Penemu ti Salah: Saksi-Saksi Jehovah enda pechayaka lutur lalu enggai berubat.

 Fakta: Kami deka nerima chara berubat ti pemadu manah ke diri empu enggau diri sebilik. Lebuh kami bisi penanggul ba pengerai, kami ngiga lutur ke landik berubat sereta beputung enggau chara enda meri tauka nerima darah. Kami beterima kasih laban chara berubat majak manah kemayaharitu. Ketegal Saksi-Saksi Jehovah enggai nerima darah, bala lutur enggau pakar ubat ngiga chara berubat bukai ke enda ngena darah. Lalu chara berubat ti baru tu mai penguntung ke semua orang, ukai semina Saksi-Saksi Jehovah aja. Kemayaharitu, ba mayuh menua, sebarang pesakit ulih minta chara berubat ke enda ngena darah, ngambika ulih nyeliah diri ari penyakit ke berampit nengah darah, penanggul ketegal tubuh pesakit nya nulak darah orang bukai, tauka nerima darah ti salah.

 Penemu ti Salah: Saksi-Saksi Jehovah pechaya orang ke sakit tau digeraika ulih pengarap iya.

 Fakta: Kami enda ngeraika orang nengah pengarap.

  Penemu ti Salah: Chara berubat bukai ke enda ngena darah amat mar.

 Fakta: Chara berubat ke enda ngena darah enda bangat mar. a

 Penemu ti Salah: Ninting taun, mayuh Saksi-Saksi Jehovah nyengkaum anak mit mati ketegal sida enggai nerima darah.

 Fakta: Endang nadai bukti ti nunjukka tu amat. Lutur ke landik mutung suah nyeliah ari ngena darah lebuh mutung jantung orang, tulang orang, tauka nepuka kereban tubuh ari seiku orang dalam tubuh seiku orang bukai. b Ke suah iya, asil ke orang ti diputung lalu enda nerima darah, nyengkaum anak mit, manah agi ari orang bukai ke nerima darah. c Iya ke amat, nadai orang ulih madah enggau andal, seseiku orang tentu mati enti enggai nerima darah, tauka seseiku orang tentu deka idup enti iya nerima darah.

 Tu bekaul enggau pengarap, ukai pasal pengerai. Enggau terang, Sempekat Lama enggau Sempekat Baru dalam Bup Kudus sama bela ngasuh anang nerima darah. (Pemungkal 9:4; Adat Lewi 17:10; Ulang Adat 12:23; Kereja Rasul 15:28, 29) Kelimpah ari nya, Petara madahka darah ngambarka nyawa, tauka seput. (Adat Lewi 17:14) Nya alai, kami enda nerima darah, ukai semina laban ngasika pesan dalam Bup Kudus, tang pia mega laban kami deka ngayanka basa ngagai Petara ti udah meri pengidup kami.

 Suba, bala lutur ngumbai chara berubat ti enda ngena darah nya atur ti terit, tauka deka madamka seput orang ke minta nya. Tang, dalam beberapa taun ti udah, runding tu udah berubah. Ngambika chunto, siti artikel dalam majalah pelajar ubat ti dikeluarka kena taun 2004 madahka, “dudi hari, mayuh ari chara berubat ke dikena ba pesakit ke Saksi Jehovah, deka nyadi chunto chara berubat ke semua.” d Siti artikel ari majalah Heart, Lung and Circulation kena taun 2010 madahka “chara mutung ti enda ngena darah, ukai semina patut dikena ba Saksi Jehovah aja, tang patut suah dikena ba pengawa beputung sehari-hari.”

 Kemayaharitu, di serata dunya, beribu-ribu iku lutur ngena pengelandik sida ngambika orang ke diputung enda lenyau mayuh darah. Enggau tu, sida ulih mujur nembuka pengawa sida ti amat tusah dipejalaika, taja pan enda meri darah. Chara berubat ke bukai tu indah dikena ba menua ti benung mansang, sereta nerima mayuh peminta ari pesakit ke ukai Saksi Jehovah