Aku ada ba menua Calgary, di Alberta Kanada. Apai indai sarak maya aku agi mit. Aku enggau indai pindah ngagai rumah aki ini. Sida amat sayauka aku enggau indai. Aku agi ingat, maya aku agi mit, pengidup aku lantang sereta nadai penanggul.

 Idup aku berubah maya aku beumur tujuh taun. Indai jadi baru enggau apai, lalu kami pindah ke menua St. Louis, Missouri, ba Amerika Serikat. Apai aku amat kasar. Bisi sekali, maya aku baru tama sekula, aku dikachau orang. Maya apai nemu aku enda ngelaban sida, iya amat ringat. Indah iya ngajar aku kasar agi ari orang ke ngachau aku! Ketegal tu, aku berunding, pengasar patut dibalas enggau pengasar mega. Nya kebuah, aku biasa berekak enggau anak mit ke bukai, taja pan aku semina tujuh taun.

 Ulah apai ti kasar, ngasuh indai berasai ringat sereta asa. Sida pan balat belaya. Maya aku 11 taun, aku berengkah makai dadah enggau pemabuk. Maya aku mansang besai, aku majak kasar lalu selalu belaya enggau sesapa aja, enda milih dini alai. Pengabis aku sekula, aku amat-amat jai.

 Maya 18 taun, aku gawa ba Marine Corps di Amerika Serikat. Dia, latih ke diberi ngasuh aku balat agi jai. Aku belajarka chara munuh orang. Pengudah lima taun, aku pansut ari endur nya, lalu belajar pasal psikologi, laban aku deka gawa ba Biro Investigasi Federal Amerika Serikat (FBI). Aku pan belajar ba Amerika Serikat. Pia mega, laban aku pulai baru ngagai Kanada, aku pan neruska pelajar aku ba din.

 Maya aku belajar ba dia, aku amat asa meda gerempung ke ditumbuhka mensia. Mayuh orang amat sumbung, semua utai ba dunya tu baka ke nadai tuju, lalu semua penanggul mensia baka ke nadai ulih diputarka. Ketegal tu, aku amat enda arapka mensia ulih ngubah dunya tu nyadi manah agi.

 Laban aku ngasaika idup tu nadai tuju, nya nambahka agi penyarut idup aku. Aku majak balat makai dadah sereta mabuk. Aku mega begigaka duit sereta seks bibas. Ninting hari, runding aku semina pasal ngagai parti, lalu ngiga indu. Ketegal kala enggau pengawa soldadu, aku mega selalu belaya. Suba aku ngumbai, aku bisi hak nentuka ni bagi utai ke lurus tauka enda. Enti aku ngasaika orang nya enda lurus, enggau ati ti nadai pengasih meh aku nyamah orang nya. Aku ngasaika diri lurus, tang iya ke amat, aku enda tetagangka emosi diri.

 Bisi sekali, aku enggau kaban aku benung mungkus dadah ke deka dijual kami. Udah nya, kaban aku nanya, kati aku pechayaka Petara. Aku nyaut, “Enti Petara ke ngasuh mensia merinsa, aku enggai ngelala Iya!” Ba hari siti endur aku baru gawa, orang ke sama enggau aku gawa nya Saksi Jehovah, lalu iya nanya aku, “Ba runding nuan, kati nya amat Petara ke ngasuh mensia merinsa?” Aku tekenyit, laban utai ke ditanya iya sama baka ke ditanya aku kemari. Sepemanjai enam bulan, kami selalu berandau pasal mayuh utai. Iya ulih nyaut tanya ari Bup Kudus beberapa iti tanya aku pasal pengidup, ti enda kala bisi saut sebedau tu.

 Maya nya, aku diau begulai enggau tunang aku. Iya enda rindu ninga cherita pasal utai ke dipelajarka aku. Bisi sekali, aku madah, aku deka ngasuh Saksi Jehovah datai ke rumah lalu kami ulih sama-sama belajar. Ba hari siti, maya aku pulai kereja, iya udah mai semua barang lalu ninggalka aku. Aku pan pansut lalu nyabak. Aku pan besampi ngagai Petara, lalu minta Iya nulung aku. Nya meh keterubah iya aku besampi ngena nama Jehovah.—Masmur 83:18.

