Kagitta na nakagi ta nappollu nga report, ma-25 dagun ngana ta 2022 nga egga i ofisial nga website na Saksi ira ni Jehova. Ngem mafulu ragun ngana i nappasa, turi ta Agosto 27, 2012, ne-release i bagu-disenio nga jw.org. Mammuattam taw nga serye na balita ira nga magadde ta part 3 nu kunnasi nga nabbenefisio i minillion nga totolay ta bagu-disenio nga jw.org.

Video Ira: Ta kombension ira ta 2012, ne-release ta DVD i ollu nga dua nga video na bagu nga serye nga nateman tu Mabbalin tu Kofun ni Jehova. Ngem ari ngana kuruga usu-usan na totolay i DVD anna mas mangina i mamadday tu kunnatun. Turi ta nallawan i bagu-disenio nga website ta summer na 2012, mas mabi ngana nga mala anna magiraw i video ira. Yayya nga ta Enero 2013, ne-release ta jw.org i digital format na tumunug nga video na Mabbalin tu Kofun ni Jehova nga nateman tu Makimallo Kanayun. Maturu ngana tu 40 nga video i ne-release namegafu tatun nga tiempo.

Ta 2013, ne-release ta digital format i video nga Ngatta Gigiammuammu i Biblia? Dakal i neyuffun natun nga video ta ministerio anna tadday yatun ta Teaching Toolbox. Namegafu ta ne-release yatun, kanayun ngana nga meyusa ta pallayyagayya i jw.org nga website tapenu me-share i video ira. Angngarigan na, ta tadday nga kampania tapenu metaneg i tract nga mangipakannammu ta publiko meyannung ta jw.org turi Agosto 2014, ma-15 million nga video i na-download onu nagiraw.

Kagian na tadday nga brother nga nanguffun ta paddisenio ta jw.org: “Nassikan i pangurug ku gafu ta nasingakku nu kunnasi ittam nga niprepara ni Jehova para ta mesimmu ira ta mappange. Turi ta namadday kami tu bagu nga website, ari mi nga nanono tu daka-dakal saw nga uffun yatun nga bagu nga metodo nu kunnasi nga mala onu magiraw i video ira.” Angngarigan na, nelawan i JW Broadcasting turi ta Oktubre 2014 anna maturu tu 37 million nga video i na-download tatun nga vulan. Ta pamegafu gapa na COVID-19 pandemic ta 2020, mas aru mangana nga video i na-download onu nagiraw ta jw.org. Ta 2022, maturu tu 260 million nga video kada vulan i na-download ta jw.org.

Digital ira nga Publikasion: Ta nappasa nga daga-ragun, aru ngana i mas maya nga mabbibbig ta online onu ta tadday nga app ta gadyet da, imbes tu ta hard copy. Megafu ta bagu nga website nga ne-release ta 2012, awayya da ngana nga bibbigan ta online i magazina ira nige da paga nga malawa i hard copy. Megafu gapa ta appursigi nga mangilawan tu digital ira nga format na publikasion para ta website, mas mabi ngana laman nga napadday i JW Library app nga nelawan turi ta 2013. Yatun nga app anna i website ay parefu nga makakkasta nga tool tapenu uffunan i totolay nga mabibbig anna magigiammu i digital ira nga publikasion.

Dati bi, i publikasion ira nga me-release ta district convention ira ay saka laman nga available ta website onu ta app ta Enero na tumunug nga dagun. Ngem ta rehional ira nga kombension ta 2015, fermi i ayayya na audience turi ta nakannammuadda nga me-download da ngana insigida i digital nga format na release ira ta kombension. Kasali tatun i publikasion ira nga Jesus—Ang Daan, ang Katotohanan, ang Buhay anna Manumbalik Ka kay Jehova, kunne na gapa i video nga Ano ang Tunay na Pag-ibig? Ta tumunug nga dagun, ta Mayo 2016 nga programa na JW Broadcasting, ni-release ni Brother Anthony Morris na Manangngal nga Baggi i brosiur nga Tabbag ta 10 nga Pakkiavu na Kabataan Ira anna niyanunsio na nga puede ngana nga insigida nga me-download yatun. Yatun i first time nga maggiriddang nga ne-release ta wawwaragi ta interu mundo i tadday nga publikasion.

Nabayag ngana nga usu-usan na organisasion ni Jehova i teknolohia tapenu ilayyagayya i mapia nga dumug anna tapenu iyawa i pakawagan na wawwaragi. Magayayya ittam nga masingan nu kunnasi nga neyusa i website nga jw.org tapenu meyawa i ‘makan ta gagangay nga oras na akkakan.’—Mateo 24:45.

• Bilang na video ira nga ne-download kada vulan

• Bilang na kadaggaw nga magopen tu website ta kada vulan

• Ne-release i Makimallo Kanayun, Enero 2013

• Ne-release i JW Library app, Oktubre 2013

• Interu-mundo nga kampania nga neyusa i tract nga mangipakannammu ta publiko ta jw.org, Agosto 2014

• Ne-release i JW Broadcasting, Oktubre 2014

• Available ngana ta digital format i release ira ta kombension, Mayo 2015

• Ne-release ta interu mundo i Tabbag ta 10 nga Pakkiavu na Kabataan Ira, Mayo 2016