Enda. Laban tiap iku orang patut ngaga pemutus kediri empu pasal pengarap ke dipilih. (Rome 14:12) Amat, Saksi-Saksi Jehovah ngajar anak sida pasal Bup Kudus. Tang, maya anak sida mansang besai, tiap iku anak patut mutus kediri empu, sekalika iya deka nyadi Saksi tauka enggai.—Rome 12:2; Galatia 6:5.

 Baka apai indai orang bukai, Saksi-Saksi Jehovah mega dekaka anak sida mujur ba pengidup. Sida ngajar utai ti amat beguna ngagai bala anak. Ngambika chunto, pasal mayuh macham chara ti manah, prinsip moral ti menyana, sereta pengarap sida. Saksi-Saksi Jehovah amat pechaya, lalau ti pemadu manah pasal pengidup nya bisi dalam Bup Kudus. Nya meh kebuah sida enggau naka ulih nulung bala anak belajarka Bup Kudus, sereta datai ngagai gempuru. (Ulang Adat 6:6, 7) Enggau chara nya, maya anak sida mansang besai, sida ulih ngaga pemutus kediri empu, sekalika deka nitih tauka enda pengarap apai indai sida.

•  Kati bala anak Saksi-Saksi Jehovah udah dibaptisa kenyau ari sida ada?

•  Kati Saksi-Saksi Jehovah bemunsuh enggau bala anak enti anak sida enggai dibaptisa?

•  Nama kebuah Saksi-Saksi Jehovah mai anak sida nginjil?

•  Kati Saksi-Saksi Jehovah ngintu sebarang pengerami?

•  Nama dipadahka bala anak ke dibesaika ruang bilik Saksi-Saksi Jehovah?

 Enda. Bup Kudus nadai kala madahka ajar nya. Bukti iya, ulih ditemu pasal orang Kristian dulu kelia. Sebedau sida dibaptisa, sida patut ninga pasal Berita Manah, nerima ajar nya, lalu nesal ati. (Kereja Rasul 2:14, 22, 38, 41) Nya kebuah, enti deka dibaptisa, seseiku orang patut chukup umur alai sida nemu sereta pechayaka ajar Bup Kudus, lalu ulih ngaga pemutus deka nitihka ajar nya. Anak mit ke baru ada tentu nadai ulih ngereja semua utai tu.

 Maya anak mansang besai, nya baru sida ulih ngaga pemutus sekalika sida deka tauka enggai dibaptisa. Tang sebedau sida dibaptisa mega, sida patut nemu, pemutus sida nya pemutus ti amat besai.

 Tentu enda. Amat, sida mega tusah ati. Tang sida amat sayauka bala anak, lalu enda mutuska kaul sida sebilik, taja pan anak sida milih enggai nyadi Saksi-Saksi Jehovah.

 Bisi beberapa iti kebuah. a

•   Bup Kudus ngasuh apai indai ngajar anak sida pasal Petara, enggau chara bejalaika pengarap sida. (Epesus 6:4) Nginjil tauka madahka Berita Manah ngagai orang bukai nya, sebagi ari sembah kitai ngagai Petara. Nya kebuah, mai bala anak ba pengawa nginjil mega sebagi ari chara ngajar anak sida pasal pengarap.—Rome 10:9, 10; Hebrew 13:15.

•   Bup Kudus enggau terang ngasuh bala anak ‘muji Petara.’ (Masmur 148:12, 13) Siti ari chara kitai muji Petara iya nya, madahka pasal Iya ngagai orang bukai. b

•   Bala anak ke enggau nginjil tentu bulih mayuh penguntung. Laban sida ulih belajar chara bejaku enggau sebarang orang ke ditemu sida. Sida mega belajar pasal ngayanka pengibuh, pemanah ati, enda manchal, sereta enda sumbung. Nambahka nya, sida deka nemu agi pemanah bisi pengarap dalam pengidup sida.

 Saksi-Saksi Jehovah enda ngintu sebarang pengerami ke enda ngelantangka ati Petara. c (2 Korint 6:14-17; Epesus 5:10) Ngambika chunto, Saksi-Saksi Jehovah enda ngintu hari pengada tauka Hari Krismas, laban pengerami nya enda nitihka ajar ari Bup Kudus.

 Tang nya ukai reti iya, Saksi-Saksi Jehovah enda rindu begulai enggau diri sebilik, tauka meri anak sida hadiah. Indah, sida ulih ngereja nya ba barang maya, enda ngira ni bagi haribulan.