Kesuah iya, tikah Saksi-Saksi Jehovah diatur enggau chara ti penumbas iya sereta bisi basa. Sida mega bisi ngatur pengawa makai enggau kaban belayan, sereta menyadi Kristian. a Kelia, Jesus empu mega kala datai ngagai pengawa tikah ba menua Kana.—John 2:1-11.

•  Baka ni pengawa tikah Saksi-Saksi Jehovah diatur?

•  Dini alai Saksi-Saksi Jehovah ngatur tikah?

•  Sapa ke dibai sida datai?

•  Gari baka ni ke patut dikena?

•  Kati ulih meri hadiah?

•  Kati bisi pengawa besatupka gelas?

•  Kati bisi pengawa naburka beras tauka duit ngagai pengantin?

•  Kati bisi nyediaka pemakai sereta ai irup?

•  Kati ulih masang musik, belagu, sereta betanda?

•  Kati Saksi-Saksi Jehovah bisi ngintu ulang taun kawin?

 Utai ke pemadu dikemeratka, cheramah tikah. Cheramah tu dikenataika seiku Saksi-Saksi Jehovah ke tegap ba pengarap pengelama 30 minit. Dalam cheramah tu, ngembuan lalau ari Bup Kudus, ti meri penguntung ngagai pengantin ngambi tikah seduai iya ulih lantang sereta tan belama iya.—Epesus 5:33.

 Ba sekeda menua, perintah ngemendarka seseiku Saksi Jehovah ngesahka tikah. Enti atur ke baka tu dikemendarka, kedua-dua pengantin nya ulih ngaga sumpah ba pengujung cheramah. Udah nya, seduai iya ulih betukar tinchin. Nya baru, Saksi Jehovah ke bisi hak ngesahka tikah nya tadi, ulih nyimpulka seduai iya jadi melaki-bini.

 Tang ba sekeda menua, orang ke deka jadi melaki-bini patut ngesahka tikah sida ba opis perintah. Enti atur iya baka tu, cheramah tikah patut digaga enda lama pengudah seduai iya nyain surat tikah. Enti sema pengantin nadai ngaga sumpah maya nyain surat tikah, seduai iya ulih ngaga sumpah ba pengujung cheramah. Tang enti udah, seduai iya ulih milih sekalika deka nyebut nya baru ba pengujung cheramah, tang seduai iya patut madahka diri udah nyebut nya sebedau tu. Udah nya, cheramah nya diujungka enggau sampi ngambika tikah seduai iya diberekat.

 Kesuah iya, Saksi-Saksi Jehovah milih endur sida begempuru tauka dikumbai Palan Gempuru nyadika endur pengawa tikah sida diatur. b Enti sida bisi ngatur pengawa makai, pengawa nya deka diatur ba endur bukai.

 Enti atur tikah tu dipejalaika ba Palan Gempuru, kesuah iya sapa-sapa pan ulih enggau. Enda ngira sida Saksi tauka ukai. Ba pengawa makai, pengantin empu patut nentuka sapa ke dibai sida datai.

 Nadai atur pasal nama bansa gari ti patut dikena orang ke datai. Tang, Saksi-Saksi Jehovah enggau naka ulih nitihka lalau ari Bup Kudus, ti meransang begari enggau chara ti menyana sereta nyamai dipeda mata. Enti orang ke datai mega nitihka lalau, semua orang pan ulih gaga ati. (1 Timoti 2:9) Lalau ti sama mega ulih dikena ba atur pengawa makai.

 Ajar ari Bup Kudus meransang kitai gerah jari. (Masmur 37:21) Saksi-Saksi Jehovah rindu meri lalu deka nerima hadiah. (Luke 6:38) Taja pia, sida enda minta hadiah tauka madahka sapa ke meri, laban nya enda sejalai enggau ajar Bup Kudus sereta engka ulih ngasuh orang ke datai enda nyamai ati.—Matthew 6:3, 4; 2 Korint 9:7; 1 Peter 3:8.

 Nadai. Saksi-Saksi Jehovah enda besatupka gelas laban pengawa tu datai ari pengarap ti pelesu. c Saksi-Saksi Jehovah enda besampika pengantin ngena chara tu, tang bisi chara bukai.

 Nadai. Ba sekeda endur, bisi orang deka naburka beras tauka duit ngagai pengantin. Sida pechaya, pengawa ke baka tu mai nasit ti manah ngagai pengantin, ngambi bulih mayuh agi reta, pengelantang, sereta panjai umur. Tang, Saksi-Saksi Jehovah enda nitihka ajar ti baka nya. Nyengkaum nyebut jaku “arapka manah nasit” (“good luck”), laban nya enda sejalai enggau ajar Bup Kudus.—Isaiah 65:11.

 Enti pengawa tu diatur ba Palan Gempuru, nadai pemakai sereta ai irup disediaka. Tang, enti ba hotel tauka ba rumah panjai, tauka ba dini-dini endur ke bukai, sigi bisi pemakai sereta ai irup disediaka. (Pengajar 9:7) Enti sema pengantin sama bela besetuju deka nyediaka ai bisa, tentuka penyampau nya enda kelalu mayuh, lalu semina diberi ngagai sida ke udah chukup umur ngirup ai bisa.—Luke 21:34; Rome 13:1, 13.

 Tu tepulai ngagai pengantin nya empu. Seduai iya ulih milih musik ke deka dipasang, belagu sereta betanda. (Pengajar 3:4) Ukai semua musik ke dipilih nya sama. Tu bepanggai ngagai pending seiku-seiku orang sereta adat sida. Tang utai ke patut dijaga, tentuka musik nya enda ngasuh orang bukai enda nyamai ati ninga. Enti pengawa tu dipejalaika ba Palan Gempuru, semina lagu ke bepelasarka Bup Kudus aja tau dikena.

 Nadai penerang pasal pengawa tu dalam Bup Kudus. Nyadi, Saksi-Saksi Jehovah ke udah nikah ulih nentuka kediri empu deka ngintu tauka enda. Sapa ke deka, sida ulih ngintu nya ba seduai iya empu aja, tauka begulai enggau sekeda bala kaban sereta diri sebilik.