Saksi-Saksi Jehovah bebasaka piak ti bekuasa sereta lambang menua. Kami bebasaka hak orang bukai milih deka ngangkat sumpah, nabi bendira, tauka belaguka lagu menua.

 Taja pia, Saksi-Saksi Jehovah milih enda enggau pengawa nya, laban kami pechaya pengawa tu enda sejalai enggau ajar Bup Kudus. Kami beterima kasih lebuh orang bukai bebasaka pengarap kami, baka kami mega bebasaka pilihan orang bukai.

Ba artikel tu

•  Nama ajar Bup Kudus pasal tu?

•  Kati enti sema undang-undang ngasuh kitai enggau pengawa tu?

•  Kati Saksi-Saksi Jehovah masuk champur ba pengawa sosial tauka politik?

 Dua iti ajar Bup Kudus ke nangkanka tu nulung kitai ngaga pemutus:

•   Semina siku aja Petara ke patut disembah. Bup Kudus madah: “Nuan patut besugang ngagai Petara nuan, Jehovah, lalu patut nyembah Iya siku aja.” (Luke 4:8) Pengawa ngangkat sumpah enggau pengawa belaguka lagu menua suah bisi leka jaku ke madahka diri deka taluk tauka tetap ati ngagai menua diri empu ari utai bukai. Ketegal tu, Saksi-Saksi Jehovah ngasaika diri besalah enti sida ngereja sebarang pengawa ke bekaul enggau penetap ati, laban sida semina tetap ati ngagai Petara aja.

   Sama mega, Saksi-Saksi Jehovah ngasaika pengawa nabi bendira nya pengawa ti enda sejalai enggau ajar Bup Kudus. Lalu nya bisi bekaul enggau pengawa sembah tauka nyembah engkeramba. (1 Korint 10:14) Sekeda pakar sejarah madahka, bendira menua ke bendar iya tanda agama. Pakar sejarah Carlton J. H. Hayes nulis, a “Bendira nya siti tanda tauka utai ke disembah orang ke amat rinduka sereta nyukung menua,” Orang Kristian jeman kelia, pengarang Daniel P. Mannix madahka: “Bala orang Kristian nulak . . . nyerahka diri ngagai raja menua Rome.—tu sebaka enggau kemayaharitu nulak meri tabi ngagai bendira .” b

  Taja pan Saksi-Saksi Jehovah enda nabi bendira, tang kami mega enda ngerusak, nunu, tauka enda bebasaka iya tauka nama-nama lambang menua ke bukai.

•   Semua orang sama ba mua Petara. (Surat Kereja Rasul 10:34, 35) Bup Kudus madah, “Ari siku mensia, Iya ngaga semua bansa ngambika sida diau ba serata dunya.” (Surat Kereja Rasul 17:26) Tu meh kebuah iya, Saksi-Saksi Jehovah pechaya nya pengawa ti salah lebuh meri mulia ngagai sesiti raban bansa tauka menua lebih agi ari semua utai. Kitai ngayanka basa ngagai semua orang, enda ngira ni penatai sida tauka dini alai sida diau.—1 Peter 2:17.

 Saksi-Saksi Jehovah nya ukai gerempung ke ngelaban perintah. Kami pechaya perintah nya sebagi ari atur Petara ke ngemendarka sida empu merintah. (Rome 13:1-7) Kami mega pechaya orang Kristian patut ngasika piak ti bekuasa.—Luke 20:25.

 Kati enti sema undang-undang ngasuh kitai enggau pengawa tu? Ba sekeda kes, endang ulih minta ari perintah kena ngaga ubah ba undang-undang. c Enti nadai, Saksi-Saksi Jehovah enggau basa milih deka “ngasika Petara, ke nyadi pemerintah kami, ukai mensia.”—Surat Kereja Rasul 5:29.

 Enda. Saksi-Saksi Jehovah enda masuk champur ba pengawa sosial tauka isu politik. Lebuh kami nulak pengawa ngangkat sumpah, nabi bendira, tauka belaguka lagu menua, tu ukai ketegal kami orang ke aktif ba pengawa politik. Tang kami nitihka ajar Bup Kudus ke bekaul enggau pengawa tu.