“Nadai leka jaku ti ulih ngambarka pengaga ati lebuh gawa ba endur ke begunaka bantu!” Nya meh asai ati Joshua ari Amerika Selatan. Iya kala gawa ba Guyana, siti menua ba Amerika Serikat. Mayuh Saksi mega kala gawa dia, lalu ngasaika pengaga ati, laban mayuh orang deka belajar pasal Jehovah. a Nama ulih dipelajar kitai pasal bala menyadi ke deka mindah ngagai menua bukai, ketegal deka nulung ba pengawa nginjil? Enti nuan deka gawa ba menua bukai, baka ni utai ke diasaika sida ulih nulung nuan?

 Linel datai ari Amerika Serikat. Iya kala nginjil ba endur ti jarang dilawa ba menua iya empu, sebedau iya pindah ngagai Guyana. Iya madahka, “Bisi 20 iku bala menyadi diasuh nginjil ba endur ti jauh ari bandar ba Virgina Barat. Peneleba nya udah ngubah pengidup aku! Aku amat rindu enggau pengawa nginjil sereta begulai enggau bala menyadi sepemanjai dua minggu ba endur nya. Ketegal nya, aku diperansang deka gawa ke Jehovah enggau naka ulih.”

 Sepasang laki bini ke benama Garth enggau Erica deka mindah ngagai endur bukai. Udah nya seduai iya mutuska deka pindah ngagai Guyana. Nama kebuah? Erica nerangka, “Kami duai laki aku ngelala sepasang laki bini ke udah pindah kia. Pengeransing sereta pengerindu ke diayanka sida meransang kami mega deka pindah kia.” Erica enggau Garth gawa dia pengelama tiga taun, lalu sida amat rinduka pengawa nya. Garth madahka, “Kami udah ngasaika pemanah iya gawa ba endur bukai.” Udah nya, sida enggau Sekula Gilead, lalu diatu ba Bolivia.

 Prinsip Bup Kudus meransang kitai idup enggau pengumbas iya. (Hebrew 13:5) Kitai mega diperansang berunding enggau manah, lalu nemu nama asil ari pemutus ke digaga. (Luke 14:26-33) Tentu, pemutus ke deka mindah ngagai menua bukai nya amat berat! Garth nulis, “Erica enggau aku idup enggau pengumbas iya sebedau kami pindah ngagai Guyana. Kami nyual bisnis kami, rumah, enggau semua utai ke enda diguna agi. Pengawa tu begunaka beberapa taun, tang kami selalu deka ingatka pengingin kami deka gawa ba Guyana, lalu selalu ngabas endur nya ninting taun.”

 Siti da agi utai ke patut diperundingka, iya nya belanja. Ba sekeda menua, bala menyadi ke ari menua bukai ulih gawa ba endur nya. Bisi mega sekeda menyadi ulih terus gawa ngena komputer sida. Iya ke bukai engka patut pulai ke menua sida, ngambi ulih gawa dalam sesiti timpuh. Sepasang laki bini ke benama Paul enggau Sinead pulai ke Ireland sekali setaun laban sida patut kereja. Ketegal atur tu, sida ulih gawa ba Guyana pengelama 18 taun, nyentukka anak indu sida pan udah manggai tujuh taun.

 Masmur 37:5 madahka, ‘Serahka pengidup nuan ngagai Jehovah. Panggaika pengarap nuan ba Iya, lalu Iya deka nulung nuan.’ Christopher enggau Lorissa, ari Amerika Serikat selalu besampi pasal juluk ati sida deka gawa ba menua bukai. Sida mega selalu berandau pasal, utai ke patut dikereja enti sida pindah, lalu nulis lis semua pemanah tauka penekul pemutus ke deka digaga maya sida belajarka Bup Kudus ba diri sebilik. Sida deka mindah ngagai Guyana laban menua nya ngena bansa jaku English, lalu sida senang agi ngena bansa jaku nya.

