Sekeda orang begunaka timpuh ti lama kena belajar ari peneleba diri empu ti jai. Aku mega baka nya. Aku ada enggau dibesaika ba Barcelona, nengeri kedua pemadu besai ba menua Sepanyol. Diri sebilik aku diau ba endur ke dikumbai Somorrostro, enda jauh ari pantai. Endur tu tebilang laban mayuh jenayah enggau orang ke gian makai dadah.

 Aku bisi lapan iku diri menyadi, lalu kami sebilik amat seranta. Nyadi, apai ngasuh aku gawa ngumpul bul ba kelab tenis. Maya nya umur aku 10 taun, lalu patut gawa pengelama 10 jam ninting hari. Nya kebuah aku enda ulih ke sekula baka nembiak bukai ke serambau enggau aku. Maya umur aku 14 taun, aku nyadi tukang besi ba kedai besi.

 Ba taun 1975, aku dikangauka nyadi soldadu laban nya enda ulih diseliahka ba Sepanyol. Aku rindu deka nemu mayuh utai, nya alai aku enggau siti raban ke dikumbai Spanish Foreign Legion ba Melilla, iya nya tanah enggi perintah Sepanyol ke ba menua Afrika Utara. Ba dia, aku berengkah makai dadah enggau gian ngirup.

 Pengudah aku ninggalka raban Legion, aku pulai baru ngagai Barcelona lalu numbuhka siti raban. Kami ngenchuri nama aja utai ke dipeda, nyual iya, enggau ngena duit nya kena meli dadah. Aku berengkah makai LSD enggau amfetamina. Pengidup aku penuh enggau pengawa seks ti kamah, mabuk enggau bejudi. Aku mega nyadi orang ti majak kasar. Aku seruran bebaika lunga, kapak, tauka duku, lalu aku enda takut deka ngena nya.

 Bisi sekali, aku enggau bala raban aku ngenchuri sebuah kerita lalu kami digagai polis. Nya baka cherita ba wayang. Kami nabanka kerita penyauh 30km nyentukka polis ulih berengkah nimbak kami. Pengujung iya, kerita nya nyau tebabas, lalu kami semua ngerarika diri. Lebuh apai aku nemu pasal utai tu, iya muru aku ari rumah.

 Sepemanjai lima taun udah nya, kaki lima nyadika rumah aku. Aku tinduk ba mua pintu rumah orang, dalam lori, atas bangku ba taman, enggau ba sebelah pendam. Pengidup aku nadai tuju, lalu aku ngasaika idup tauka mati pan nadai orang peduli. Aku agi ingat, aku kala ngelar lengan enggau kuan jari aku, maya aku enda sedarka diri ketegal dadah. Abi tu agi bisi nyentukka diatu.

 Lebuh umur aku 28 taun, indai aku datai ngiga aku lalu mai aku pulai ke rumah. Aku setuju lalu besemaya deka ngetuka ulah aku ti jai. Tang nya begunaka awak ti lama.

 Bisi sekali maya lemai, dua iku Saksi-Saksi Jehovah datai ke rumah kami. Lebuh seduai iya berandau enggau aku, apai merak ngasuh aku nutup pintu. Aku enggai diansak, nya alai aku terus mendingka sida, lalu ngambi tiga iti bup ke diberi sida. Aku mega nanya pasal endur sida begempuru, lalu datai ngagai Palan Gempuru sida beberapa hari udah nya.

 Aku meda semua orang ngena gari ti manah. Tang buk aku panjai, gari aku enda menuku, sereta bisi ragum ke enda dijaga enggau manah. Aku ngasaika diri enda layak tama ngagai palan nya, nya alai aku semina ba luar. Tang aku tepedaka Juan, kaban lama aku ke kala enggau raban aku. Iya bekenaka baju kot. Aku baru nemu iya udah nyadi Saksi Jehovah setaun ti udah. Ketegal nya, aku andal aku pan ulih tama lalu enggau gempuru nya. Kenyau ari nya, pengidup aku pan berengkah berubah.

 Aku nerima belajarka Bup Kudus lalu aku nemu, enti aku deka ngelantangka ati Petara, aku patut ngubah ulah aku ti kasar enggau ngetu ari pengidup aku ti enda bemoral. Enda senang deka ngaga ubah ti dikedekaka Petara Jehovah. Aku patut ‘ngubah chara aku berunding.’ (Rome 12:2) Tang, pengerindu Petara negu ati aku. Taja pan aku ngereja mayuh penyalah, Iya agi meri aku peluang pulai ngagai jalai ti betul. Penemu pasal Petara Jehovah berengkah tama ke dalam ati aku, lalu aku nemu Penempa kitai ibuhka aku.—1 Peter 5:6, 7.

 Pekara nya nulung aku berubah. Chunto, pengudah belajar pasal insap, aku berunding, “Enti Petara Jehovah deka aku beresi enggau enda kamah ba semua utai, aku patut muai semua insap tu!” (2 Korint 7:1) Nya alai, aku muai semua insap aku ke dalam tong sampah!

 Aku mega patut ngetu makai enggau nyual dadah. Tu begunaka lebih mayuh awak enggau pengawa. Aku sedar, aku patut ngetu begulai enggau bala kaban aku ke suba, laban nya ulih nagang aku ngaga pemansang ba pengarap. Udah nya, aku berengkah bepanggai ba Petara enggau bantu ari bala kaban ke baru ba eklisia. Aku enda kala ngasaika pengerindu enggau pengibuh ke baka tu. Bebulan-bulan udah nya, aku mujur ngelepaska diri ari gian dadah lalu berubah nitihka chara dikedekaka Petara. (Epesus 4:24) Kena Ogos 1985, aku dibaptisa nyadi Saksi-Saksi Jehovah.

 Ajar Bup Kudus ngemanahka pengidup aku. Aku bibas ari chara pengidup ti enda dipebasa sereta ulih ngemedis. Kebendar iya, lebih ari 30 iku orang ke dikelala aku suba udah nadai ba umur ti agi biak ketegal AIDS tauka penyakit bukai laban makai dadah. Aku amat beterima kasih laban prinsip Bup Kudus udah nyeliahka aku ari ditinggang penusah ti sama.

 Nembiak ke kasar, ti selalu bebaika lunga enggau kapak semina tinggal sejarah aja. Aku enda kala ngambarka diri deka mai Bup Kudus kena nulung orang. Diatu aku enggau bini aku nyadi Saksi-Saksi Jehovah lalu ngerintis penuh jam.

 Apai indai aku enda nyadi Saksi-Saksi Jehovah, tang sida amat rindu meda penguntung pengudah aku belajarka Bup Kudus. Bisi sekali, apai aku ngetanka pengarap Saksi ba mua orang ke sama enggau iya gawa, laban iya empu udah meda ubah ke digaga aku pengudah enggau pengarap tu. Indai aku seruran madahka aku patut belajarka Bup Kudus tumu agi. Aku pan setuju enggau iya!

 Peneleba ba pengidup aku nya udah ngajar aku, naka meh pemeli enti deka ngemuaska diri enggau makai dadah sereta pengawa jai ke bukai. Diatu aku amat-amat berasai puas laban ulih nulung orang bukai nemu ajar Bup Kudus. Ajar ti nyelamatka nyawa aku.