Nama Reti Tanda Segitiga ke Bekala Ungu?
Seiku indu ke benama Maud nya, Saksi-Saksi Jehovah ke diau ba Perancis. Iya gawa ba siti sekula, ti nulung bala anak mit ke bisi penimpang. Bedau lama ti udah, bala murid ba siti ari kelas di sekula nya belajar pasal jeman Holocaust (iya nya jeman diperinsa bala Nazi) enggau kem alai Nazi ngetanka orang. Sida belajar, orang ke ditan ba kem Nazi tu patut ngena uniform ke bisi tanda. Tanda ke dilekatka ba baju sida nya, segitiga sereta bekala ungu. Tu nandaka sida orang tangkap ba kem nya.
Maud megai perengka ke dikena iya bekunsika penerang
Beberapa iku ari orang tangkap dia bekenaka uniform ti bisi tanda tu. Maya berandau pasal tanda tu, pengajar nya madahka, “Asai aku, tu nandaka orang tangkap nya homoseksual.” Pengudah kelas nya abis, Maud datai semak ngagai pengajar nya, lalu nerangka, bala Nazi ngelekatka tanda segitiga bekala ungu tu ngagai bala Saksi-Saksi Jehovah. a Iya mega minta pemendar, sekalika iya ulih mai bup sereta video ke nerangka topik tu. Pengajar nya setuju lalu ngasuh Maud nerangka penerang nya ngagai bala murid.
Ba kelas bukai, pan bisi berandauka topik ti sama. Pengajar sida ngena carta kena nerangka tanda ti dikena bala orang jil. Carta nya enggau terang nunjukka tanda segitiga bekala ungu nya dikena bala Saksi-Saksi Jehovah. Pengudah kelas sida ngetu, Maud nanya ngagai pengajar nya, kati iya ulih mai beberapa iti bup sereta video berandauka topik tu. Pengajar nya mega setuju, lalu ngasuh Maud nerangka topik nya ngagai kelas.
Maud nyediaka penerang nya pengelama 15 minit ke kelas ti keterubah. Tang maya kelas nya deka belabuh, iya diberi awak pengelama sejam. Maud pan berengkah masang video pasal pemerinsa ke dikereja bala Nazi ngagai Saksi-Saksi Jehovah. Maya video nya ba begian Nazi ke nyerara 800 iku anak bala Saksi ari apai indai sida, Maud ngetuka video nya enda lama. Udah nya, iya macha peneleba ari tiga iku anak ke nyadi mansa pemerinsa nya. Maya video nya abis, Maud ngujungka penerang iya enggau macha siti surat. Surat nya ditulis kena taun 1940, ti ditulis Gerhard Steinacher, seiku Saksi Jehovah ba Australia ke beumur 19 taun. Iya nulis surat tu ngagai apai indai iya, beberapa jam sebedau iya diukum bunuh bala Nazi. b
Maud mega mantaika penerang ti sama ba kelas kedua. Ketegal pemerani Maud, dua iku pengajar nya tentu nyebut pasal Saksi-Saksi Jehovah maya ngajar pasal bala mansa ba kem Nazi.
a Ba Perang Dunya ke-2, Saksi-Saksi Jehovah ba Jerman, ti kala dikumbai bala Pelajar Bup Kudus, dijil ketegal enggai nyukung perintah Nazi.
b Gerhard Steinacher diukum mati ketegal enggai nyadi soldadu Jerman. Dalam surat nya, iya nulis, “Aku agi biak, lalu aku mengkang kering laban Petara meri aku pengering. Lalu nya meh utai ke dipinta aku.” Ba pagi siti, iya diukum mati. Ba batu nisan iya bisi nulis: “Iya mati ketegal deka ngemuliaka Petara.”
Nuan Engka Rindu Meda Tu
UTAI KE SUAH DITANYA
Nama Nyadi ngagai Saksi-Saksi Jehovah Lebuh Jeman Holocaust?
Nuan engka tekenyit lebuh meda saut iya.
SAUT NGAGAI TANYA PASAL BUP KUDUS
Nama Kebuah Petara Nejuka Holocaust Nyadi?
Mayuh orang nanya, nama kebuah Petara ti pengerindu nejuka mayuh pemerinsa nyadi. Bup Kudus ngembuan saut ti ngemuaska ati!