•  Baka ni Saksi-Saksi Jehovah ngaga pemutus sekalika sesiti pengerami ulih diintu tauka enda?

•  Taja pan Saksi-Saksi Jehovah enda ngintu sesiti pengerami, tang kati sida agi rinduka diri sebilik sida?

•  Kati Saksi-Saksi Jehovah nagang orang bukai ari ngintu sesiti pengerami?

 Sebedau Saksi-Saksi Jehovah ngaga pemutus sekalika deka ngintu sesiti pengerami tauka enda, sida deka beratika utai ti ditulis dalam Bup Kudus. Enti sesiti pengerami enggau terang ngelanggar prinsip Bup Kudus, sida enda ngintu pengerami nya. Taja pia, bekaul enggau pengerami ke bukai, tiap iku Saksi patut ngaga pemutus kediri empu, lalu bebendar “ngetanka ati ti beresi ba mua Petara enggau ba mua mensia.”—Surat Kereja Rasul 24:16.

 Tu sekeda tanya ke engka diperundingka Saksi-Saksi Jehovah lebuh ngaga pemutus sekalika sesiti pengerami ulih diintu tauka enda. a

•   Kati pengerami tu ngelanggar prinsip Bup Kudus?

   Prinsip Bup Kudus: “‘Pansut ari bala sida lalu seraraka diri ari sida,’ ku Jehovah bejaku, ‘badu agi negu utai ti kamah.’”—2 Korint 6:15-17.

   Kena nyeliahka diri ari “utai ti kamah,” iya nya ajar ke ngelanggar prinsip Bup Kudus, Saksi-Saksi Jehovah enda ngintu pengerami ke bisi pekara tu:

   Pengerami ke bepelasarka pengarap tauka sembah ngagai petara bukai. Jesus madahka: “Nuan patut besugang ngagai Petara nuan, Jehovah, lalu patut nyembah Iya siku aja.” (Matthew 4:10) Nya alai, Saksi-Saksi Jehovah enda ngintu Hari Krismas, Easter, tauka May Day, laban pengerami ke baka tu bisi kaul enggau pengawa sembah ngagai petara bukai, lalu ukai ngagai Jehovah. Kelimpah ari nya, Saksi-Saksi Jehovah mega enda enggau pengerami-pengerami tu:

  •  Pengerami Kwanzaa. Leka jaku Kwanzaa “datai ari bansa jaku Swahili matunda ya kwanza, ke mai reti ‘asil ngetau keterubah’ lalu [pekara tu] nunjukka pengerami tu bepelasarka pengerami ngetau keterubah ti dipadah dalam sejarah orang Afrika.” (Encyclopedia of Black Studies) Taja pan sekeda orang ngumbai Kwanzaa nya ukai pengerami ke bekaul enggau pengarap, tang siti ensiklopedia nyemaka Kwanzaa enggau musin pengerami ngetau Afrika. Ba musin pengerami ngetau Afrika, orang deka meri asil ngetau ti keterubah “ke bala petara tauka nenek moyang kena nunjukka diri beterima kasih.” Ensiklopedia nya mega madahka, Kwanzaa, ke mega siti pengerami ke diintu ba Amerika, bepelasarka utai ti dipechaya tu.—Encyclopedia of African Religion.

  •  Pengerami Kuih Bulan. Pengerami tu mega dikumbai Pengerami Tengan Musin Ruruh. Tuju pengerami tu iya nya, kena “nyembah petara bulan.” (Holidays, Festivals, and Celebrations of the World Dictionary) Ba pengerami tu, orang indu dalam sesiti ruang bilik deka besugang ngagai petara bulan.—Religions of the World—A Comprehensive Encyclopedia of Beliefs and Practices.

  •  Pengerami Nauruz (Nowruz). “Pengerami tu bepelasarka pengarap Zoroaster. Lalu, pengerami tu mega siti hari ti pemadu kudus dalam kalendar Zoroaster kelia. . . . Sida pechaya Semengat Musin Chelap udah muru Semengat Ngalih Hari, ke mega dikumbai [Rapithwin], ke baruh tanah maya musin chelap. Nyadi, kena ngelaluka Semengat Ngalih Hari pulai baru, pengerami tu diintu maya ngalih hari ba Hari Nowruz nitihka tradisi Zoroaster.”—United Nations Educational, Scientific and Cultural Organization (UNESCO).

