Kena taun 2017, dua belas iku Saksi-Saksi Jehovah ngena bot ari Mosquito (Miskito) ba menua Nicaragua. Nama bot sida, Sturi Yamni. Seiku ari sida ke benama Stephen madah: “Juluk ati kami deka meransang raban ti mit Saksi-Saksi Jehovah, ke diau ba endur ke tusah dilawa, lalu nginjil ba endur sida.”

 Dua belas iku Saksi mupuk ari Pearl Lagoon, nuju ngagai Río Grande de Matagalpa. Penyauh tu kira-kira 200 kilometer. Sida enda nemu, nama bot sida reti iya, “Berita manah” dalam bansa jaku Miskito. Reti tu amat spesial ngagai orang ke diau semak sungai nya. Pengudah 12 jam bejalai, enda nyengkaum maya ngetu malam, bala Saksi datai ba endur ke dituju, iya nya komuniti La Cruz de Río Grande. Enam iku Saksi Jehovah ba endur nya gaga ati ngelaluka penatai menyadi Kristian sida.

 Malam nya bisi penusah ti balat nyadi. Ribut ti balat sereta ujan bangat, ngujungka ai niki ba Río Grande de Matagalpa. Dalam beberapa jam aja, ai sungai ngampuhka mayuh endur. Lalu majak niki pengelama dua hari. Palan Gempuru enggau mayuh rumah ba La Cruz mega tama ai. Bala menyadi ke datai nulung menyadi ke ari endur nya empu pansut ari rumah sida. Mayuh ari sida bemalam dua malam ba rumah dua tingkat ke enggi seiku menyadi.

 Malam ti ketiga, Datuk Bandar La Cruz datai ngelawa bala Saksi ke minta bantu. Ketegal semina bot Sturi Yamni aja ke pemadu tan ngelaban deras ai, Datuk Bandar minta tulung bala Saksi, nyadung utai ke beguna ngagai mansa ke kena penusah tu. Saksi-Saksi Jehova amat gaga ati nulung.

 Pagi siti, tiga iku Saksi begulai enggau tim penyelamat. Ku Stephen madah: “Diatu ai sungai benung deras. Nyentukka ulih meda kayu besai melepu, pusar ai, lalu peneras ai lebih ari 18 kilometer per jam. Taja pan tu enda senang, tang bot bala Saksi ulih meri tulung ngagai tiga komuniti.

 Tiga iku ari Saksi ke tadi, ngambi peluang ngelantangka ati sida ke kena penusah nya. Sida meri majalah Peratika! ke betajuk: “When Disaster Strikes—Steps That Can Save Lives.”

 Orang ke ba komuniti nya, amat beterima kasih ke bantu sereta peransang ari Bup Kudus ke diberi Saksi. Sekeda ari orang ba kampung nya madah: “Sida sanggup nulung ba maya ti tusah. Sida ngayanka pengerindu ti bendar.” Pengudah meda pemendar bala Saksi meri tulung ngagai pangan diri enggau orang bukai, mayuh orang ba kampung nya deka ningaka pesan ari Bup Kudus.