Kati Saksi-Saksi Jehovah Ngembuan Bup Kudus ti Enda Sama enggau Orang Bukai?
Saksi-Saksi Jehovah ngena mayuh bengkah salin Bup Kudus ba litaricha sida. Tang kami kesuah iya ngena Bup Kudus Salin Dunya Baru, ke bisi ba sekeda bansa jaku. Salin tu betul sereta terang agi, lalu ngembuan nama Petara.
Bisi nama Petara. Sekeda pengeluar Bup Kudus enda bebasaka Pengarang asal iya. Ngambika chunto, Bup Kudus nuliska lis nama orang ke bisi betanggungjawap ngeluarka Bup Kudus. Tang sayau, sida nadai nyebut nama Pengarang asal iya, Petara Jehovah!
Tang, Bup Kudus Salin Dunya Baru ngena nama Petara ke bisi beribu kali ditulis. Taja pia, nama orang ke ngeluarka bup tu enda ditemu.
Betul. Ukai semua salin Bup Kudus nyalin pesan nya enggau betul. Ngambika chunto, Matthew 16:24 ke diambi ari siti salin madahka, “Enti orang deka nitihka Aku, awakka iya badu agi berundingka diri empu, ngesan regang iya, lalu nitihka Aku.” Ketegal ayat tu, mayuh orang Kristian bekenaka regang ba sembah sida. Nambahka nya, bala pengajar ba gerija pan ngena ajar tu, lalu ngumbai Jesus mati diregang. Engka penyalin ngena leka jaku “regang” laban sida ngumbai Jesus mati ba regang. Tang nitihka jaku asal, salin tu ke bendar iya ba siti “tiang” ke lurus, ukai “regang.” Nya meh kebuah Bup Kudus Salin Dunya Baru nyalin baru jaku tu, “Enti orang deka nitihka aku, awakka iya badu agi berundingka diri empu, ngesan tiang perinsa iya, lalu terus nitihka aku.”
Terang. Salin ti manah ukai aja betul, tang terang lalu senang ditemu semua orang. Perundingka Matthew 5:3, Jesus ngena sempama ke bebunyi: “Beberekat meh orang ke seranta dalam roh.” Salin tu enda senang ditemu sereta enda terang. Nadai orang amat nemu reti “seranta dalam roh.” Nya kebuah, Bup Kudus Salin Dunya Baru nyalin tu enggau terang agi lalu madahka: “Gaga ati meh orang ke nemu diri begunaka Petara.” Tu tentu nyemetak agi, sereta terang.
Kelimpah ari ngembuan nama Petara, disalin enggau betul sereta terang, Bup Kudus Salin Dunya Baru disadung enggau pechuma. Asil iya, bejuta iku orang ulih macha Bup Kudus dalam bansa jaku sida empu. Indah orang ke nadai beduit pan ulih ngembuan iya.