  •  Pengerami Shab-e Yalda. Nitihka bup Sufism in the Secret History of Persia, pengerami musin chelap tu, ke diintu ba bulan Disember, “endang bisi kaul enggau pengawa sembah ngagai petara Mitra,” iya nya petara penampak. Pengerami tu mega engka bisi kaul enggau pengawa sembah ngagai petara matahari orang Rome enggau orang Gerika. b

  •  Thanksgiving. Baka pengerami Kwanzaa, pengerami tu bepelasarka pengerami musin ngetau jeman kelia ke ngemuliaka bala petara. Nyau kelama, “adat kelia tu nyadi sebagi ari pengerami gerija Kristian.”—A Great and Godly Adventure—The Pilgrims and the Myth of the First Thanksgiving.

   Pengerami ke mai nasit ti manah tauka pengerami ke bepelasarka pengarap ti pelesu. Bup Kudus madahka, orang ke “nyembah . . . petara penguntung enggau nasit,” udah “ninggalka [Jehovah].” (Isaiah 65:11) Nya alai, Saksi-Saksi Jehovah enda ngintu pengerami-pengerami ke baka tu:

  •  Pengerami Ivan Kupala. “Orang pechaya, ba hari [Ivan Kupala], alam semula jadi deka mansutka kuasa magik, lalu orang ke benasit baik sereta berani deka ngempu kuasa magik nya.” (The A to Z of Belarus) Pengerami nya kebendar iya siti pengerami pengarap pelesu ke ngintu hari musin panas. Maya nya, siang hari panjai agi ba hemisfera utara. Pengerami tu diintu ba bulan Jun. Tang siti ensiklopedia madahka, “nyau kelama, pengerami tu nyadi sebagi ari pengerami gerija, [iya nya, “hari saint” John Pemaptisa].”—Encyclopedia of Contemporary Russian Culture.

  •  Taun Baru Lunar (Taun Baru Cina tauka Taun Baru Korea). “Maya pengerami taun baru, diri sebilik, bala kaban, sereta kaban belayan, amat ngemeratka nasit ti manah. Sida deka nyembah bala petara sereta bala antu ngambika bulih nasit ti manah ba taun ke deka datai.” (Mooncakes and Hungry Ghosts—Festivals of China) Baka nya mega, Taun Baru Korea “nyengkaum pengawa ngemuliaka nenek moyang, pengawa muru bala antu, sereta pengawa muai sial. Kelimpah ari nya, sida deka betemu enggau tukang betilitka nasit ngambika nemu nama nasit sida ba taun ti deka datai.”—Encyclopedia of New Year’s Holidays Worldwide.

   Pengerami ti bepelasarka pengarap ke madahka semengat tauka nyawa mensia enda ulih mati. Bup Kudus enggau terang madahka, nyawa ti bedosa ulih mati. (Esekiel 18:4, NWT) Nya meh kebuah, Saksi-Saksi Jehovah enda ngintu pengerami-pengerami tu:

  •  Pengerami All Souls’ Day (Hari Orang Mati). Pengerami tu digaga kena “ngingatka semua orang ti manah ke udah mati.” Kelimpah ari nya, kenyau ari kira-kira 500 M. nyentuk ngagai 1500 M., orang pechaya semengat orang ke udah mati ke benung dituchika ngena api ti tuchi deka pansut ba hari nya, lalu nyadi antu, tukang sihir, pama, enggau ke bukai, lalu ngachau orang ke kala bedosa ngagai sida.—New Catholic Encyclopedia.

  •  Pengerami Qingming enggau Pengerami Antu Lapar. Dua iti pengerami tu diintu kena bebasaka nenek moyang ke udah mati. Nitihka bup Celebrating Life Customs Around the World—From Baby Showers to Funerals, “ba hari Qingming, pemakai, utai irup, sereta duit keretas deka ditunu ngambika orang ke udah mati enda lapar, aus, sereta bisi duit.” Bup nya mega madahka, “sepemanjai Bulan Antu Lapar, kelebih agi ba malam bulan purnama, [orang ke ngintu pechaya] orang ke udah mati bisi kaul ti rapat agi enggau orang ke idup. Nya alai, sida patut ngereja utai kena ngenyamaika ati semengat orang ke udah mati sereta bebasaka nenek moyang sida.”

  •  Pengerami Chuseok. Ba pengerami tu, orang deka “meri pemakai enggau wain ngagai semengat orang ke udah mati.” Sida ngereja nya laban sida “pechaya semengat orang ti udah mati deka terus idup.”—The Korean Tradition of Religion, Society, and Ethics.

