Mayuh pelancong nemuai ngagai ai wong ti tebilang semak enggau pasar Pagsanjan ba Pilipina. Ba dia apai aku, Nardo Leron, dibesaika ba ruang bilik ti seranta. Iya meda pengawa makai suap balat nyadi ba endur iya kereja, indah ba entara bala perintah enggau polis. Nya kebuah, iya berasai asa sereta pedis ati.

 Apai indai aku bebendar gawa ngemesaika lapan iku anak. Sida suah nadai ba rumah ba timpuh ti panjai, laban patut nyaga utai tanam ke ditanam ba atas bukit tinggi. Nya alai, aku enggau menyadi lelaki aku ke tuai, Rodelio, suah nyaga diri empu, lalu kami mega selalu lapar. Kami jarang ulih bemain maya agi mit. Kenyau aku beumur tujuh taun, aku enggau bala menyadi bukai patut gawa ba ladang. Kami ngema guni igi kelapa ke berat, lalu nengah jalai ti renjan ba bukit ti tinggi. Kekadang kami mega patut ngirit guni nya enti iya kelalu berat dibai.

  Kami ngetatka diri dipalu apai. Tang kami berasai pedis agi ati meda indai dipalu. Kami nguji nagang apai, tang enda ulih. Nya alai, aku enggau Rodelio beaum deka munuh apai maya kami besai ila. Aku selalu ngarapka bisi seiku apai ke sayauka kami!

 Aku amat asa sereta ringat laban bisi seiku apai ti lengkar. Nya alai, aku pansut ari rumah maya umur aku 14 taun. Aku kala idup ba sebelah kaki lima, lalu udah nya aku pan berengkah makai ganja. Enda lama udah nya, aku bulih pengawa nyadi orang ke deriba bot ti mai pelancong datai ngelawa ai wong.

 Beberapa taun udah nya, aku berengkah datai ngagai universiti ba Manila. Tang, ninting ujung minggu, aku pulai kereja ke Pagsanjan. Nyadi, aku enda chukup awak kena belajar. Idup aku baka ke nadai tuju, lalu ganja enda agi ngasi kena ngurangka pengirau aku. Nya kebuah, aku berengkah makai dadah methamphetamine, kokain, enggau heroin. Tiap kali makai dadah enggau pengawa seks ti enda bemoral, aku suah dikelingi penyeranta, nadai pengelurus enggau pemerinsa. Aku begedika perintah, laban aku ngasaika, ketegal sida penyarut tu nyadi. Aku nanya Petara, “Nama kebuah idup mensia kelalu tusah?” Aku nguji ngiga saut ari mayuh bengkah pengarap, tang enda tetemuka saut iya. Nya alai, aku makai mayuh agi dadah kena ngelamun asai ati aku ti asa.

 Ba taun 1972, bala pelajar ba Pilipina mogok ngagai perintah. Aku bisi begian ba siti ari pengawa mogok ke dipejalaika. Pengawa mogok tu nyau berubah nyadi balat ganas. Pengujung iya, mayuh orang ditangkap, lalu beberapa bulan udah nya, darurat pan digerah ba serata menua Pilipina.

 Udah nya, aku pulai idup ba sebelah kaki lima baru. Tang kali tu, aku seruran takut ngagai piak ti bekuasa ketegal aku kala enggau pengawa mogok nya. Aku begunaka duit ngambika ulih neruska ulah aku ke makai dadah. Nya alai aku berengkah ngenchuri, lalu pengujung iya aku ngatur pengawa ti enda bemoral ke orang kaya sereta orang ari menua bukai. Aku enda agi ibuh sekalika aku idup tauka mati.

 Ba maya nya, indai enggau menyadi lelaki aku berengkah belajarka Bup Kudus enggau Saksi-Saksi Jehovah. Apai amat ringat lalu nunu litaricha Bup Kudus sida. Taja pia, indai enggau menyadi lelaki aku tetap sabar lalu udah nya dibaptisa nyadi Saksi-Saksi Jehovah.

 Bisi sekali, seiku ari Saksi madah ngagai apai aku pasal semaya Bup Kudus jemah ila. Maya nya, bisi pengelurus ti bendar ba serata dunya. (Masmur 72:12-14) Apai aku amat rindu enggau semaya tu nyentukka iya mutus deka ngulihka mayuh agi penemu pasal pekara tu. Dalam Bup Kudus, iya ukai aja ulih nemu pasal semaya Petara ke deka nirika siti perintah ti lurus, iya mega belajar pasal peneka Petara ke bala laki enggau apai. (Epesus 5:28; 6:4) Ba timpuh ti pandak, iya enggau semua bala menyadi aku nyadi Saksi-Saksi Jehovah. Aku enda nemu pasal tu, laban maya nya aku diau jauh ari sida.

