Turi ta Hunio 1, 2023, puede ngana uli i mat-tour ta aru nga fasilidad na Bethel ta interu mundo. Nagimmang yatun tu maturu tu tallu nga ragun megafu ta COVID-19 pandemic. Espesial nga aggaw yatun nga pat-tour para ta miembro ira na Bethel family ta interu mundo anna ta rinivu ira nga nabbisita.

Inalawa na Bethelite i bisita ira gukaban na welcome sign, kansion, pangngizzi, anna paggakko. Kunnaw i kinagi ni Ellis Bott nga namegafu nga masserbi ta world headquarters ta Warwick, New York, turi ta pandemic: “Kakkasta nga masingan i Bethelite ira nga egga ta lawan na lobby nga egga i tammi da tu welcome sign. Aru i nakatangi ta ayayya da. Megafu tatun, mas nga natageno ku nga kakkasta nga lugar i Bethel.” Magayayya si Sister Alexis Alexander, tadday nga part-time commuter Bethelite nga alawatan i mat-tour ira. Kinagi na: “Tadday nga pribilehio nga masingan i aya na wawwaragi kani Jehova anna ta balena.”

Excited si Mi-yeon Jo nga i-tour i 8-anios nga ana na nga si Yoon ta branch office ta South Korea. Sobra i ka-excited ni Yoon nga mat-tour ta Bethel yari tu ari yayya kuruga nakakatrug ta gabi nige na tour. Kinagi ni Mi-yeon: “Ta pallukag mi pagalaman, gininna mi ngana i kansion meyannung ta pabbisita ni Caleb anna ni Sophia ta Bethel. Gininna mi gapa yatun ta takay ta pabbiahe mi mappange ta branch.” Kuruga nagenjoy si Yoon ta tour, yari tu kinagi na: “Ayam ngana laman i kurang ta Bethel, anna kagitta ngana yatun na paraiso.”

Kakayà ni Noah Johnsen nga taga-Alberta, Canada, nga egga i takina na nga spinal muscular atrophy i mat-tour ta fasilidad ira na Bethel ta New York, U.S.A. Ngem megafu ta taki na, ari yayya puede nga mabbiahe ta eroplano yari tu nabbiahe ira na magana na gukaban na takay ta maturu tu 4,100 nga kilometro mappange ta United States branch ta Wallkill, New York. Kunnaw i kinagi ni Noah ta pinat-tour na: “Tadday laman nga uvovug i makagì ta pinat-tour ku—aya. Natageno ku i aya ni Jehova anna na wawwaragi.”

Magayayya i 76-anios nga si Fyodor Zhitnikov anna i atawa na nga si Yulita ta pinat-tour da ta museum ta fasilidad ira na Bethel ta Kazakhstan. Masingan ta tadday nga parte na museum i istoria na wawwaragi ira nga matalo nga nagattam ta piga nga dekada. Kakayà ni Fyodor yatun nga parte na museum megafu ta nakavulu na i aru ta nira tatun ta passerbi kani Jehova. Kuruga appresian na gapa i trabahu nga kingngua na wawwaragi tapenu meprepara yatun nga exhibit. Kinagi na: “Nu importante ta wawwaragi i nakua tam ta passerbi kani Jehova ta nappasa ira nga dagun, mas ngana gapa kani Jehova. Arian na nga kattaman anna appresian na i ngamin nga kingngua na kada tadday nittam.”

Magayayya ittam nga alawatan uli i mabbisita ira ta fasilidad ira na Bethel ta interu mundo. Excited ittam nga alawatan i rinivu paga ta tumunug paga ira nga aggaw!—Salmo 122:1.

Masingan ta gukag i photo gallery na wawwaragi tam ira nga mat-tour ta karuan nga fasilidad ira na Bethel anna museum.