Duit pemeri ti diberi ngagai gerempung kami, dikena ba pengawa ke bekaul enggau pengarap kami , lalu pia mega ba pengawa meri bantu. Semua pengawa tu dipejalaika kena nyapai juluk ati kami, iya nya, nulung orang nyadi murid Jesus Kristus.—Matthew 28:19, 20.

 Nadai siku orang nyadi kaya ketegal duit pemeri. Bala tuai ba gerempung kami nadai kala nerima gaji, lalu tiap iku Saksi Jehovah nginjil ari rumah ke rumah enggau enda begaji. Sida ke gawa ba Pampang Opis enggau Indu Opis, nyengkaum sida ari Raban ti Ngiring, idup enggau penumbas iya lalu nadai nerima gaji.

•   Ngeluarka Litaricha: Tiap taun kami nyalin, nyelak, nganjung lalu nyadung bejuta iti Bup Kudus enggau litaricha Kristian ke bukai. Semua tu diberi enggau pechuma. Pia mega, litaricha dalam format digital ulih diterima enggau pechuma nengah laman web jw.org sereta aplikasi JW Library. Laman web enggau aplikasi nya pan nadai iklan ti ulih ngachau.

•   Pengawa Nirika enggau Ngaduka Bengunan: Di serata dunya, eklisia kami begempuru sereta begulai nyembah Petara ba bengunan ke didirika sereta diaduka kami. Kami mega nirika enggau nyeruri bengunan ke dikena Pampang Opis enggau opis penyalin. Mayuh ari pengawa tu dikereja bala sukarela. Tu nulung ngurangka belanja ke diguna kena nembuka sesiti projek.

•   Pengawa Opis: Duit pemeri dikena di serata dunya kena nyukung pengawa ngatur ti dikereja ba Indu Opis, Pampang Opis, Opis Penyalin, sereta sida ke bejalaika pengawa ngabas eklisia.

•   Pengawa Nginjil: Saksi-Saksi Jehovah nadai gaji lebuh nginjil tauka ngajar ‘jaku Petara’ (2 Korint 2:17) Taja pia, baka sekeda ari orang Kristian ba abad keterubah, sekeda penginjil dipilih lalu dilatih ngambika nginjil sereta ngajar enggau penuh jam. Sida diberi endur diau ti penumbas, sereta utai ti diguna ninting hari.—Pilipi 4:16, 17; 1 Timoti 5:17, 18.

•   Pengawa Ngajar: Gempuru besai enggau konvensyen kami dibelanja nengah duit pemeri. Kelimpah ari nya, kami ngeluarka mayuh program video enggau audio ke bepelasarka Bup Kudus. Kami mega nyediaka mayuh sekula kena ngelatih bala tuai gempuru enggau penginjil penuh jam ngambika sida landik agi ngereja pengawa sida.

•   Pengawa Meri Bantu Maya Penusah Ngenyit Nyadi: Lebuh orang ditinggang penusah ngenyit, kami nyediaka pemakai, ai irup enggau endur diau ke sida. Pengawa meri tulung tu ukai semina ke penguntung “orang ke sama pengarap” kami, tang pia mega ke sida ke ukai Saksi Jehovah.—Galatia 6:10.