Bisi sekali, seiku indu ke benama Eliso benung ngajar Bup Kudus ngagai seiku indu. Eliso nya seiku ari Saksi-Saksi Jehovah. Lebuh seduai iya benung belajar, enda disadang seiku tuai pengarap enggau bini iya datai. Eliso kala ninga tuai pengarap enggau bini iya agi balat tusah ati, laban kengka anak lelaki seduai iya sakit lalu ngujungka iya nadai.

 Maya Eliso ngayanka penyiru, tuai pengarap enggau bini iya nyau sesikuk nyabak. Udah nya tuai pengarap nya madahka, “Aku enda nemu nama kebuah Petara ngasuh utai tu nyadi! Sanggup Iya ngambi kengka anak ke dikemisika aku? Udah 28 taun aku nyembah Iya, tang tu chara Iya malas aku! Nama kebuah Petara sanggup munuh anak aku?”

 Eliso pan nerangka ngagai seduai iya. Ukai Petara ke munuh anak seduai iya. Iya mega nerang pasal tebus, pengangkat ari pemati, sereta kebuah Petara ngemendarka utai jai nya nyadi. Pengudah ninga penerang nya, seduai iya madahka Eliso, sampi seduai iya udah bisi saut.

 Ba minggu siti, tuai pengarap nya enggau bini iya datai baru lalu enggau belajarka Bup Kudus. Maya nya, Eliso sereta pemelajar iya benung belajarka topik “Peluang Ngagai Orang ti Dikesayau ke Udah Mati” ba bup Nama Utai ti Bendar Diajar Bup Kudus. Seduai iya melaki-bini amat rindu enggau belajarka Bup Kudus.

 Seduai iya mega enggau konvensyen spesial Saksi-Saksi Jehovah ba Tbilisi, Georgia. Seduai iya amat rindu meda pengerindu ke diayanka bala menyadi sereta penyerakup ke dikembuan bala Saksi. Ari suba, sida bebendar dekaka semua orang ba gerija baka nya, tang enda kala mujur.