Rachel diau ba Republik Dominican. Ku iya: “Lebuh aku ada apai indai aku nyembah Jehovah. Tang lebuh aku beumur tujuh taun apai aku badu begulai enggau sida ke nyembah Jehovah sereta balat nyakal pengarap tu. Utai ke dikereja iya ngasuh aku tusah nyembah Jehovah. Ngambika chunto, kekadang iya madahka diri deka meri aku talipun, kad kredit, tauka bejalai ngagai Disneyland enti aku badu nyembah Jehovah. Kekadang iya mukut aku kena nguji ngasuh aku badu nyembah Jehovah. Iya ngumbai enti aku enda ulih bejaku tauka bejalai ketegal dikemediska iya, aku enda ulih datai ke gempuru. Tang utai nya enda nagang aku. Aku seruran keran deka datai gempuru.”

 “Apai aku bejimat enda mukut aku lebuh indai aku bisi ba dia. Ku iya, enti aku nguji madahka indai pasal iya mukut aku, iya deka ngemediska indai. Apai aku madahka lebam ke bisi ba tubuh aku nya ketegal iya ngelatih aku chara ngetanka diri.”

 “Maya nya aku kelalu biak sereta takutka apai kena madahka indai pasal utai ke nyadi. Nyadi aku madahka semua utai ngagai Jehovah. Belakang rumah kami ba Maryland, Amerika Serikat, bisi babas. Aku seruran bejalai ba dia. Ba dia bisi sepun kayu oak ke amat manah. Aku niki pun kayu nya lalu ba dia meh aku selalu bejaku enggau Jehovah. Aku besampi pasal asai ati aku sereta utai ke deka dikereja aku ngagai Iya ila—nya semina enti Iya nulung aku terus idup kena ngereja utai nya. Aku mega madahka Iya pasal utai ke deka digaga aku ba dunya baru ila, ruang bilik ke deka dikembuan aku sereta pengelikun enggau pengelantang ke deka diasaika aku lalu enda ibuh asai pedis tauka takut.”

 “Ninting kali apai aku nguji nagang aku ari nyembah Jehovah, aku agi ulih ngasai Jehovah seruran ngeringka sereta ngelantangka aku. Petara nulung aku mengkang taluk sereta kering.”

 “Aku dibaptisa lebuh aku beumur sepuluh taun lalu dua taun pengudah nya aku berengkah ngerintis. Keterubah, apai aku enda nemu pasal utai ke digaga aku nya. Tang lebuh iya nemu, iya mukut aku lalu rang aku tebelingkah.”

 “Sekeda orang madah aku kelalu biak ngerintis lalu sida irau enti aku enda mereti ni pemerat pemutus ke digaga aku. Tang aku meda mayuh bala Saksi biak ke diau semak enggau aku enda entu befokus ngagai pengawa ke Jehovah. Sida rindu ngelantangka diri lalu ngagai parti. Pengidup sida baka ke nyamai. Kekadang aku ka ngereja utai ke digaga sida. Aku berunding, ‘Patutka aku ngetu nginjil lalu ngelantangka diri baka nembiak ke serambau enggau aku?’ Tang ninting kali aku berasai baka nya aku besampi ngagai Jehovah.”

 “Lebuh aku beumur 15 taun bisi orang ngiga aku kena nyadi model, lalu kompeni nya amat tebilang. Sida deka meri aku gaji ti besai enti aku deka gawa enggau sida ba Milan, Itali. Aku gaga ati lebuh sida madahka aku ulih nyadi model, gambar aku ayan ba majalah lalu aku ulih ngena gari ti mar ba fashion show. Aku udah nyadi pengerintis nyauka tiga taun lalu aku ngumbai, ‘Enti aku nerima kereja tu aku ulih melanja diri lalu terus ngerintis betaun-taun!’ Apai aku udah ninggalka kami, nyadi aku mega berunding, ‘Enggau kereja tu aku mega ulih melanja indai.’”

 “Aku besampi pasal utai tu. Aku berandau enggau indai aku ke betaun-taun udah ngerintis, lalu aku mega berandau enggau siku tuai gempuru ke dipebasa sereta dikesayauka aku. Baka biasa, aku ngagai pun kayu nya lalu besampi enggau mayuh agi. Jehovah nyaut sampi aku nengah tuai gempuru nya lebuh iya bekunsika ayat Bup Kudus enggau aku. Ayat nya Pengajar 5:4 ti madahka: ‘Lebuh nuan ngaga semaya enggau Petara, kamatka meh semaya nya. Kereja aja utai ti disemaya nuan.’ Aku udah besemaya deka nyembah Jehovah enggau pengabis ati, lalu aku irau enti kereja tu ulih ngachau kaul aku enggau Jehovah. Nyadi aku ngaga pemutus deka nulak kereja nya.”

 “Taja pan napi mayuh utai ke enda manah lebuh aku agi biak tang aku agi ulih mengkang idup! Aku bisi laki ke benama Jaser lalu siku anak lelaki ke benama Connor beumur semilan taun. Aku amat gaga ati! Jaser siku tuai gempuru lalu Connor nyadi penginjil ke bedau dibaptisa. Aku udah gawa penuh jam ke Jehovah nyauka 27 taun.”

 “Aku seruran berunding pasal randau aku ti panjai enggau Jehovah lebuh aku niki pun kayu ke bisi ba belakang rumah kami. Aku bebendar minta tulung ari Jehovah lalu Iya udah nyaut sampi nya. Iya udah ngeringka, ngelantangka sereta ngiring aku. Sepemanjai pengidup aku Jehovah udah mayuh kali nunjuk ngagai aku, Iya apai ti pemadu manah. Aku amat gaga ati laban udah milih deka nyembah Jehovah enggau pengabis ati. Nya pemutus ke pemadu manah ke kala digaga aku.”