Mayuh pengawa ke patut digaga Saksi-Saksi Jehovah ba Bulgaria, kena nulung orang ngelala Petara sereta Jaku Iya, Bup Kudus. Ngambika pengawa tu mujur, beratus iku menyadi ke datai ari mayuh bengkah menua pindah ngagai Bulgaria kenyau ari taun 2000. Nama penanggul ke ditapi sida din? Tang, nama kebuah nya enda lebu? Dingaka sekeda peneleba ke dikunsi bala menyadi kitai ke pindah ngagai Bulgaria.

 Darren, ke datai ari England madahka, “Ari suba, aku enggau Dawn ka pindah ngagai endur bukai, lalu nulung ba endur ke begunaka mayuh bantu. Pengudah kami kawin, kami pindah ke London ngerembaika Berita Manah, lalu belajarka jaku Rusia. Kami suah merambu ka pindah ngagai menua bukai, tang selalu aja pelan kami enda nyadi. Nyadi, kami ngasaika, engka kami sigi nadai ulih nulung ba menua bukai. Tang runding kami nya berubah, lebuh seiku ari kaban kami nyedarka kami, kami agi ulih nyapai juluk ati ka nulung ba menua bukai.” Darren enggau Dawn berengkah ngiga penerang, pasal ni bagi menua ke begunaka Saksi Jehovah datai nulung meritaka Berita Manah. Sida pan berundingka ni bagi menua ke ngena ba sida empu. Kena ujung taun 2011, seduai iya pindah ke Bulgaria.

 Bala menyadi ke nulung ba endur bukai amat gaga ati. Ketegal tu, sekeda Saksi ke nadai pelan, nyau bisi ati ngereja utai ti sama. Nya meh utai ke diasaika Giada enggau Luca, ke datai ari Itali. Giada madah, “Aku betemu enggau beberapa iku Saksi ke pindah ngagai Amerika Serikat Selatan sereta Afrika. Sida nulung enggau ransing. Lalu sida mega berupai gaga ati. Maya sida madahka peneleba sereta pengaga ati diri, aku amat rindu ninga. Nyadi tu ngasuh aku berundingka juluk ati aku ke Jehovah.”

 Tomasz enggau Veronika ngembuan dua iku anak iya nya, Klara enggau Mathias. Sida datai ari Republik Czech lalu pindah ngagai Bulgaria kena taun 2015. Nama utai ke meransang sida pindah? Tomasz madah, “Kami berunding enggau dalam pasal teladan orang bukai, nyengkaum diri sebilik kami ke udah pindah ngagai menua bukai. Kami mega belematika peneleba sida. Ketegal diperansang meda pengaga sida, kami pan bisi ati ka pindah, indah kami sebilik selalu berandauka nya.” Diatu, ruang bilik tu gaga ati nulung ba bandar Montana, Bulgaria.

 Saksi Jehovah ke mega pindah ngagai Bulgaria nya, Linda. Ku iya, “Beberapa taun sebedau aku kitu, aku ngagai Ecuador lalu betemu enggau beberapa iku orang ke pindah kin, kena ngerembaika Berita Manah. Aku pan berunding, bisi maya aku pan ka datai nulung ba endur ke begunaka mayuh agi bantu.” Sepasang laki bini ke datai ari Finland, iya nya Petteri enggau Nadja mega bisi ati pindah ngagai endur bukai, laban sida belematika teladan menyadi ke bukai. Ku sida madah, “Ba eklisia kami suba, bisi beberapa menyadi ke kala nulung ba endur bukai pengelama betaun-taun. Tiap kali sida nusi peneleba diri, sida amat gagit. Sida madahka, sepemanjai awak ke dikena sida nulung ba endur bukai, nya meh maya ti pemadu manah ba pengidup sida.”

 Bala menyadi ke bisi ati nulung ba endur bukai, patut merambu pelan sida enggau manah. (Luke 14:28-30) Nele ari Belgium madah, “Pengudah aku berunding enggau dalam pasal pengingin aku ka nulung ba menua bukai, aku besampi, lalu mansik artikel ke ngena. Ari utai ke dibacha, aku nemu agi, nama patut digaga ngambika aku amat udah sedia ka pindah.”

 Kristian enggau Irmina, ke ari Poland, udah diau ba Bulgaria lebih ari semilan taun. Seduai iya sedia pindah, laban sebedau tu seduai iya kala enggau raban bansa jaku Bulgaria di Poland. Bala menyadi ba raban nya meransang seduai iya belajarka jaku Bulgaria. Ku seduai iya, “Kami empu ngasaika chara Petara Jehovah nyediaka utai diguna kami, laban kami sanggup ngereja tu. Asai tu enda ulih ditelah ngena leka jaku! Enti kitai madahka Jehovah, ‘Aku ka! Anjung meh aku!’ Kitai deka ngereja utai ke dikumbai kitai enda ulih.”—Isaiah 6:8.

