Yanmei, seiku Saksi di Asia, nulung seiku indu ti buta ke benama Mingjie meraka jalai. a Mingjie madahka: “Terima kasih. Awakka Petara merekatka nuan!” Yanmei lalu nanya Mingjie enti iya deka betemu baru kena berandauka Bup Kudus. Mingjie udah besampi ninting hari minta Petara ngiring iya ngagai gerempung Petara ti bendar. Nama kebuah iya minta tu?

 Kena taun 2008, Mingjie dibai seiku kaban ti sama buta datai ngagai siti gerija ke orang ti bisi penimpang. Pengudah ningaka program nya, Mingjie nanya paderi nya, nama bup ke suah disebut iya tadi. Paderi nyaut Mingjie, nya meh Bup Kudus, ti ngembuan jaku Petara ti bendar. Mingjie bebendar ingin deka macha bup nya. Nya alai, iya lalu meli siti salin Bup Kudus dalam Braille China. Bup Kudus nya amat besai nyentukka iya bebagi 32, lalu iya macha nya abis dalam urung enam bulan. Seraya Mingjie majak macha Bup Kudus nya, iya lalu sedar, ajar pasal Triniti ti diajar ba gerija iya nya salah, lalu pia mega, Petara bisi nama, iya nya, Jehovah.

 Nyau kelama, Mingjie asa ati enggau ulah bala gerija iya. Iya nemu, jalai pengidup sida enda sejalai enggau utai ke dipelajar iya ari Bup Kudus. Ngambika chunto, lebuh pemakai disua ba gerija, laluh pemakai diberi ke sida ke buta, tang sida ke bukai diberi pemakai ti baru. Pengawa ti enda lurus tu ngemediska ati Mingjie, lalu iya berengkah begigaka gerija baru. Nya meh kebuah mingjie besampi minta Petara ngiring iya ngagai gerempung Iya ti bendar.

 Pemanah Yanmei narit ati Mingjie, lalu iya besetuju deka belajarka Bup Kudus. Nyau kelama, Mingjie lalu datai gempuru Saksi-Saksi Jehovah. Ku Mingjie ngenang: “Aku deka seruran ingatka gempuru keterubah nya. Bala menyadi lelaki enggau indu nyambut penatai aku enggau amat manah. Nya amat negu ati aku. Taja pan aku buta, tang ba dia, aku ngasaika pengerindu ti enda bepilih mata.”

 Mingjie ngaga mayuh pemansang lalu berengkah datai gempuru enggau bejarit. Iya amat rindu belagu lagu Perintah Petara, tang nya amat tusah laban nadai bup lagu dalam Braille China ke ulih dibacha iya. Nya alai, iya minta tulung ari bala menyadi, lalu iya empu ngaga bup lagu dalam Braille China. Iya ngena 22 jam kena nembuka semua 151 iti lagu! Kena bulan April 2018 Mingjie nyadi penginjil, lalu tiap bulan iya nginjil pengelama kira-kira 30 jam.

 Ngambika nulung Mingjie besedia deka dibaptisa, Yanmei ngerikut audio semua tanya sereta ayat Bup Kudus ke bisi ba bup Organized to Do Jehovah’s Will. Kena bulan Julai 2018, Mingjie dibaptisa. Ku iya madah “Pengerindu ti diayanka bala menyadi maya konvensyen nya amat negu ati aku. Aku balat gaga ati nyentukka ai mata labuh, laban baru diatu aku sebagi ari gerempung Petara ti bendar.” (John 13:34, 35) Diatu Mingjie nyadi pengerintis laban iya deka ngayanka pemesai pengerindu ke udah diasaika iya empu ngagai orang bukai.