Ed enggau bini iya Jennie, keterubah kali nginjil ngena talipun ba taun 2010. a Ku Jennie, “Aku amat enda rinduka pengawa tu, lalu aku enggai agi ngereja tu!” Ed mega ngasaika utai ti sama. Ku iya madah, “Aku enda rindu nerima talipun ari sida ke bejual, nyadi aku ulih ngambarka baka ni asai nya enti kitai nginjil ngena talipun.”

 Maya pandemik COVID-19 berengkah, Saksi-Saksi Jehovah ngetu nginjil ngena chara ari rumah ke rumah. Tang sida deka ngasika pesan Jesus ke ngasuh ngerembaika Berita Manah, nya alai sida terus enggau pengawa nginjil. Enda ngira nya enggau chara betulis surat tauka nginjil ngena talipun. (Matthew 24:14; 28:19, 20) Ba maya ti sama, gempuru, nyengkaum gempuru ke pengawa nginjil, dipejalaika nengah konferen video. Taja pan tu tusah ba Ed, tang sekali agi iya meranika diri nguji nginjil ngena talipun. Nama asai ati iya lebuh iya keterubah kali nginjil ngena talipun baru? Ku Ed madah, “Aku amat kesal ati lalu aku besampi minta tulung! Udah nya aku terus betalipun, lalu nya meh maya aku bekelala enggau Tyrone.” b

 Tyrone enggau bini iya Edith, diau ba endur ke jauh ari bandar iya nya ba Kentucky, Amerika Serikat. Tyrone beumur 83 taun, lalu mata iya enda tentu ulih meda. Taja pia, iya tetap deka belajarka Bup Kudus enggau Ed. Indah iya sanggup ngena kanta pembesar ngambika ulih macha utai ke dipelajarka iya. Iya mega berengkah belajarka Bup Kudus enggau tetap nengah talipun.

 Dalam sebulan udah nya, Tyrone enggau Edith berengkah datai begempuru enggau raban gempuru ke alai sida diau ngena konferen video. Tang, ketegal sida nadai line Internet, sida begempuru nengah talipun. Nama ke ngasuh Edith bisi minat pasal pemendar?

 Maya Ed enggau Jennie belajar enggau Tyrone, ba belakang ulih ninga Edith benung nulung Tyrone maya iya meri saut sereta ngiga ayat Bup Kudus. Tang iya empu nadai madahka diri deka belajarka Bup Kudus kediri empu. Ku Jennie, “Kami ulih ngasaika Edith tusah ati pasal sesiti utai ari bunyi nyawa iya. Tang kami duai enda nemu nama kebuah nya.”

 Bisi sekali, Jennie ngasaika iya patut nanya Edith. Lebuh iya ngasaika nya maya ti ngena, iya pan nanya Tyrone. Ku iya nanya, “Tyrone, aku bisi ninga bunyi nyawa bini nuan ba belakang, ulih aku minta iya macha ayat tauka bekunsika penemu iya?”

 Sekejap udah nya, Edith bejaku nengah talipun. Enggau bunyi nyawa ti nelap, Edith madah, “Aku endang deka berandau enggau nuan. Aku siku ari Saksi-Saksi Jehovah. Aku udah enda aktif lebih ari 40 taun.”

 Jennie amat tekenyit, lalu ku iya, “Nuan nya menyadi aku!” Seduai iya pan belabuh nyabak.

 Enda lama udah nya, Ed meri Edith siti brosur ke betajuk Return to Jehovah. Beberapa minggu pengudah nya, Ed enggau Jennie beratika Edith berubah manah agi. Ku Ed madahka, “Keterubah, bunyi nyawa iya penuh enggau penusah ati. Tang diatu, bunyi nyawa iya berupai gaga ati.” Edith berengkah nyemakka diri ngagai Jehovah baru, lalu sekali agi, iya nyadi siku penginjil Berita Manah ti gaga ati. Laki iya dibaptisa nyadi siku ari Saksi-Saksi Jehovah kena bulan Julai 2022.

 Maya Ed ngenang baru asai ati iya pasal nginjil ngena talipun, iya mega ngingatka baru randau iya enggau Tyrone. Pengudah Ed macha John 6:44 ngagai iya, lalu nerangka Jehovah meh ke mai orang ngagai pemendar. Tyrone mega besetuju, lalu ku iya, “Aku endang nganti talipun ari nuan.” Jennie mega gaga ati laban iya enggau laki iya meranika diri nginjil ngena talipun. Ku iya, “Lebuh kitai nguji ngereja sesiti utai ke Jehovah taja nya enda senang, Iya tentu merekatka usaha kitai.”