Aku ada ba La Ceiba, Honduras. Aku anak ke pemadu biak dalam lima iku kami semadi. Semua menyadi tuai aku indu. Semina aku aja ke bengal dalam kami sebilik. Kami amat seranta, lalu diau ba endur ke mayuh jenayah. Maya umur aku dalam urung empat taun, apai bebadi ba endur kereja. Kenyau ari nya, pengidup kami majak merinsa.

 Indai bendar gawa nupi kami semadi. Taja pia, agi meh duit ke diulih iya nya enda chukup meli ke aku gari. Enti hari ujan, aku amat chelap laban nadai baju ke tebal.

 Seraya mansang besai, aku belajarka Jaku Bengal Bisu Honduras. Enggau chara nya, aku ulih begulai enggau sida ke bengal bisu ti bukai. Tang, indai sereta semua menyadi tuai aku enda nemu ngena jaku tu. Sida ngaga kebut diri empu maya bejaku enggau aku. Ketegal nya, indai amat nyaga enggau sapa aku begulai. Taja pan randau kami bisi tatak, tang iya bebendar nulung aku mereti, ngambika aku enda salah pilih kaban, baka enggau orang nginsap tauka mabuk. Aku amat beterima kasih laban enda dilimpangka pengawa ti salah tu.

 Maya agi mit, indai selalu mai aku ngagai gerija Katolik. Tang aku nadai utai temu, laban nadai orang ulih nulung aku ba dia. Ketegal tu, maya aku sepuluh taun, aku enggai ngagai gerija agi. Tang iya ke bendar, aku agi deka nemu mayuh pasal Petara.

 Kena 1999, maya aku 23 taun, aku betemu enggau seiku indu ari Amerika Serikat. Iya sebagi ari komuniti gerija. Iya ngajar aku Bup Kudus ngena Bansa Jaku Bengal Bisu Amerika (ASL). Aku rindu enggau utai ke dipelajarka aku. Aku pan deka nyadi pengajar pengarap. Nya kebuah, aku pindah ngagai Puerto Rico nerima latih orang Kristian, spesial ke orang ti bengal bisu. Maya aku pulai baru ngagai La Ceiba kena 2002, aku numbuhka siti gerija bengal bisu ari bantu tiga iku kaban aku. Udah nya, seiku ari sida ke benama Patricia nyadi bini aku.

 Ba gerija kami, aku meri cheramah ngena bansa jaku Bengal Bisu Honduras. Aku nunjukka gambar cherita Bup Kudus, ngayanka gambar nya ngagai sida ke bengal bisu, ngambi senang agi sida mereti. Aku mega ngabas sida ke bengal bisu ngelingi endur nya, lalu merindang sereta nulung sida mutarka penanggul. Indah aku nyadi pengerintis ti spesial ba Amerika Serikat enggau Zambia. Tang iya ke amat, aku pan enda amat nemu batang ajar Bup Kudus. Aku semina ngajar utai ke diajar ngagai aku, enggau utai ke ditemu aku ari gambar cherita Bup Kudus. Indah, aku empu agi mayuh tanya.

 Bisi sekali, beberapa iku orang ba gerija kami berengkah nabur jaku petenah pasal aku. Sida ngumbai aku gila indu sereta mabuk. Aku amat asa sereta ringat. Enda lama udah nya, aku enggau Patricia pansut ari gerija.

 Saksi-Saksi Jehovah selalu datai ngabas kami duai Patricia, tang kami selalu enda nerima sida. Tang pengudah kami pansut ari gerija, Patricia deka belajarka Bup Kudus enggau sepasang laki bini Saksi iya nya, Thomas enggau Liccy. Aku amat alit ati laban seduai iya pandai ngena bansa jaku bengal bisu, taja pan sida nadai penimpang. Nya kebuah, aku pan belajar.