 Dua hari udah nya, aku berengkah belajarka Bup Kudus enggau sepasang laki bini Saksi Jehovah. Pengudah sida pulai, aku agi terus macha bup Saudara Dapat Hidup Kekal dalam Firdaus di Bumi. a Sepemanjai malam aku macha bup nya nyentukka abis. Belajar pasal Jehovah sereta anak Iya Jesus, amat negu ati aku. Ari tu aku nemu, Jehovah bisi penyinu, Iya amat tusah ati meda kitai merinsa. (Isaiah 63:9) Aku amat sinu ngenang Petara amat sayauka aku, nyentukka Iya sanggup nyerahka anak Iya nyadika tebus. (1 John 4:10) Aku mega nemu, ngelama tu, Petara amat sabar enggau aku, “Laban Iya enggai nejuka indah siku kita dirusak, tang semua nesal ati.” (2 Peter 3:9) Aku baka ke ngasaika, Jehovah benung narit aku nyadi pangan Iya.—John 6:44.

 Ba minggu nya, aku terus datai gempuru Saksi-Saksi Jehovah. Chara aku begari amat enda menyana. Buk aku panjai, lalu aku pan bekenaka antin. Tang sida ngelaluka penatai aku, lalu nerima aku baka ruang bilik sida ke udah lama enda bepeda. Ulah sida amat baka orang Kristian. Aku baka ke pulai baru ngagai rumah ini, indah tu jauh manah agi!

 Semua utai baru ke dipelajarka aku nya, berengkah ngubah pengidup aku. Aku nguntin buk, lalu badu ngereja pengawa seks ti kamah. Aku mega badu makai dadah sereta mabuk. (1 Korint 6:9, 10; 11:14) Aku deka ngagaka Jehovah. Nya alai aku nemu, tiap kali Jehovah enda rinduka pengawa aku, aku amat-amat nesal. Nya asaika ati aku benung diachuk lunga. Dalam ati aku madah, ‘Aku enda ulih ngereja tu agi.’ Aku terus enggau naka ulih ngubah runding sereta ulah aku. Asil iya, aku berengkah ngasaika pemanah iya, laban ngereja utai ke ngerinduka ati Jehovah. Kena 29 Julai 1989, enam bulan pengudah belajarka Bup Kudus, aku dibaptisa nyadi Saksi Jehovah.

 Ketegal belajarka Bup Kudus, pengidup aku berubah. Suba aku amat kasar enti betemu enggau orang ke kasar. Tang diatu, aku bebendar “bebaik enggau semua orang.” (Rome 12:18) Semua ubah tu ukai ketegal aku empu, tang ketegal roh kudus sereta Jaku Petara.—Galatia 5:22, 23; Hebrew 4:12.

 Aku nadai agi makai dadah, kasar, sereta badu ngereja ulah seks bibas. Diatu, aku bebendar deka ngelantangka Petara Jehovah, lalu enggau naka ulih ngereja pengawa Iya. Tu nyengkaum, nulung orang bukai ngelala Iya. Beberapa taun pengudah aku dibaptisa, aku pindah ngagai endur ti jauh, nulung pengawa nginjil ba din. Dalam beberapa taun nya mega aku berasai amat gaga, laban ulih ngajar Bup Kudus ngagai mayuh orang, lalu meda baka ni Bup Kudus ngubah pengidup sida. Kelimpah ari nya, aku mega amat gaga laban indai pan nyadi Saksi Jehovah. Siti kebuah iya deka nyadi Saksi Jehovah, laban iya meda aku nyadi orang ke manah agi.

 Kena taun 1999, ba El Salvador, aku enggau Sekula Penginjil Perintah Petara. Sepemanjai sekula nya, aku dilatih nyadi landik agi nginjil, ngajar enggau nyaga eklisia. Ba ujung taun nya, aku jadi enggau Eugenia, seiku menyadi indu ti amat manah sereta bajik. Kami duai nyadi penginjil penuh jam ba Guatemala.

 Diatu, aku badu agi asa enggau pengidup. Indah aku berasai puas sereta lantang. Laban nitihka lalau Bup Kudus, aku pan badu agi kasar sereta badu ngereja seks bibas. Tang, aku ulih idup bebaik enggau orang bukai, sereta ngasaika pengerindu ti bendar.