   Pengerami ke bekaul enggau sihir sereta astrologi. Bup Kudus madahka: ‘Anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati. Laban Jehovah Petara kita begedika orang ke ngereja utai ti jai baka nya.’ (Ulang Adat 18:10-12) Nya kebuah Saksi-Saksi Jehovah enda ngintu pengerami Halloween tauka pengerami-pengerami tu:

  •  Taun Baru Tamil enggau Sinhala. “Adat ke bekaul enggau pengerami tu . . . nyengkaum sekeda pengawa ke dikereja ba maya ke diasuh orang astrologi tauka orang ke nemu nujum.”—Encyclopedia of Sri Lanka.

  •  Pengerami Songkran. Nama pengerami tu “datai ari leka jaku Sanskrit . . . ke mai reti ‘nginsit’ tauka ‘ubah,’ lalu [pengerami tu] nyadi tanda ke nunjukka matahari mindah ngagai bintang-bintang ke ngambarka zodiak Aries.”—Food, Feasts, and Faith—An Encyclopedia of Food Culture in World Religions.

   Pengerami ke bekaul enggau sembah ke disebut dalam Adat Moses, ke enda ibuh dititihka pengudah pemati Jesus. Bup Kudus madahka: “Kristus mai pengujung ngagai Adat.” (Rome 10:4) Orang Kristian kemayaharitu agi bulih penguntung ari prinsip ke bisi dalam Adat Moses. Tang sida enda ngintu pengerami ke disebut dalam Adat Moses, kelebih agi pengerami kena ngintu penatai Messiah. Bup Kudus madahka: “Semua nya semina ayuk ari utai ti deka datai, tang pekara ti amat nya Kristus.” (Kolosi 2:17) Kelimpah ari nya, sekeda orang ke ngintu pengerami ke baka nya mega nitihka adat ke enda sejalai enggau ajar Bup Kudus. Nya kebuah Saksi-Saksi Jehovah enda ngintu pengerami-pengerami tu:

  •  Pengerami Hanukkah. Pengerami tu diintu kena ngingatka pengawa nyerahka baru Rumah Sembiang Jehovah ba Jerusalem. Tang Bup Kudus madahka, Jesus udah nyadi Imam Besai “langkau kain [tauka, Rumah Sembiang] ke jauh lebih penting agi sereta ke lebih sempurna. Langkau kain nya ukai utai ke digaga ngena jari mensia tauka utai ke digaga ba dunya.” (Hebrew 9:11) Ba orang Kristian, rumah sembiang rohani udah nganti Rumah Sembiang ke bisi ba Jerusalem.

  •  Pengerami Rosh Hashanah. Pengerami tu diintu ba hari keterubah ba taun orang Judah. Ba jeman kelia, nembiak Petara deka meri korban ti spesial ke Petara kena ngintu pengerami tu. (Penyampau 29:1-6) Taja pia, lebuh Jesus datai sebagai Messiah, iya ‘madamka semua pengawa ti beberika korban enggau pemeri.’ Nyadi, pengerami tu enda agi diterima Petara.—Daniel 9:26, 27.

•   Kati pengerami tu nyampurka utai ti dipechaya beberapa iti pengarap?

   Prinsip Bup Kudus: “Kati orang ke arap sejalai enggau orang ke enda arap? Nama kaul entara Rumah Sembiang Petara enggau engkeramba?”—2 Korint 6:15-17.

   Saksi-Saksi Jehovah bebasaka pemutus orang bukai sereta bebendar deka idup lantang enggau sida. Taja pia, Saksi-Saksi Jehovah enda ngintu pengerami ke nyampurka utai ti dipechaya beberapa iti pengarap ti bebida. Ambika chunto:

   Pengerami ke bekaul enggau tuai pengarap tauka utai bukai ke meransang jalai pengarap ti bebida ngambika beserakup. Lebuh Petara ngiring bala nembiak Iya ngagai menua ti baru ke bisi diuan orang ke ngembuan pengarap ke bukai, Iya madah: “Anang ngaga sempekat enggau sida tauka enggau petara-petara sida. . . . Enti kita nyembah petara-petara sida, nya tentu deka manjuk kita.” (Pemansut 23:32, 33) Nya kebuah Saksi-Saksi Jehovah enda ngintu pengerami-pengerami tu:

  •  Pengerami Loy Krathong. Lebuh orang Thailand ngintu pengerami tu, “sida ngena daun ngaga mangkuk ti mit, lalu ngengkahka lilin tauka menyan ba dalam mangkuk nya. Udah nya, sida deka ngawakka mangkuk nya melepung ba atas ai. Sida pechaya, mangkuk nya deka mai nasit ti enda manah jauh ari sida. Kebendar iya, pengerami tu ngingatka sida pasal tapak kaki ke diitinggalka Buddha.”—Encyclopedia of Buddhism.

