Ketegal kami Saksi-Saksi Jehovah, kami bebendar ngetanka ruang bilik diri empu sereta orang bukai. Kami bebasaka Petara ti Pun ruang bilik. (Pemungkal 2:21-24; Epesus 3:14, 15) Dalam Bup Kudus, Petara ngajar mayuh prinsip ke ulih nulung orang ba serata dunya ngembuan tikah ti tegap enggau lantang.

 Kami enggau naka ulih nitihka lalau ari Bup Kudus, laban lalau nya nulung kami nyadi laki, bini, sereta apai indai ti manah. (Jaku Dalam 31:10-31; Epesus 5:22–6:4; 1 Timoti 5:8) Penemu-dalam ari Bup Kudus ulih ngasuh ruang bilik mujur taja pan sida enda sama pengarap. (1 Peter 3:1, 2) Peratika nama ku beberapa iku orang ke bisi kaling pengidup ti nyadi Saksi Jehovah:

•   “Sepemanjai enam taun pengudah kami jadi, pengidup kami penuh enggau laya sereta asa ati. Pengudah Ivete nyadi Saksi-Saksi Jehovah, iya ngayanka mayuh pengerindu sereta sabar agi. Ubah iya nya nyelamatka tikah kami.”—Clauir ari Brazil.

•   “Aku nyakal laki aku maya iya berengkah belajarka Bup Kudus enggau Saksi-Saksi Jehovah. Aku ngumbai sida deka nyerara kami sebilik. Kenyau ari nya, aku ulih beratika, iya ke bendar Bup Kudus nulung tikah kami.”—Agness ari Zambia.

   Maya nginjil, kami nunjukka penemu-dalam ari Bup Kudus ulih nulung sida

•   Milih kaling pengidup enggau manah

•   Napi taun keterubah idup jadi melaki-bini

•   Begulai enggau mentua

•   Ngatur belanja

•   Ngetu belaya

•   Belajar ngampun

•   Ngajar anak

 Tu endang utai ke dijangka nyadi. Ngambika chunto, siti kompeni ke benama Sofres ngaga pansik pasal utai tu. Nitihka riput sida, 1 ari 20 pasang laki bini deka bisi penanggul ti besai enti seiku ari sida nyadi Saksi-Saksi Jehovah.

 Jesus kala madahka, orang ke nitihka ajar iya kekadang deka napi sakal ari diri sebilik. (Matthew 10:32-36) Seiku orang ke landik pasal sejarah madahka, ba baruh Perintah Rome, “Pengarap Krisitian dituduh mechah-belahka ruang bilik.” a Kemayaharitu, Saksi-Saksi Jehovah mega dituduh baka nya. Kati tu reti iya, bala Saksi ke ngasuh sesiti ruang bilik nya mechah?

 Maya ngaduka kes tuduh ngagai Saksi-Saksi Jehovah ke dikumbai mechah-belahka ruang bilik, Kot Eropah ke Bekaul enggau Hak Mensia madahka, kesuah iya kaling pengidup ke ukai Saksi ngepunka penanggul tu nyadi. Sida enda ulih “nerima sereta enda bebasaka pengelepas seseiku orang dalam diri sebilik mutuska ni bagi pengarap tauka adat ke deka dititihka sida.” Kot nya mega madah, “Tu endang suah nyadi enti seiku kaling pengidup enda sama pengarap. Saksi-Saksi Jehovah mega enda ulih nyeliahka diri ari penanggul tu.” b Taja pan bisi sakal ba diri sebilik, bala Saksi tetap deka nitihka ajar ari Bup Kudus ti madah, “Anang malas penyai ngena penyai,. . . seagi-agi utai nya bepanggai ba kita, diau bebaik enggau semua orang.”—Rome 12:17, 18.

 Saksi-Saksi Jehovah nitihka ajar Bup Kudus ke ngasuh jadi enggau orang ke sama pengarap. (1 Korint 7:39) Lalau ari Bup Kudus tu amat manah. Ngambika chunto, artikel Journal of Marriage and Family madahka, “sepasang laki bini ke ngembuan pengarap, adat sereta sama utai ke dipechaya deka bulih kaul ti rapat agi enggau pangan diri. c

 Taja pia Saksi-Saksi Jehovah enda diperansang sarak enggau kaling pengidup sida ke ukai Saksi. Bup Kudus bisi madahka, “Enti lelaki ke orang Kristian bisi bini ke ukai orang Kristian, lalu indu nya besetuju deka begulai enggau iya, lelaki nya enda tau muai iya. Lalu enti indu ke orang Kristian bisi laki ke ukai orang Kristian, lalu laki iya besetuju deka begulai enggau iya, iya enda tau muai laki iya.” (1 Korint 7:12, 13) Saksi-Saksi Jehovah deka nitihka pesan tu.