Ukai. Saksi-Saksi Jehovah ukai antivaksin. Kami bebasaka pemutus tiap iku orang. Sekalika orang nya deka tauka enggai nerima vaksin, nya tepulai ngagai sida empu. Indah, mayuh Saksi-Saksi Jehovah milih deka nerima vaksin.

 Kami naka ulih ngiga chara berubat ti pemadu manah. Kami mega amat beterima kasih laban bisi pemansang ba begian berubat, kelebih agi kena ngurangka penyakit ti balat. Kami mega amat beterima kasih ke pemagas bala pakar berubat ke bendar amat gawa, kelebih agi maya penyakit berampit benung balat nyadi.

 Saksi-Saksi Jehovah deka bekerejasama enggau bala pegawai berubat. Chunto iya, kenyau ari penyakit COVID-19 tu berengkah, Saksi-Saksi Jehovah udah ngeluarka beratus bengkah bansa jaku, pasal tangkan ke meransang orang mayuh nitihka atur pengelikun ba menua sida empu. Tu nyengkaum pasal atur nyaga takah sereta atur sekat pasal gempuru enggau orang mayuh, kuarantin, suah nuchi jari, sereta ngena penutup mulut enggau idung, pia mega chara bukai ke patut dititih sereta diasuh piak bekuasa.—Rome 13:1, 2.

 Dalam bepuluh taun ti udah, litaricha ke dikeluarka Saksi-Saksi Jehovah udah madahka sekeda prinsip tu:

•   Pemutus pasal chara berubat, tepulai ngagai tiap iku orang.—Galatia 6:5.

   “[Majalah tu] nadai madahka ni bagi ubat tauka chara berubat, sereta nadai madahka lalau pasal berubat. Majalah tu semina madahka fakta, lalu nejuka pemacha empu berunding maya sida ngaga pemutus.”—Awake!, dikeluarka kena 8 Februari 1987.

   “Sekalika nuan tauka bala anak nuan deka nerima vaksin tauka enda, nya pemutus tiap iku kita empu.”—Awake!, dikeluarka kena 22 Ogos 1965.

•   Kami deka ngiga chara berubat ti manah, laban kami sayauka nyawa.—Surat Kereja Rasul 17:28.

   “Bala Saksi mega ngena chara ke dipadahka bala pakar berubat, lebuh sida bisi penanggul ba pengerai. Sida amat sayauka nyawa lalu naka ulih nyelamatka nyawa, laban tu meh sejalai enggau ajar Bup Kudus.”—The Watchtower, dikeluarka kena 1 Julai 1975.

   “Saksi-Saksi Jehovah deka nerima ubat enggau chara berubat. Sida mega deka idup gerai sereta panjai umur. Baka Luke, seiku orang Kristian ba abad keterubah, sekeda Saksi Jehovah mega nyadi lutur. . . . Saksi-Saksi Jehovah amat beterima kasihka pengawa sida ke nyediaka chara berubat. Bala Saksi mega beterima kasih ke bantu diberi sida kena ngurangka pemedis sida ketegal penyakit.”—The Watchtower, dikeluarka kena 1 Februari 2011.