  •  Hari Nesal Ati Kebangsaan (National Repentance Day). Siti surat kabar ba Papua New Guinea, iya nya The National madahka, taja pan orang ke ngintu pengerami tu datai ari mayuh bengkah pengarap Kristian, tang sida “setuju enggau ajar asas pengarap Kristian.” Surat kabar nya mega madahka, tuju pengerami tu iya nya, meransang bala rayat nitihka prinsip orang Kristian.

  •  Hari Wesak. “Tu hari ti pemadu tuchi ngagai sida ke megai pengarap Buddha. Ba hari tu, sida deka ngintu hari pengada Buddha, chara iya bulih tanda ari serega, sereta pemati iya tauka lebuh iya ulih nyapai Nirvana.”—Holidays, Festivals, and Celebrations of the World Dictionary.

   Pengerami ke bepelasarka adat pengarap ke ngelanggar ajar ari Bup Kudus. Jesus madah ngagai bala tuai pengarap: “Kita ngasuh jaku Petara nadai agi reti ketegal adat asal kita.” Iya mega madahka, sembah sida lebu ngapa laban “utai ke diajar sida semina adat mensia.” (Matthew 15:6, 9) Nya kebuah Saksi-Saksi Jehovah enda ngintu pengerami-pengerami tu:

  •  Pengerami Epifani (Hari Tiga Raja, Timkat, tauka Los Reyes Magos). Pengerami tu diintu kena ngingatka penemuai ari orang ti nemu nujum ngagai Jesus tauka hari Jesus dibaptisa. Pengerami tu “datai ari pengerami musin bungai orang ke enda pechayaka Petara, ke ngemuliaka bala petara sungai enggau aliran ai. Tang udah nya, pengerami tu nyadi sebagi ari pengerami orang Kristian.” (The Christmas Encyclopedia) Pengerami Timkat, ke bisi kaul ti rapat enggau Pengerami Epifani, mega penuh enggau “adat tauka budaya mensia.”—Encyclopedia of Society and Culture in the Ancient World.

  •  Pengerami Indai Maria ke Niki ke Serega. (Feast of the Assumption of the Virgin Mary). Pengerami tu bepelasarka utai ti dipechaya ke madahka, Maria, iya nya indai Jesus, niki ke serega enggau tubuh fizikal iya. “Utai ti dipechaya tu enda ditemu orang Kristian ba jeman kelia, sereta enda disebut dalam Bup Kudus.”—Religion and Society—Encyclopedia of Fundamentalism.

  •  Pengerami Saint Maria ke Ngandung Tang Nadai Dosa (Feast of the Immaculate Conception). “Bup Kudus nadai ngajar pasal [Maria] ke ngandung tang nadai dosa . . . [Ajar tu] datai ari Gerija.”—New Catholic Encyclopedia.

  •  Sebedau Paska (Lent). Orang deka nesal ati sereta bepasa sepemanjai pengerami tu. Nitihka New Catholic Encyclopedia, pengerami tu berengkah ba “abad keempat,” iya nya lebih ari 200 taun pengudah Bup Kudus tembu ditulis. Bekaul enggau hari keterubah Pengerami Sebedau Paska, ensiklopedia nya madahka: “Pengawa nerima amau ba Hari Tiga Amau (Ash Wednesday) udah berengkah dikereja ba mayuh endur kenyau ari Majlis Benevento taun 1091.”

  •  Pengerami Meskel (tauka, Maskal). Tuju pengerami ari Etiopia tu kena ngingatka maya “Regang ti Bendar (regang ti dikena mantang Kristus) ditemu. Maya pengerami nya, orang deka nungkunka api lalu betanda ngelingi api nya.” (Encyclopedia of Society and Culture in the Medieval World; tanda kurungan oleh penerbit) Tang, Saksi-Saksi Jehovah nadai ngena tanda regang dalam sembah sida.

•   Kati pengerami nya ngemuliaka mensia, gerempung mensia, tauka tanda menua?

