Turi ta namegafu i gerra ta Ukraine, minay i 46-anios nga sister nga si Iryna Makukha ta istasion na tren ta Kharkiv. Nanono na gare nga mas safe nu manaw ngana laman yayya ta Ukraine. Kitaggulu i situasion anna mattakay i totolay ta tren maski nu ari da ammu nu sitaw maffunta yatun. Ta panaw na tren nga nattakayan ni Iryna, kinallabbadda tu kurtina i bentana ira tapenu ari kuruga delikadu. Turi ta nakapanaw ngana ta istasion i tren, saka laman nammuan ni Iryna nga mappa-Slovakia balo yatun.

Maddian ngana sangawe si Iryna ta Czech Republic. Zimittal yayya ta capital city nga Prague turi ta Marso 3, 2022. Nakaleg yayya tu trabahu na bilang janitres tapus kavulu na nga maddian ta tadday nga apartment i dua paga nga Ukrainian nga sister nga refugee balaman. Maggiggigiammu si Iryna tu lengguahe nga Czech anna nituloy na lagapa i pappayunir na nga kukukuan na ngana ta unag na 20 nga dagun.

“Nasingakku mismu nga usu-usan ni Jehova i totolena tapenu tangngallan ittam. Talaga napasikan i pangurug ku megafu tatun,” kunni Iryna.

Maggi 23,000 nga wawwaragi tam i naddesision nga magali ta tanakuan nga nasion. Kurug gapa nga mas safe ngana ira tari, ngem kawagadda lagapa nga magaleg tu trabahu anna paddianan. Ilakad da gapa i papeles da ira anna iyenrol da i ána da ta bagu nga eskuela. Gigiammuadda gapa i lengguahe tari. Nanono da nga dakal i neyuffun ta nira na rutina da ta espiritual anna na minaggiddu nga wawwaragi tam tapenu makapagadjust ira tatun ira nga maka-stress nga tiempo.

Nabobbomba i babalay ta Mykolaiv Oblast, Ukraine. Tari bi nga maddian i familia nga Perceac nga si Anatoli anna Olena, anna i 17-anios nga ana da nga si Alina. Ngem turi ta Marso 6, 2022, nagali ngana ira ta Romania. Gafu ta citizen na Moldova si Anatoli, nepamavulun nga iyangena i familia na ta Romania. Kinagi ni Olena nga i pagali ta tanakuan nga nasion ay gitta na “binaddul mu i fun na kayu nga nepagamu ngana ta davvun tapus iyali mu.”

Ta uffun na wawwaragi ira ta Romania, egga ngana i apartment na familia nga Perceac. Nakaleg ngana gapa tu trabahu si Anatoli anna Olena tapus ta online ngana laman nga i-submit ni Alina i asayment na ira ta eskuela na ta Ukraine.

Ari laman tu i pisikal nga pakawagan natun nga familia i neyuffun na wawwaragi ta Romania. Iyayawa da gapa i emosional anna espiritual nga pakawagan na familia. Kanayun nga makikavulu i wawwaragi tatun nga familia tapenu kadda matageno nga napagurayan ira ta nasion nga nagalitadda. Giggigiammuan ni Olena anna ni Alina i lengguahe nga Romanian gukaban na JW Language app anna pakikavulu da ta ministerio ta bagu nga kakongregasiodda ira. Nedakallan gapa ni Anatoli i mar-Romanian.

“Ta gafu pagalaman, natageno mi ngana i panguffun ni Jehova,” kunni Anatoli. “Gukaban na uffun na organisasion anna na wawwaragi, natageno mi i pangaya ni Jehova.”

Nige nga namegafu i gerra, nabalu i sister nga taga-Vinnytsia, Ukraine nga si Alina Havryliuk. Turi ta Pebrero 27, nagali ira na 16-anios nga ana na nga si Vladyslav ta Suwałki, Poland. “Ta gafu na, agga-nono ku nu sitaw saw i paddianammi na ana ku anna nu anni saw i pattolayammi. Ngem siguradu ngà nga si Jehova i bahala nikami,” kunni Alina.

Insigida nga nagaleg si Alina, nga 37 anios, tu trabahu nga ari nga makefugag nisa ta pakistudy na. Nakaleg yayya tu trabahu bilang janitres ta tadday nga eskuela. “I pinaka-importante niakan ay megafu taw nga trabahu, mas aru i tiempò ta ministerio anna masuportakku lagapa i familià,” kunna.

Giggigiammuan ni Alina anna ni Vladyslav i map-Polish anna continuous auxiliary pioneer ira sangawe ta kongregasion nga Polish i lengguahe na. Nakapa-enrol ngana gapa si Vladyslav ta high school.

Napakaru nga problema anna panguli i naekspiriensa na Ukrainian nga wawwaragi tam, ngem iddiddan lagapa ira ni Jehova tu ari maguku-gukug nga sikan. Kuru-kurug ta nira i 2 Corinto 4:8: ‘Maruddu nga arubangammi i gulu-gulu ngem meyattam mi ngamin; nu karuan ay egga nikami i padduda, ngem ari kami vuluvuga nga mawanan tu pagiddanama.’