 Udah nya sida ngaga pemutus bepelasarka prinsip ba Jaku Dalam 15:22, “Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan.” Sida nulis surat ngagai pampang opis ke ngemataka pengawa Saksi-Saksi Jehovah ba Guyana. b Sida madah ngagai pampang opis pasal chara pengidup sida, lalu madahka juluk ati sida deka gawa ba dia. Pia mega, sida terus nanya penerang pasal chara berubat, gaya hari, sereta adat orang ba menua nya. Pampang opis malas surat sida, lalu meri sida penerang pasal tuai gempuru ke ulih digiga sida maya sida deka pindah.

 Linel, ke disebut tadi, diatu nyadi tuai ti ngabas ba Guyana. Iya mega nitihka ajar Jaku Dalam 15:22 sebedau iya pindah kia. Iya madahka, “Kelimpah ari nyimpan duit, aku mega berandau enggau orang ke kala gawa ba endur bukai. Aku berandauka pelan tu enggau diri sebilik, tuai gempuru ba menua aku, pia mega enggau tuai ti ngabas. Aku mega macha semua penerang ke bisi ba litaricha kitai, pasal gawa ba endur ti beguna mayuh bantu di menua bukai.”

 Mayuh ari bala menyadi ke deka gawa ba endur bukai, ngaga atur ngelawa endur nya dulu. Nya chara ti manah. Sepasang laki bini ke benama Joseph enggau Christina madah, “Kali keterubah kami ngagai Guyana, kami diau dia pengelama tiga bulan. Peneleba nya, nulung kami nemu pasal chara pengidup ba endur nya. Udah nya, kami pulai baru ngagai menua asal, lalu ngaga atur deka pindah ngagai Guyana.”

 Bala menyadi gawa ke Jehovah ba endur bukai, patut ngembuan ulah ti deka nyerahka diri sereta deka ngaga ubah nitihka chara pengidup orang ba endur nya. Ngambika chunto, ba menua ti angat, deka tetemuka mayuh bengkah indu utai ba rumah sida. Joshua ke kala disebut tadi madahka, “Aku enda biasa meda mayuh indu utai, lalu indu utai ba Guyana nyau bebesai! Tang nyau kelama, aku pan nyadi biasa enggau semua indu utai tu. Aku nyau nemu, enti aku meresi rumah, indu utai kurang agi deka datai. Nya alai, aku suah agi betuchika pinggai mangkuk, muai sampah, sereta meresi rumah.”

 Ngaga ubah mega nyengkaum nguji pemakai ti baru, sereta belajar chara manduk pemakai nya. Joshua ngenang baru, “Aku enggau seiku menyadi lelaki ke diau serumah enggau aku, belajar manduk ari menyadi indu ba menua nya. Pengudah kami belajar manduk, kami pan mai beberapa iku menyadi ari eklisia makai begulai. Tu meri kami peluang ngelala pangan diri, sereta ngerapatka kaul kami.”

 Bekaul enggau adat ba menua nya, Paul enggau Kathleen ngingat baru, “Kami patut nerima standard orang ba menua nya, sereta chara begari ti ngena ba gaya hari ti angat. Semua tu peneleba ti baru ba kami, nya kebuah kami patut baruh ati sereta deka ngaga ubah. Asal aja nya enda ngelanggar prinsip Bup Kudus. Maya kami nitihka adat ba menua nya, kaul kami enggau menyadi ba eklisia pan rapat agi, lalu pengawa nginjil kami mega senang agi digaga.”

 Joseph enggau Christina madah, “Berekat ke diterima kami jauh besai agi ari penguji sereta penanggul ke ditapi kami. Peneleba ti baru tu, nulung kami nemu nama utai ke patut dikemeratka. Utai ke kala dikumbai kami amat beguna suba, diatu enda kelalu beguna agi. Kami diperansang deka terus gawa ke Jehovah enggau naka ulih. Kami amat puas enggau pengidup kami.” Tentu mayuh menyadi mega ngasaika utai ti sama baka sida.

 Erica ke disebut tadi madah, “Kami belajar reti andalka Jehovah enggau pengabis ati maya gawa ke Iya ba endur bukai. Kami meda chara Jehovah nulung kami enggau chara ti enda kala diasaika kami sebedau tu. Nengah semua peneleba ti baru tu, tikah kami mega nyadi tegap agi.”