   Prinsip Bup Kudus: ‘Ku Jehovah bejaku, “Tulah meh orang ke ninggalka Aku lalu manggaika pengarap sida ba mensia, ba pengering mensia.”’—Jeremiah 17:5.

   Saksi-Saksi Jehovah beterima kasihka pengawa orang bukai, indah besampika sida. Tang, Saksi-Saksi Jehovah enda ngintu pengerami tauka enggau pengawa ke baka tu:

   Pengerami ke ngemuliaka sesiku pemerintah tauka orang ti tebilang. Bup Kudus madahka: “Anang agi ngarapka mensia. Sida nadai rega.” (Isaiah 2:22) Nya kebuah, Saksi-Saksi Jehovah enda ngintu hari pengada sesiku pemerintah.

   Pengerami ke ngemuliaka bendira. Saksi-Saksi Jehovah enda ngintu Hari Bendira. Nama kebuah? Laban Bup Kudus madahka: “Jauhka diri ari engkeramba.” (1 John 5:21) Kemayaharitu, sekeda orang enda ngumbai bendira nya engkeramba tauka utai ti disembah, tang pakar sejarah ke benama Carlton J. H. Hayes nulis: “Tanda utama enggau utai utama ke dimuliaka nasionalisme nya bendira.”

   Pengerami ke ngemuliaka saint. Nama nyadi lebuh siku lelaki besugang ngagai Peter? Bup Kudus madahka: “Peter nulung iya bediri lalu bejaku: ‘Angkat nuan. Aku tu pan mensia.’” (Surat Kereja Rasul 10:25, 26) Ketegal Peter enggau bala rasul ke bukai enggai dimuliaka tauka disembah orang, Saksi-Saksi Jehovah nadai enggau pengawa tauka pengerami ke ngemuliaka saint. Ambika chunto:

  •  All Saints’ Day. “Pengerami tu diintu kena ngemuliaka semua saint . . . Pun penatai pengerami tu enda ditemu.”—New Catholic Encyclopedia.

  •  Pengerami Indai Maria ari Guadalupe (Fiesta of Our Lady of Guadalupe). Pengerami tu diintu kena ngemuliaka “saint ke nyaga Mexico.” Sekeda orang pechaya saint nya Maria, iya nya indai Jesus. Ku orang madahka, Maria udah pegari ba mua siku orang ke betanam ba taun 1531.—The Greenwood Encyclopedia of Latino Literature.

  •  Hari Saint (Name Day). Nitihka bup Celebrating Life Customs Around the World—From Baby Showers to Funerals, “Hari Saint nya hari ngingatka siku saint, lalu nama iya diberi ngagai orang ke baru dibaptisa tauka ngagai orang ke baru nyadi ahli gerija nya.” Bup tu mega madahka, “hari tu bisi kaul ti rapat enggau pengarap.”

   Pengerami ke nyukung pengawa politik tauka pengawa sosial. Bup Kudus madahka: ‘Manah agi belindung ba Jehovah ari ke manggaika diri ba mensia.’ (Masmur 118:8, 9) Saksi-Saksi Jehovah enda bepanggai ba mensia kena mutarka penanggul ba dunya tu. Nya kebuah, sida enda ngintu Hari Belia, Hari Wanita, tauka sebarang pengerami ke nyukung kimpin politik tauka sosial. Tang, sida ngarapka Perintah Petara deka mutarka penanggul ba dunya tu enggau isu perkauman.—Rome 2:11; 8:21.

•   Kati pengerami nya ngemuliaka sesiti menua tauka bansa?

   Prinsip Bup Kudus: “Petara enda bepilih mata. Semua orang ke nangika Petara sereta ngereja utai ti ngena, enda ngira nama bansa sida, endang diterima Petara.”—Surat Kereja Rasul 10:34, 35.

   Taja pan mayuh Saksi-Saksi Jehovah rinduka menua asal sida, tang sida enda ngintu pengerami ke ngemuliaka menua tauka bansa sida. Ambika chunto:

   Hari ke ngemuliaka bala soldadu menua. Jesus enda ngasuh bala murid iya beperang. Tang, iya madahka sida: “Anang ngetu rinduka munsuh kita, lalu besampika sida ke merinsaka kita.” (Matthew 5:44) Nya kebuah, Saksi-Saksi Jehovah enda ngintu pengerami ke ngemuliaka bala soldadu menua, baka:

  •  Hari Anzac. “Anzac nya nama pandak ke bala soldadu Australia enggau New Zealand ke begempung,” lalu “Hari Anzac nya hari kena ngingatka bala soldadu ke mati lebuh beperang.”—Historical Dictionary of Australia.

