Artur, seiku tuai ti ngabas ba menua Armenia, benung ngabas siti eklisia Saksi-Saksi Jehovah. Iya lalu nemu, eklisia tu bedau agi berengkah enggau pengawa nginjil ba endur orang mayuh. Pengawa tu ngena troli litaricha ke disimpan enggau litaricha Bup Kudus ke deka dipandangka ngagai orang. Kena meransang sida ngereja pengawa nginjil ke baka tu, Artur seduai bini iya, Anna, enggau seiku agi Saksi Jehovah ke benama Jirayr, ngeletak troli litaricha ba endur mayuh orang ke mansa.

 Orang ke mansa tekala nya nunjukka minat lalu berengkah ngambi litaricha. Tang sida ke nyakal pan bisi beratika troli litaricha nya. Dua iku paderi mansang ngagai troli litaricha nya. Enda memukai, seiku ari seduai nendang troli nya. Udah nya, iya nampar Artur ke ngujungka cheremin mata iya labuh. Artur, Anna, enggau Jirayr nguji ngasuh paderi nya sabar, tang enda ulih. Dua iku paderi nya ngindik troli litaricha nya, lalu semua litaricha nya ngachir sebelah nya. Lalu, dua iku paderi nya bejaku kasar ngagai sida tiga, ngemba sida, udah nya seduai mupuk ari endur nya.

 Artur, Anna, enggau Jirayr ngagai balai polis endur nya lalu ngaga riput. Sida nerangka utai ti nyadi lalu bejaku enda lama pasal Bup Kudus ngagai sida ke gawa ba balai polis nya. Udah nya, sida dibai ngagai opis pegawai polis ti tinggi agi pangkat. Keterubah iya, pegawai nya semina deka nemu nama ke nyadi. Tang, lebuh iya meda tubuh Artur ke bebingkul, lalu enda malas lebuh ditampar, pegawai nya lalu badu nanya pasal kes nya. Iya deka nemu mayuh agi pasal pengarap Saksi-Saksi Jehovah. Tu ngujungka sida berandau pengelama empat jam! Pegawai nya amat alit ati enggau utai ke didinga iya, lalu iya madah: “Manah amat pengarap tu! Ka ga aku enggau!”

 Hari siti, lebuh Artur datai baru ngagai pengawa nginjil ba endur orang mayuh, seiku lelaki tuai ke bisi meda utai ke nyadi sehari nya, datai mansang ngagai iya. Lelaki nya muji Artur laban iya sabar lalu enda ngelaban dua iku paderi nya. Iya mega madah, utai ke dipeda iya ngasuh iya enda ulih bebasaka paderi nya agi.

 Lemai nya, pegawai polis ke tinggi agi pangkat nya, ngasuh Artur datai baru ngagai balai polis, lalu iya nanya mayuh agi utai pasal Bup Kudus, ukai pasal kes nya. Dua iku polis ke bukai mega enggau randau nya.

 Hari siti, Artur sekali agi ngabas pegawai polis ke tinggi agi pangkat nya. Tang sekali tu, iya nunjukka sekeda video kitai ke bepelasarka Bup Kudus. Pegawai nya ngasuh polis ke bukai sama enggau meda video nya.

 Ketegal ulah dua iku paderi nya ti jai, mayuh polis bisi peluang ninga berita manah keterubah iya. Tu ngasuh piak polis ngembuan runding ti manah pasal Saksi-Saksi Jehovah.