MENGKANG BEJAGA!
Ulah ti Ganas ketegal Politik—Nama Dipadah Bup Kudus?
Majak mayuh kes orang ngereja utai ti ganas laban deka ngubah politik. Nya ngasuh orang takut.
Ba Mexico, 39 iku chalun ahli politik pilihan raya 2023-2024 udah dibunuh, lalu tu rikut ti pemadu tinggi ba menua nya. Tu enggau ulah ti ganas ke bukai bekaul enggau politik ngenakutka orang lalu ngelimpangka sida ari pilihan raya nya.
Baru-baru tu ba Eropah, bisi mayuh ulah ti ganas politik udah nyadi. Indah bisi orang nguji deka munuh Perdana Menteri Slovakia kena 15 Mei 2024.
Rayat Amerika Serikat balat tekenyit ketegal siku orang nguji deka munuh Donald Trump, ke kala nyadi Presiden Amerika Serikat, kena 13 Julai 2024.
Nama kebuah ulah ti ganas ketegal politik mayuh nyadi? Kati tu nemu abis? Nama dipadah Bup Kudus?
Orang deka bepechah-belah ketegal politik
Bup Kudus madahka, ba jeman kitai ti dikumbai “hari ti penudi,” mayuh orang ngayanka sifat ti ngujungka pengawa ti ganas enggau enda sepenemu.
“Ba hari ti penudi, maya ti balat jai sereta balat tusah deka datai. Orang deka . . . enda nemu beterima kasih, enda tetap ati, . . . enggai sepenemu enggau orang bukai, . . . mangah, . . . nyadi munsuh kaban diri, kieh, sumbung.”—2 Timoti 3:1-4.
Bup Kudus mega madahka, penyarut deka mayuh nyadi ba jeman tu, nyengkaum orang ke ngelaban perintah lalu mayuh utai ti charut ketegal politik. (Luke 21:9) Taja pia, jemah ila, nadai agi ulah ti ganas ketegal politik, lalu orang enda bepechah-belah agi.
Ulah ti ganas ketegal politik deka nadai agi
Bup Kudus madahka, Petara udah numbuhka Perintah Iya ba serega lalu nya deka nganti semua perintah mensia.
‘Petara ti di serega deka numbuhka siti perintah ti . . . deka ngerusak semua perintah bukai, lalu udah nya iya deka meruan belama iya.’—Daniel 2:44.
Perintah Petara deka mai penyerakup enggau pengelantang ba serata dunya.
Raja Perintah Petara, iya nya Jesus Kristus, dikumbai “Raja Pemaik,” lalu iya deka nentuka “seruran bisi pemaik.”—Isaiah 9:6, 7.
Indah kemayaharitu, rayat Perintah nya benung belajar chara bebaik enggau orang. Bup Kudus madahka asil iya: “Sida deka nempa pedang sida nyadi pengeradu tanah lalu sangkuh sida nyadi duku kena nyarau kayu. Semua bansa deka badu agi beperang, nadai agi nyendiaka diri beperang.”—Isaiah 2:3, 4.
Kena nemu mayuh agi, bacha artikel “Nama Utai ke Nyadi Lebuh Perintah Petara Merintah?” lalu peda video Nama Reti Perintah Petara?
Nuan Engka Rindu Meda Tu
MENARA JAGA
Nama Deka Digaga Perintah Petara?
Jesus nemu semina Perintah Petara ulih mutarka semua penanggul ba dunya. Nama utai ke udah digaga Peirntah Petara ti ulih ngemansangka pengandal kitai?
MENGKANG BEJAGA!
Mayuh Orang Kurang Pechayaka Pegawai Politik. Nama Dipadah Bup Kudus pasal Tu?
Bup Kudus nangkan kitai bejimat ngagai sapa kitai pechaya. Iya mega nunjukka sapa ke ulih mutarka penanggul kitai dudi hari.
MENARA JAGA
Sapa ke Dipilih Petara Nyadi Tuai?
TOPIK BUKAI
Pengadang ti Bendar Pasal Jemah Ila
Nama kebuah semaya ke ditulis dalam Bup Kudus ulih dikeandalka ari jaku orang ke bedau temu betul enda?