 Kami belajar dalam beberapa bulan ngena video ASL. Tang kami kelalu ningaka jaku kaban kami ti madahka, bala Saksi Jehovah tu semina nitihka ajar mensia. Kami pan ngetu belajar. Thomas bebendar nunjukka bukti, Saksi Jehovah ukai baka nya, tang aku tetap enda pechaya.

 Beberapa bulan udah nya, Patricia balat kena penyakit kemurungan. Iya besampi ngambi Saksi-Saksi Jehovah datai baru. Pengudah nya, seiku ari orang ke semak kami diau, iya nya Saksi Jehovah datai ngabas Patricia. Iya deka nulung Patricia ngiga Liccy. Ninting minggu udah nya, Liccy datai merindang Patricia lalu belajarka Bup Kudus baru. Liccy amat kaban ti bendar. Taja pia, aku agi bedau ulih pechayaka Saksi-Saksi Jehovah.

 Kena taun 2012, Saksi-Saksi Jehovah bisi pengawa ti spesial iya nya, nyadung DVD Maukah Anda Mengetahui Kebenaran? Liccy meri siti DVD ngagai kami. Pengudah meda DVD tu, baru meh aku nemu, mayuh ari ajar aku suba baka api neraka tauka pasal semengat orang mati, enda sejalai enggau ajar Bup Kudus.

  Ba minggu siti, aku datai ngagai Palan Gempuru Saksi-Saksi Jehovah betemu enggau Thomas. Aku madahka, aku deka ngajar utai ti bendar ngagai orang ke bengal bisu, tang aku enggai nyadi Saksi Jehovah. Aku deka bisi gerija diri empu ke nulung orang bengal bisu. Thomas muji pengeransing aku, tang iya muka Epesus 4:5. Ayat tu nerangka, eklisia orang Kristian patut beserakup enggau pangan diri.

 Thomas mega meri aku DVD Saksi-Saksi Yehuwa—Beraksi dengan Iman, Bagian 1: Keluar dari Kegelapan (ASL). Ba video tu, bisi madahka seraban orang ke belajarka Bup Kudus enggau silik, lalu ngiga pemendar ari batang ajar Bup Kudus. Maya meda video tu, aku pan deka baka sida. Aku mega deka ngiga utai ti bendar. Video nya ngasuh aku pechaya, Saksi Jehovah amat ngajar utai ti bendar, laban ajar sida seruran bepelasarka Bup Kudus. Nya alai, aku pan belajar baru Bup Kudus enggau sida. Kena 2014, aku enggau Patricia dibaptisa nyadi Saksi Jehovah.

 Aku amat rinduka Saksi-Saksi Jehovah, laban sida bebendar neladan Jehovah, iya nya Petara ti kudus. Sida enda rinduka jaku ti kamah, sereta enda rindu belaya. Sida seruran ngering sereta sayauka pangan diri. Enda ngira ari ni asal tauka jaku sida, Saksi-Saksi Jehovah seruran beserakup, lalu semua sida ngajar pemendar ke datai ari Bup Kudus.

 Aku mega amat rinduka ajar Bup Kudus. Chunto, diatu baru meh aku nemu, semina Jehovah aja Pemerintah ke bisi hak merintah dunya. Iya sayauka semua mensia, nyengkaum sida ke bengal bisu. Aku ulih ngasaika pengerindu iya, lalu tu amat berega ba aku. Nambahka nya, aku mega belajar, enda lama da agi dunya tu deka nyadi Paradais ti manah. Enda lama agi, semua kitai badu agi sakit, lalu idup belama iya ba dunya. Enda sabar meda semua utai tu nyadi!

 Aku enggau Patricia rindu ngajar Bup Kudus ngagai orang ke bengal bisu. Diatu, kami bisi beberapa iku pemelajar ke kala sama gerija enggau kami. Tang, aku enda charut runding baka maya aku nyadi tuai pengarap ba gerija suba. Diatu, aku tetemuka saut ngagai mayuh tanya aku, pengudah belajarka Bup Kudus enggau Saksi-Saksi Jehovah.