula.”—Pemansut 23:1.

   Kingatka meh, penerang ke dianjung nuan ngagai orang bukai bisi kuasa ngachau runding enggau ulah sida. Taja pan nuan enda sengaja bekunsika penerang ti salah, asil iya tetap ulih ngemedis.

   “Utai ke pemadu beguna iya nya, anang beguai, ngetu enda lama lalu nanya diri empu, ‘Kati aku amat andal penerang tu amat betul, sebedau aku bekunsika nya?’ Enti semua orang ngereja nya, penerang ti salah ba Internet engka ulih kurang.”—Peter Adams, seiku naib presiden kanan News Literacy Project.

   Tanya diri empu: ‘Kati aku bekunsika penerang tu ketegal aku amat nemu nya betul?’