Mayuh orang, indah orang ke ngaku diri Kristian mega ngasaika, ajar Bup Kudus pasal seks enggau tikah udah enda ngena agi kemayaharitu. Enti deka nitihka chara orang kemayaharitu, beberapa iti gerija ngubah ajar sida pasal utai ke ulih enggau pasal utai ke enda ulih. Tang, kati ajar Bup Kudus pasal utai ke betul enggau salah nya agi ulih dikena kitai? Agi. Uji peratika kebuah iya.

 Mensia enda ulih mujur enti nadai iring ari Penempa sida, iya nya Petara Jehovah. a Dalam Bup Kudus bisi madahka, “Nadai siku kami bisi kuasa atas seput diri empu.” (Jeremiah 10:23) Amat, Petara bisi meri penau ngagai kitai kena ngaga pemutus. Tang, Iya nadai meri kitai kuasa tauka penau nentuka kediri empu pasal utai ti betul enggau salah. Petara ka kitai andalka Iya nentuka semua nya.—Jaku Dalam 3:5.

 Kitai ulih bulih iring Petara nengah Bup Kudus. Nama kebuah kitai patut nitihka iring Petara?

•   Petara Jehovah meh ke nempa kitai. (Masmur 100:3) Nya alai, Iya meh ke pemadu nemu ni bagi utai ke ngasuh kitai lantang sereta gerai, enda ngira ba tubuh, runding, tauka emosi. Iya mega nemu, nama penyadi enti kitai enda ngasika pesan Iya. (Galatia 6:7) Nambahka nya, Petara Jehovah ka kitai idup enggau lantang. Dalam Bup Kudus bisi nerangka, ‘Petara deka ngajar kitai utai ke penguntung kitai lalu nunjukka jalai ti patut ditengah kitai.’—Isaiah 48:17.

•   Ati mensia nunjukka jalai ti salah. Mayuh orang madah, enti ka nemu pasal utai ti betul enggau salah, titihka meh ati. Reti iya, nitihka pengingin diri empu. Tang dalam Bup Kudus bisi nangkan, “Nadai utai ti nemu ngakal ari ati mensia.” (Jeremiah 17:9) Enti kitai enda nitihka iring Petara, ati ulih ngemai tauka nunjukka kitai jalai ti salah, ke ngujungka kitai nesal dudi hari.—Jaku Dalam 28:26; Pengajar 10:2.

 Enda! Semina Bup Kudus meh alai kitai nemu pemendar pasal Petara sereta pemanah Iya. Lalu Bup Kudus ulih madahka kitai utai ti betul enggau salah nitihka runding Petara. (1 Korint 6:9-11; Galatia 5:19-23) Petara dekaka orang nemu pasal pemendar ke bisi dalam Bup Kudus. (1 Timoti 2:3, 4) Nya kebuah, tuai pengarap patut ngajar utai ke ditulis dalam Jaku Petara.—Titus 1:7-9.

 Mayuh orang enggai nitihka standard tauka ajar ari Bup Kudus, ngiga bala tuai pengarap “nyebut utai ti dikerinduka sida.” (2 Timoti 4:3) Tang jaku dalam Bup Kudus bisi meri tangkan, “Tulah meh kita ke ngumbai utai ti jai manah, lalu utai ti manah jai.” (Isaiah 5:20) Tu terang nunjukka, Petara deka ngukum tuai pengarap ke ngajar utai ti enda nitihka ajar Iya.

 Enda. Enti deka ngelantangka ati Petara, kitai deka nitihka ajar sereta teladan ari Jesus Kristus. Jesus ngajar bala murid iya anang ngakim orang bukai, tang patut rindu sereta bebasaka orang bukai.—Matthew 5:43, 44; 7:1.

 Bala murid Jesus nitihka ajar Petara ba pengidup sida. Tang, sida enda mejal orang bukai ke ngembuan runding ti enda sebaka. (Matthew 10:14) Jesus mega enggai bala murid iya ngena chara bepolitik, tauka sebarang chara ke bukai mejal orang nerima ajar Petara.—John 17:14, 16; 18:36.

 Enti kitai nitihka ajar Petara pasal utai ti betul enggau salah, kitai deka ngasaika mayuh penguntung, enda ngira diatu tauka dudi hari. (Masmur 19:8, 11) Tu nyengkaum:

•   Bulih mayuh agi pengelantang.—Jaku Dalam 29:6.

•   Kaul ti rapat enggau Petara.—Jaku Dalam 3:32.

•   Bulih tulung ari Petara lebuh napi sesiti penanggul.—Jaku Dalam 11:8.

•   Bepeluang idup belama iya ba dunya Paradais jemah ila.—Masmur 37:29.