HUNIO 14, 2022
PILIPINAS
I Nesimmu ta 75 Dagun nga Pammisionero ta Pilipinas
Tagga ta Hunio 14, 1947, naddung ta Manila i tadday nga barku nu sitaw agga-takay i tallu nga lalaki nga da Brother Lorenzo Alpiche, Earl Stewart, anna Victor White. Ira i ollu nga misionero nga Saksi nga zimittal ta Pilipinas. Mattanga-vulan i nappasa, ziminaddan ta nira si Brother Nick Skelparick nga misionero gapa nga naggradua ta Gilead.
Nasanay tu mapia danatun nga brother anna preparadu ira nga mattrabahu. Ari nabbayag, okupadu ira ngana nga manguffun ta 2,400 nga publisher nga mallayyagayya ta interu Pilipinas. Tapus, 11 dagun laman i nappasa, ta 1958, maggi mami-mafulu ngana i karu na publisher ta maturu ngana tu 23,000 yatun. Tapus 75 dagun kabalin nga zimittal i ollu ira nga misionero, fermi ngana nga minaru i Saksi ni Jehova ta Pilipinas ta maturu ngana tu 230,000 ira sangawe.
Da Brother Milton Henschel anna Nathan H. Knorr ta tadday nga pakkombensionan ta Manila
Ari laman tu nekanna i pinaddattal danatun nga misionero. Mattallu vulan gare nige natun, nappalappa bi si Brother Nathan H. Knorr nga presidente na Watch Tower Society ta tadday nga ari nga makattaman nga kombension na Saksi ira ni Jehova namegafu ta Marso 31 adde ta Abril 2, 1947. Nipasiguradu ni Brother Knorr tari ira ta audience nga egga saw i duttal ta Pilipinas tu misionero ira nga naggradua ta Gilead. Manguffun ira saw tapenu organisan uli i trabahu nga pallayyagayya kabalin na World War II.
Zimigi: Picture na audience ta ollu nga aggaw na “Praise-Giving Nations” Convention ta Manila turi ta Marso 31, 1947. Ziwanan: Si Brother Milton Henschel nga mappalappa
Ta ultimu nga aggaw na kombension, 151 nga wawwaragi i na-baptize ta Manila Bay nu sitaw egga ira i masingan nga limimmag nga barku megafu ta gerra. Tapus ta fugag natun, nipalappa ni Brother Knorr i publiko nga palappa nga nateman tu “The Joy of All the People” ta 4,200 nga audience. Rinivu gapa i nakaginna tu live ta radio tatun nga palappa ta interu nga nasion. Si Brother Knorr kavulu si Brother Milton Henschel nga naggafu gapa ta world headquarters ay parehu nga pinagaram da ta palappa da i wawwaragi nga itulu-tuloy da laman i organisadu nga pallayyagayya.
Karuan ta 151 nga na-baptize ta Manila Bay ta ultimu nga aggaw na kombension turi ta Abril 2, 1947
Si Brother Denton Hopkinson ay tadday nga misionero nga massesserbi ta Pilipinas namegafu turi ta 1954. Kunnaw i makagi na meyannung ta nesimmu ira ta nappasa nga 75 dagun: “Napakaru i nakua danatun nga ollu ira nga misionero nga zimittal ta 1947 tapenu pagaramman anna organisan i kongregasion ira anna tapenu iprepara ira ta dakal nga papprogreso.”
Dakal i appabalo tam ta Yama tam ta langi nga si Jehova megafu ta bebbendisionan na i appursigi anna lallappo na aripan na ira ta Pilipinas anna ta interu mundo.—Isaias 60:22.
Baka Kaya Mu Gapa i
PASSIFUSIFUTAN—MAGIGIAMMU NGA EDISION
Pabbalin tu Ngamin nga Gannug ta Ngamin nga Klase na Totolay
Nakoffun kani Denton Hopkinson i napakaru nga asayment mamegafu ta kabbinna tapenu masingan nu kunnasi nga ayatan ni Jehova i ngamin nga klase na totolay.
I KEYUSAN NA DONASIOMMU IRA
I Misionero ira “Adde ta Ngamin nga Tuppu-tuppag na Davvun”
Egga i maturu tu 3,000 nga field missionary ta interu mundo. Paggafuan na fundu para nira?