Ba entara taun 1999 enggau 2015, Saksi-Saksi Jehovah udah ngaga lebih 5,000 Palan Gempuru ba Amerika Tengah a enggau Mexico. Lalu, kena nyaup satu juta iku Saksi sereta orang ka datai ba gempuru kitai ba menua tu, lebih ari 700 Palan Gempuru udah digaga.

Dulu suba, gerempung ba serata dunya tusah deka ngaga endur begempuru. Chunto, ba Mexico, mayuh Saksi begempuru ba rumah sida empu. Nama kebuah? Siti kebuah iya nya, betaun-taun, undang-undang madahka gerempung pengarap enda ulih ngempu tanah. Tang, ba kandang taun 1990, undang-undang udah berubah, lalu Saksi-Saksi Jehovah berengkah ngaga mayuh agi Palan Gempuru. Taja pia, pengawa ngaga Palan Gempuru ulih tembu timpuh bebulan- bulan.

Pengawa tu mansang enggau jampat ba taun 1999, pengudah Raban Nirika Palan Gempuru berengkah dipejalaika ba baruh program nirika Palan Gempuru ba menua ke kurang orang ke gawa, nyengkaum menua Mexico enggau tujuh iti menua ba Amerika Tengah. Berengkah ari 2010, pampang opis ke digaga ba Mexico nyaga pengawa nirika Palan Gempuru ba serata menua ke dipegai pelilih nya.

Bala menyadi ke enggau pengawa begagaka Palan Gempuru bisi napi penanggul lebuh sida ngaga Palan Gempuru ba endur ti jauh. Chunto, ba Panama, sida semina ulih ngena bot pengelama kira-kira 3 jam nengah tisi tasik kena nuju ngagai siti projek. Ba Chiapas endur orang Mexico, raban nirika Palan Gempuru ngena bilun ti mit kena mai perengka kena nirika Palan Gempuru ba endur ke jauh.

Orang ke ukai saksi mega keran deka meda Palan Gempuru ke baru ba endur sida. Chunto, seiku lelaki ari Honduras madahka sebedau Saksi ngaga Palan Gempuru ba endur nya, orang bukai bisi deka meli tanah nya kena ngaga kelab malam. Tang iya enggai. Maya Saksi-Saksi Jehovah madahka iya sida deka ngaga Palan Gempuru ba endur nya, iya madah: “Tu berekat!”

Ba mayuh endur, mayuh orang rindu ati meda pemagas bala Saksi lebuh sida gawa. Seiku lelaki ari Guatemala madahka: “Ba adat kami, indu semina bekereja ba dapur. Tang indu ba ditu ngereja pengawa ke sebaka enggau lelaki. Aku rindu ati meda bala indu nusun sereta masang besi enggau nyemin dinding. Tu utai ti amat ngalitka ati!” Sekeda orang ke diau semak enggau endur nya meli ke sida iya pemakai enggau ai.

Mayuh orang rindu ati meda gaya Palan Gempuru kitai digaga. Ba Nicaragua, siku injinir madahka datuk bandar pasal Palan Gempuru ke digaga enggau chukup badas sereta ngena perengka ti manah. Ke bendar iya, sida ngaga Palan Gempuru tu ngena perengka ti pemadu manah ari bengunan ke bukai!

Endang amat, Saksi-Saksi Jehovah amat gaga ati laban bisi endur ti manah kena begempuru. Sida meda mayuh pelajar Bup Kudus deka datai ngagai gempuru pengudah bisi Palan Gempuru. Bala ari gerempung ba Mexico ke enggau ba pengawa ngaga Palan Gempuru madahka asai terima kasih sida bakatu : “Kami beterima kasih ngagai Jehovah ke udah meri kami peluang ngaga Palan Gempuru ke ulih meri Iya mulia serta basa ngagai nama Iya.”