 Ba taun 1978, aku pindah ngagai Australia. Tang, runding aku agi enda lantang taja pan aku diau ba menua ti manah. Aku agi ngirup ai bisa enggau makai dadah. Ba taun ti sama, Saksi-Saksi Jehovah ngelawa aku. Sida ngena Bup Kudus madahka aku pasal dunya ti penuh pemaik. Aku rindu pasal tu tang aku berasai kakang ati deka enggau sida.

 Enda lama udah nya, aku pulai ngagai Pilipina baru dalam beberapa minggu. Bala menyadi aku madahka, apai aku udah enggau naka ulih deka nyadi orang ke manah. Tang aku nguji nyeliahka diri, laban aku agi berasai asa.

 Menyadi indu aku ngena Bup Kudus nerangka ngagai aku, nama kebuah pengidup tu penuh enggau pemerinsa sereta nadai pengelurus. Aku berasai alit ati meda seiku nembiak ti kurang peneleba ulih nyaut semua tanya aku. Sebedau aku mupuk, apai aku meri siti bup ke betajuk, You Can Live Forever in Paradise on Earth. a Iya madahka, “Anang meh ngiga ba endur bukai agi. Bup tu deka meri nuan saut ngagai utai ke digiga nuan ngelama tu.” Iya meransang aku ngiga Saksi-Saksi Jehovah ba Australia.

 Aku mendingka jaku lalau apai, lalu udah nya tetemuka Palan Gempuru Saksi-Saksi Jehovah ke enda jauh ari rumah aku ba Brisbane. Aku setuju belajarka Bup Kudus enggau tetap. Utai ke ditulis ba Bup Kudus, baka bup Daniel bagi 7 enggau Isaiah bagi 9, nunjukka jemah ila, Perintah Petara bibas ari makai suap lalu deka merintah dunya. Aku mega belajar, kitai deka bulih pengidup ti manah ba dunya Paradais. Aku deka dikerinduka Petara, tang aku nemu, aku patut nagang emosi diri, lalu ngetu makai dadah, ngirup ai bisa, sereta ninggalka chara pengidup ti enda bemoral. Aku badu begulai enggau indu ke serumah enggau, lalu ngetuka ulah jai aku. Lebuh pengarap aku ngagai Jehovah nambah, aku besampi ngambika Iya ulih nulung aku ngaga ubah bukai.

 Belubah-lubah aku sedar, pasal utai ke dipelajar aku amat ngubah seseiku orang. Bup Kudus madah, kitai ulih ngubah diri. (Kolosi 3:9, 10) Lebuh aku deka ngubah diri, aku nemu pasal apai ti udah berubah nya, endang amat. Aku enda agi pedis ati sereta bemunsuh enggau iya, tang aku deka bebaik enggau iya. Pengujung iya, aku pan ngampunka apai, lalu enda agi nyimpan dendam ke udah bisi dalam ati aku kenyau ari mit.

 Maya agi mit suba, aku seruran nitihka ulah orang bukai ke ulih ngerusak sereta ngemedis. Tangkan Bup Kudus endang amat ba aku. Kaul ti jai ulih ngerusak ulah aku. (1 Korint 15:33) Tang aku ulih ngiga kaban ti ulih dipechaya ba entara Saksi-Saksi Jehovah. Sida nulung aku nyadi orang ke manah agi. Aku mega betemu enggau bini ti amat dikesayauka aku, Loretta. Kami bela ngajar orang pasal baka ni Bup Kudus ulih nulung sida.

 Apai aku nyadi seiku laki ti rinduka indai sereta seiku menyadi Kristian ti baruh ati lalu rinduka pemaik. Aku beterima kasih laban Bup Kudus nulung iya nyadi orang ke enda kala disangka aku. Lebuh aku betemu baru enggau apai pengudah dibaptisa nyadi Saksi-Saksi Jehovah kena taun 1987, apai aku keterubah iya merap aku!

 Pengelama 35 taun, apai enggau indai aku begulai bekunsika pengadang Bup Kudus ngagai orang bukai. Iya nyadi seiku orang ke bagas sereta ibuh. Orang mayuh ngelala iya, seiku orang ke rindu deka nulung. Pengelama betaun-taun, aku belajar bebasa sereta rinduka iya. Aku temegah nyadi anak iya! Iya nadai kena taun 2016. Tang aku ngenang iya enggau penuh pengerindu. Kami duai udah ngaga ubah ti besai ba diri empu laban nitihka ajar Bup Kudus. Aku nadai sesekali berasai begedi ngagai iya agi. Aku mega beterima kasih laban ulih ngelala Apai ti di serega, Petara Jehovah, ti udah besemaya deka munaska semua pun pemerinsa ba diri sebilik.