Saksi-Saksi Jehovah nitihka lalau ari Bup Kudus, ngambi enda nyaut semua jaku tuduh tauka jaku kelese orang bukai. Chunto iya, Bup Kudus bisi madah, “Enti nuan ngajar orang ke ngemesaika diri, nuan semina minta diri dipechat.” (Jaku Dalam 9:7, 8; 26:4) Nya alai, kami enggau naka ulih deka ngelantangka ati Petara. Kami enda kelalu ibuhka jaku tuduh orang bukai, lalu kami enggau naka ulih nyeliahka laya enggau orang bukai.—Masmur 119:69.

 Endang amat, bisi “maya enda bemunyi enggau maya bejaku.” (Pengajar 3:7) Kami deka nyaut orang ke bisi ati deka nemu utai ti bendar, tang kami nyeliahka laya ti nadai guna. Enggau chara tu, kami nitihka ajar sereta teladan ke diayanka Jesus, sereta orang Kristian ba abad keterubah.

•   Jesus enda nyaut maya iya dituduh ba mua Pilate. (Matthew 27:11-14; 1 Peter 2:21-23) Taja pan Jesus dituduh pemabuk sereta bam, tang iya enda nyaut. Iya nitihka prinsip Bup Kudus ke madah, ‘penemu-dalam Petara dikamatka ulih utai ti dikereja.’ (Matthew 11:19) Tang, ba maya ti ngena, iya nyaut orang ke petenah iya enggau berani.—Matthew 15:1-3; Mark 3:22-30.

   Jesus ngajar bala murid iya, ngambika enda jampat lemi semengat enggau jaku tuduh ngagai sida. Iya madah, “Beberekat meh kita lebuh orang mechat kita lalu merinsaka kita, lalu nyebut semua macham utai ti bula ngelaban kita ketegal Aku.” (Matthew 5:11, 12) Indah, Jesus madahka jaku tuduh ke baka nya, ulih muka jalai ke sida meri saksi, lalu iya deka nulung orang bukai. Iya besemaya, “Aku deka meri kita jaku enggau penemu-dalam ti enda ulih disaut tauka disakal munsuh kita.”—Luke 21:12-15.

•   Rasul Paul ngelalau orang Kristian nyeliahka laya enggau orang ke nyakal. Iya ngumbai laya ke baka nya “nadai pulai ke penguntung, sereta nadai guna.”—Titus 3:9; Rome 16:17, 18.

•   Rasul Peter meransang orang Kristian ngetanka pengarap sida enggau naka ulih. (1 Peter 3:15) Iya ngelalau, manah agi kitai ngetanka pengarap diri nengah pengawa ke dikereja, ari ke belaban jaku. Iya nulis, “Beri basa” ngambi nuan ulih nutup mulut orang ke nyebut utai ngapa.—1 Peter 2:12-15.