  •  Hari Veteran tauka Hari Pahlawan. (Remembrance Day, Remembrance Sunday, tauka Memorial Day). Tuju hari-hari tu iya nya, kena ngingatka “bala soldadu menua enggau sida ke mati ba perang.”—Encyclopædia Britannica.

   Pengerami hari besejarah tauka hari merdeka sesiti menua. Jesus madahka tu pasal bala murid iya: “Sida ukai sebagi ari dunya, baka aku ke ukai sebagi ari dunya.” (John 17:16) Taja pan Saksi-Saksi Jehovah rindu belajar pasal sejarah sesiti menua, tang sida enda enggau pengerami-pengerami tu:

  •  Hari Australia. Pengerami Hari Australia diintu kena ngingatka “hari ba taun 1788 lebuh bala soldadu England nirika bendira sida, lalu madahka menua Australia nya menua ti baru ke dipegai sida.”—Worldmark Encyclopedia of Cultures and Daily Life.

  •  Hari Guy Fawkes. Pengerami tu iya nya, “siti pengerami menua kena ngingatka pelan Guy Fawkes enggau bala penyukung Katolik ke enda mujur ngebom Raja James I enggau Parlimen [England] ba taun 1605.”—A Dictionary of English Folklore.

  •  Hari Merdeka. Beberapa iti menua netapka hari tu “kena ngintu ulang taun lebuh menua sida merdeka.”—Merriam-Webster’s Unabridged Dictionary.

•   Kati pengerami nya bisi kaul enggau ulah ti jai sereta enda bemoral?

   Prinsip Bup Kudus: “Kita udah lama ngereja utai nitihka pengingin orang ba dunya. Kita enda malu ngereja mayuh utai ti jai, enda tetagangka pengingin ke deka ngereja utai ti salah, kuat ngirup, berami nyentukka enda tetagangka ulah diri, enggai alah ngirup, sereta nyembah engkeramba ti keji.”—1 Peter 4:3.

   Sejalai enggau prinsip tu, Saksi-Saksi Jehovah enda ngintu pengerami ke bisi kaul enggau pengawa udu ngirup sereta berami nyentukka enda tetagangka ulah diri. Endang amat, Saksi-Saksi Jehovah rindu begulai enggau bala kaban sida, tang sida engka milih langsung enda ngirup tauka ngirup mimit aja ai bisa. Sida bebendar nitihka jaku lalau Bup Kudus ke madahka: “Sekalika kita makai, ngirup, tauka ngereja nama-nama utai, kereja semua nya kena ngemuliaka Petara.”—1 Korint 10:31.

   Ketegal nya, Saksi-Saksi Jehovah enda enggau pengerami ke ngereja ulah ti dikutuk dalam Bup Kudus. Tu nyengkaum Pengerami Purim. Suba Pengerami Purim diintu kena ngingatka maya orang Judah dilepaska ba abad kelima Sebedau Masihi. Tang kemayaharitu, pengerami tu “dikumbai baka Mardi Gras tauka Carnival versi Yahudi.” Orang ke ngintu pengerami tu “kesuah iya ngena kostum (kesuah iya lelaki ke ngena gari orang indu sereta nganta baka indu), berami nyentukka enda tetagangka ulah diri, udu ngirup, sereta amat ragak.”—Essential Judaism.

 Au. Bup Kudus ngajar orang ngambika rindu sereta bebasaka diri sebilik sida, enda ngira pengarap tauka utai ti dipechaya sida. (1 Peter 3:1, 2, 7) Endang amat, lebuh siku Saksi enda enggau sesiti pengerami, diri sebilik iya engka berasai pedis ati, indah ngasaika diri baka dikhianati. Nya alai, mayuh Saksi-Saksi Jehovah ngereja utai kena ngasuh diri sebilik sida berasai dikesayau, nerangka kebuah sida ngaga pemutus ke baka nya, sereta ngabas diri sebilik ba maya ke bukai.

 Enda. Sida pechaya tiap iku orang patut ngaga pemutus kediri empu. (Josua 24:15) Saksi-Saksi Jehovah ‘bebasaka semua macham orang,’ enda ngira nama pengarap ke dipegai sida.—1 Peter 2:17.