Kira 1,500 iku ari 35,000 iku Saksi-Saksi Jehovah ke idup ba menua Jerman enggau menua bukai ke dipegai Nazi, mati maya jeman Holocaust. Kebuah sida mati enda ditemu ba sekeda kes. Ketegal pansik agi benung digaga, penyampau tauka penerang deka diubah nitihka penerang ke diulih.

•  Baka ni sida mati?

•  Nama kebuah sida diperinsa?

•  Dini alai sida mati?

•  Sekeda ari sida ke diukum bunuh

•   Ukum Bunuh: Nyau deka 400 iku Saksi Jehovah diukum bunuh ba menua Jerman enggau menua bukai ke dipegai Nazi. Mayuh ari mansa nya dipechara ba kot, diukum bunuh, enggau dipanchung. Ke bukai nya ditimbak tauka digantung sampai mati, tang nadai dipechara ba kot.

•   Gaya ti balat jai ba alai ngetan orang: Lebih ari 1,000 iku Saksi Jehovah mati ba kem alai ngetan orang tangkap enggau rumah jil ke dipegai Nazi. Sida diansak gawa nyentuk ke mati. Bisi mega ke mati ketegal diperinsa, enda chukup pemakai, balat chelap, sakit, tauka enda chukup ubat. Ketegal gaya ti balat jai tu, sekeda indah mati pengudah dilepaska ba pengunjung Perang Dunya Kedua.

•   Kebuah Bukai: Sekeda Saksi Jehovah dibunuh ba bilik ke bisi gis berachun. Bisi mega mati pengudah bala lutur nguji ubat tauka chara berubat ba sida. Lalu, bisi nya mati ketegal dijik ngena racun.

 Saksi-Saksi Jehovah diperinsa laban sida nitihka ajar Bup Kudus. Bala Saksi Jehovah enggai nitihka orang Nazi ke ngasuh sida ngereja utai ti ditagang ba Bup Kudus. Sida milih ‘ngasika Petara, ukai ngasika mensia.’ (Kereja Rasul 5:​29) Peratika dua iti pekara ti diputuska sida.

1.   Mengkang neutral ba pengawa politik. Sama baka Saksi-Saksi Jehovah ba semua menua kemayaharitu, Saksi-Saksi Jehovah ke dipegai orang Nazi maya nya mega mengkang neutral ba isu politik. (John 18:36) Nya alai, sida enggai

   •   Sama enggau pengawa nyadi soldadu tauka nyukung pengawa perang.​—Isaiah 2:4; Matthew 26:52.

   •   Ngundi tauka sama enggau gerempung Nazi.​—John 17:16.

   •   Nabi swastika (lambang orang Nazi) tauka nyebut “Heil Hitler!”​—Matthew 23:10; 1 Korint 10:14.

2.   Ngereja pengawa ti nitihka pengarap. Taja pan ditagang bejalaika pengarap sida, Saksi-Saksi Jehovah agi mengkang

   •   Sama begulai besampi lalu nyembah Jehovah.​—Hebrew 10:24, 25.

   •   Nusui pesan Bup Kudus lalu nyadung litaricha ti bepelasarka Bup Kudus.​—Matthew 28:19, 20.

   •   Ngayanka penyiru ngagai orang bukai, nyengkaum orang Judah.​—Mark 12:31.

   •   Bepegai ba pengarap sida lalu enggai nyain surat ke madahka diri enggai agi nyembah Jehovah.​—Mark 12:30.

 Profesor Robert Gerwarth madahka, semina raban Saksi-saksi Jehovah aja ke diperinsa lebuh dipegai orang Nazi ketegal utai ti dikearapka sida. a Sida bukai ke ditan ba alai ngetan orang tangkap amat alit ati meda bala Saksi Jehovah ti bepegai teguh ba pengarap sida. Seiku orang ari menua Austria ke dijil madahka: “Sida enda enggau beperang. Sida deka agi dibunuh ari ke munuh orang bukai.”

•   Kem alai ngetan orang tangkap: Mayuh ari Saksi Jehovah ke mati nya, ba kem alai ngetan orang tangkap. Sida ditan ba kem Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, enggau Sachsenhausen. Ba Sachsenhausen aja, kira 200 iku Saksi-Saksi Jehovah mati.

•   Rumah jil: Sekeda Saksi Jehovah diperinsa nyentuk ke mati. Sekeda nya mati ketegal bakal lebuh ditasat.

•   Endur ukum bunuh: Mayuh ari Saksi Jehovah ke diukum bunuh nya ba rumah jil Berlin-Plötzensee, Brandenburg, enggau Halle/Saale. Kelimpah ari nya, bisi kira 70 iti endur bukai ke dirikut, alai Saksi Jehovah diukum bunuh.

•  Nama: Helene Gotthold

   Endur diukum bunuh: Plötzensee (Berlin)

   Helene udah belaki lalu bisi dua iku anak. Iya beberapa kali ditangkap. Ba taun 1937, iya diperinsa enggau chara ti chukup jai lebuh ditasat, nyentuk ngagai iya lenyau anak dalam kandung. Kena 8 Disember 1944, iya diukum panchung ba jil Plötzensee di Berlin.

•  Nama: Gerhard Liebold

   Endur diukum bunuh: Brandenburg

   Gerhard beumur 20 taun lebuh iya diukum panchung kena 6 Mei 1943. Apai iya mega diukum panchung dua taun ti udah ba rumah jil ti sama. Iya nulis surat ti penudi ngagai diri sebilik enggau tunang iya: “Enti nadai pengering ari Tuan, aku enda ulih mengkang ba jalai tu.”

•  Nama: Rudolf Auschner

   Endur diukum bunuh: Halle/Saale

   Rudolf beumur 17 taun lebuh iya diukum panchung kena 22 September 1944. Ba surat ti penudi ke ditulis iya ngagai indai iya, Rudolf madahka: “Mayuh bala menyadi Kristian udah nengah jalai tu, aku mega deka sama enggau.”