Runding sereta pengawa ke dikereja kami maya bisi orang mati, patut nitihka ajar ari Bup Kudus. Nya nyengkaum:

•   Ngayanka penusah ati nyentukka balat nyabak maya orang ke dikesayauka mati, nya utai ti enda ulih diseliahka. Maya orang ke dikesayauka murid Jesus mati, sida mega ngayanka penusah nya lalu balat nyabak. (John 11:33-35, 38; Kereja Rasul 8:2; 9:39) Nya kebuah, kami enda ngumbai maya penusah orang mati tu maya kami merindang diri. (Pengajar 3:1, 4; 7:1-4) Tang, kami ngena peluang nya ngayanka penyinu sereta penyiru.—Rome 12:15.

•   Orang mati enda nemu utai. Enda ngira nama chara pengidup tauka adat, kami enda nitih sereta enda ngereja pengawa ke enda nitihka ajar Bup Kudus. Ngambika chunto, kami enda pechaya, orang mati agi ulih ngachau sida ke idup. (Pengajar 9:5, 6, 10) Kami mega enda enggau orang semalam-malam enda tinduk, ngintu pengerami pemati, meri piring ke orang mati, sereta pengawa antu balu. Kami nulak semua pengawa nya laban kami deka nitihka ajar Bup Kudus tu: “Pansut kita ari sida, . . . lalu anang negu utai ti enda tuchi.”—2 Korint 6:17.

•   Orang mati ulih idup baru. Bup Kudus ngajar, orang mati ulih idup baru lalu nadai agi pemati. (Kereja Rasul 24:15; Pemandang 21:4) Baka orang Kristian kelia, ketegal kami nemu pasal pengadang tu, kami enda ngintu pengawa pemati nya enggau besai.—1 Tesalonika 4:13.

•   Bup Kudus nadai ngasuh kitai ngintu pengawa pemati enggau besai. (Jaku Dalam 11:2) Kami enda ngena peluang maya pemati tu kena ngayanka pengaya tauka pangkat seseiku orang. (1 John 2:16) Kami enda ngatur pengawa pemati tu enggau kelalu besai ketegal deka ngayanka pengaya diri, tauka meli sentubung ti mar, sereta ngena gari ke ulih ngasuh orang berasai enda nyamai ati meda.

•   Kami enda mejal orang bukai nitihka chara pengarap kami maya bisi pemati nyadi. Bekaul enggau tu, kami nitihka prinsip Bup Kudus ke madah: ‘Genap iku kitai deka madahka pasal diri empu ngagai Petara.’ (Rome 14:12) Taja pia, enti bisi peluang, kami deka nguji nerangka pasal pengarap kami enggau ‘basa ti dalam.’—1 Peter 3:15.

 Endur: Enti sesiti ruang bilik mutuska deka bisi pengawa pemati, sida empu ulih milih endur, baka ba Palan Gempuru, ba rumah orang mati, ba rumah sida empu, ba endur nunu bangkai, tauka ba pendam.

 Pengawa: Bisi siti cheramah pasal pemati sereta pasal pengadang jemah ila deka dikenataika. Cheramah tu ulih merindang ati orang ke benung tusah ati. (John 11:25; Rome 5:12; 2 Peter 3:13) Batang cheramah nya mayuh agi ngemeratka pasal pemanah ke dikembuan orang ke mati. Ngambika chunto, teladan pasal penetap ati iya.—2 Samuel 1:17-27.

 Udah nya, lagu ke diambi ari Bup Kudus deka dipelaguka. (Kolosi 3:16) Pengawa nya deka ditutup enggau sampi ti ngelantangka ati.—Pilipi 4:6, 7.

 Duit ke dibayar enggau duit ke dipupu: Kami nadai minta bayar ari orang ke sama sepengarap enggau kami. Nya nyengkaum ba pengawa ke bekaul enggau pengarap, pengawa ba pemati, sama baka kami nadai minta duit pupu maya ba gempuru.—Matthew 10:8.

 Orang ke datai: Sida ke ukai Saksi-Saksi Jehovah mega dikelaluka datai ngagai pengawa pemati ti diintu ba Palan Gempuru. Baka gempuru kami ke bukai, pengawa pemati mega dibuka ngagai orang mayuh.

 Tiap iku Saksi patut ngaga pemutus nitihka asai ati sida ke bepelasarka Bup Kudus. (1 Timoti 1:19) Taja pia, kami tentu enda nitihka pengawa ke bekaul enggau pengarap sida, ke enda bepelasarka ajar Bup Kudus.—2 Korint 6:14-17.