Seiku lelaki datai ngagai menua Norway ba taun 2011 laban nyadi pelari ari menua Eritrea. Lebuh iya betemu enggau Saksi-Saksi Jehovah, iya madahka diri kala betemu enggau sida ba menua asal iya. Iya madahka, lebuh iya enggau pengawa nyadi soldadu dia, iya meda bala Saksi Jehovah ke dijil ketegal pengarap, nulak pengawa nyadi soldadu taja pan ditekan sereta diansak enggau chara ti kasar.

 Tang enda memukai, bisi utai ke nyadi ba pengidup iya ke ngujungka iya empu ditangkap lalu dijil. Ba rumah jil, iya betemu enggau tiga iku Saksi Jehovah ke benama Paulos Eyasu, Negede Teklemariam, enggau Isaac Mogos. Sida tiga dijil kenyau ari taun 1994 ketegal pengarap.

 Lebuh ba rumah jil, iya empu meda Saksi-Saksi Jehovah nitihka standard Bup Kudus ke diajar sida ngagai orang. Iya beratika pengelurus sida, lalu sida indah deka bekunsika pemakai sida enggau orang bukai ke dijil. Iya mega bisi beratika Saksi Jehovah ke dijil, belajarka Bup Kudus ninting hari lalu mai sapa-sapa sama enggau. Ke amat iya, sida ulih dilepaska ari jil. Sida semina patut nyain siti surat ke madahka diri enggai nyembah Jehovah agi, tang sida enggai.

 Iya amat alit ati enggau bala menyadi Kristian ke lelaki tu nyentukka lebuh iya datai ba Norway, iya deka nemu kebuah Saksi-Saksi Jehovah ngembuan pengarap ti chukup tegap. Nya kebuah, lebuh bala Saksi Jehovah datai betemu enggau iya, iya tekala nya berengkah belajarka Bup Kudus lalu sama enggau gempuru Kristian Saksi Jehovah.

 Ba bulan September 2018, iya dibaptisa nyadi seiku ari Saksi-Saksi Jehovah. Diatu, iya ngena sebarang peluang ke bisi kena ngiga orang ari menua Eritrea enggau Sudan ngambika sida pan ulih belajarka Bup Kudus lalu ngembuan pengarap ti tegap.