Madián seduai Marcela bisi pengidup ti nyamai ba Medellín, Colombia. Kereja Madián nya begaji besai, lalu seduai iya diau ba apartment ti lawa. Tang siti utai nyadi ti ngasuh seduai iya berundingka nama utai ti pemadu beguna ba pengidup, kelebih agi laban sida tu penyembah Jehovah. Sida nerangka, “Kena taun 2006 kami datai gempuru besai ke betajuk ‘Idup enggau Penumbas Iya’. Mayuh cheramah ke dikenataika sari nya meransang kami idup enggau penumbas iya ngambika ngereja mayuh agi ngagai Jehovah. Pengudah program nya, baru kami duai sedar, nya jauh bebida ari utai ke benung dikereja kami. Kami selalu bebelika utai ke enda entu diguna kami taja pan kami engka enda chukup duit mayar nya, nyadi, kami berutang besai.”

 Cheramah gempuru besai nya ngasuh Madián enggau Marcela ngaga ubah ti patut ba pengidup sida. Ku sida madah, “Kami berengkah ngurangka belanja kami duai. Kami mega mindah ngagai apartment ti mit agi, nyual kerita kami, lalu meli siti motosikal.” Seduai iya mega badu agi shopping alai seduai iya masau mayuh duit. Sida mega ngena mayuh agi awak berandau enggau orang bukai pasal Bup Kudus. Lalu sida bekaban rapat enggau sekeda pengerintis spesial ti ransing. a

 Enda lama udah nya, Madián enggau Marcela mutuska mindah ngagai eklisia ba kampung ti mit ke begunaka mayuh agi penginjil. Ngambika seduai iya ulih mindah, Madián badu kereja. Manager iya enda meretika nama kebuah iya deka ninggalka kereja ti amat manah. Madián nerangka iya: “Nuan ngulihka mayuh duit, enda pia? Tang, kati nuan gaga ati?” Iya ngaku diri enda gaga, laban iya bisi mayuh penanggul ke enda ulih diputarka iya. Madián lalu madahka iya: “Nyadi, pengaga ati ukai nitihka pemayuh duit ke dikemisi, tang bepanggaika sekalika nuan ngereja utai ti amat ngagaka ati nuan. Kami duai bini aku gaga ati seraya kami ngajar orang pasal Petara, nyadi kami deka gaga agi ati enti kami ngena mayuh agi awak ngereja pengawa tu.”

 Madián seduai Marcela ngulihka pengaga sereta pemuas ati ti bendar laban ngemeratka sembah sida ngagai Petara. Pengelama 13 taun seduai iya nginjil ba endur it begunaka mayuh bantu ba barat laut Colombia. Diatu seduai iya amat gaga ati ulih nyadi pengerintis spesial.