Au, Saksi-Saksi Jehovah suah meri bantu maya penusah ngenyit, tauka pengerusak alam nyadi. Kami meri bantu ba utai ti diguna ngagai bala Saksi-Saksi Jehovah enggau ke orang ke ukai Saksi. Tu nitihka pesan Bup Kudus ba Galatia 6:10: “Nya ala, genap kali kitai bisi peluang, kereja pengawa ti badas ngagai semua orang, kelebih agi ngagai orang ke sama pengarap enggau kita.” Kami mega nguji meri utai ti diguna ba emosi sereta pengarap, laban nya amat beguna ba sida ke nyadi mansa penusah.—2 Korint. 1:3,4

 Sepengudah sesiti penusah nyadi, bala tuai gempuru ba endur ke ditinggang penusah nya nguji ngiga semua bala ari eklisia, nanya enti sida likun, lalu nama utai ke diguna sida. Udah nya, bala tuai gempuru ngaga riput pasal baka ni gaya bala ari eklisia sida, sereta nama bantu ke udah diberi. Riput nya dianjung ngagai Pampang Opis Saksi-Saksi Jehovah ke ngemataka menua nya.

 Enti begunaka bantu lebih ari ke ulih diberi eklisia ke semak endur nya, Raban ti Ngiring Saksi-Saksi Jehovah ngaga atur ngambika nyediaka utai ti diguna. Tu nitihka chara ke dikena orang Kristian ba abad keterubah ngambika nulung pangan diri maya lapar pungkang nyadi. (1 Korint 16:1-4) Pampang Opis ba menua nya deka numbuhka Komiti Tulung Pengerusak Alam ngambika ngatur pengawa meri tulung. Saksi-Saksi Jehovah ari endur bukai sanggup datai nulung lalu meri awak enggau pemisi sida.—Jaku Dalam 17:17.

 Sekeda ari duit pemeri ke dianjung ke Pampang Opis Saksi-Saksi Jehovah dikena meri bantu ngagai sida ke nyadi mansa penusah ngenyit. (Kereja Rasul 11:27-30; 2 Korint 8:13-15) Laban semua pengawa nya dikereja bala sukarela, semua duit nya dikena meli utai ti diguna, ukai mayar gaji orang ba opis. Kami bejimat lebuh ngena semua duit pemeri.—2 Korint 8:20.