 Reto enggau Cornelia, sepasang laki bini ke datai ari Switzerland. Seduai iya sanggup idup enggau penumbas iya ngambi ulih nulung ba menua bukai. Sida nusi cherita diri, “Setaun sebedau kami pindah, kami ngagai Bulgaria pengelama seminggu, ngambi ngasaika dulu pengidup ba dia. Kami berandau enggau sepasang pengerintis seberai tasik ke udah lama nulung dia, lalu sida meri kami beberapa iti lalau ti ngena.” Udah nya, Reto enggau Cornelia nitihka lalau ke diberi nya. Diatu, seduai iya udah nulung ba Bulgaria lebih ari 20 taun.

 Bala menyadi ke ka nulung ba menua bukai, patut nelebaka diri enggau endur ti baru. Tu enda senang. (Surat Kereja Rasul 16:9, 10; 1 Korint 9:19-23) Mayuh ari sida ngasaika, utai ti pemadu tusah nya belajarka jaku baru. Ku Luca, ke kala disebut tadi, “Kami berasai gaga enti ulih meri komen ke datai ari ati lebuh begempuru. Tang maya keterubah iya belajar, tusah ba kami nyediaka saut ngena jaku Bulgaria, indah saut ti senang aja! Kami nyau baka anak mit. Nyentukka, mayuh ari komen anak mit jauh manah agi ari komen kami.”

 Ravil ke datai ari Jerman mega madah, “Belajarka jaku bukai nya ngasuh lelak. Tang aku patut seruran ingat: ‘Enti jaku ke dikena aku salah, anang meh kelalu mejal diri, tang uji bejenaka enggau diri empu.’ Udah nya, taja aku napi mayuh macham penanggul, aku enda kelalu irauka nya. Tang aku nyadika nya peluang, tauka ngumbai nya meh sebagi ari pemeri aku ba sembah ke Jehovah.

 Linda ke disebut tadi mega nyeritaka, “Aku lubah belajarka jaku baru. Ba aku, jaku Bulgaria tusah amat, nyentukka beberapa kali aku ka ngetu aja. Enti kitai enda ulih berandau enggau orang, tauka enda nemu nama utai ku orang, kitai tentu berasai puang. Ngambika kaul aku enggau Jehovah mengkang rapat, aku nyediaka saut, enggau belajarka Bup Kudus kediri empu ngena jaku Swedish. Nyau kelama, ari bantu bala menyadi, aku nemu jaku Bulgaria.

 Penanggul ke bukai nya, lelengauka menua diri. Bala menyadi ke pindah ngagai menua bukai, patut beserara ari diri sebilik sereta kaban rapat sida ba menua asal. Eva, ke pindah ngagai Bulgaria madah, “Keterubah nya, aku berasai puang. Nyadi, aku enggau laki aku selalu begiga ke kaban enggau diri sebilik kami ba menua asal kami. Kami mega enggau naka ulih bekaban enggau orang ke ba ditu.”

 Robert enggau Liana ke datai ari Switzerland, napi penanggul ke bukai. Ku sida, “Kami tusah ke belajar enggau nelebaka diri enggau jaku sereta adat orang ditu. Kami mega bedau besedia napi musin chelap ti balat ba ditu.” Tang runding sida amat manah, lalu nulung enggau tetap ati ba Bulgaria pengelama 14 taun.

 Lilly ke nulung ba menua bukai, meransang bala menyadi ngereja utai ti sama. Ku iya, “Enti aku enda nulung ba menua bukai, aku engka enda ngasaika tulung Jehovah baka ke diasaika aku ba ditu. Nambahka nya, diatu aku beberatka agi pengawa ka nulung orang bukai. Asil iya, aku rapat agi enggau Jehovah, gaga agi ati, sereta puas.” Ravil, iya nya laki iya mega madahka utai ti sama. Iya madahka, “Tu meh peneleba ti pemadu manah ba pengidup kami. Kami bepeluang ngelala bala menyadi ti ransing ke datai ari mayuh menua bukai. Sida amat landik ngajar pemendar Bup Kudus ngagai orang bukai. Aku belajarka mayuh utai ari sida,”

 Ketegal mayuh bala menyadi ke sanggup nulung, Berita Manah Petara ulih “ditusui di serata dunya.” (Matthew 24:14) Bala menyadi ke pindah ngagai Bulgaria, udah ngasaika chara Jehovah ngamatka pengingin sida, lalu ngemujurka pelan sida.—Masmur 20:1-4.