Namegafu turi ta Liggu, Mayo 1, 2022, binisita ni Brother Mark Sanderson na Manangngal nga Baggi na Saksi ira ni Jehova i Ukrainian ira nga refugee nga nagali ta Poland. Kavulu na tatun nga pabbisita i tallu nga miembro na Branch Committee. Tatun ira nga pinabbisita ni Brother Sanderson anna na kakavulu na ira nga brother, naginna da i istoria ira na refugee anna nipasiguradu da ta nira nga ayatan anna suportan ira na Manangngal nga Baggi.

Ta unag na annam nga aggaw, maturu tu 2,500 nga kilometro i biniahe danatun nga brother tapenu mabisita i refugee ira nga maddian ta nadduruma nga lokasion. Nelagum ta binisita da i appa nga Assembly Hall anna aru nga Kingdom Hall. Inangngayadda gapa i volunteer ira nga egga ta border na Poland anna Ukraine.

Istorian na tadday nga Ukrainian brother: “Talaga napagaram kami tatun nga pinabbisita da. Narefreskowakkami nga gitta na mininukkami tu malallamming nga danum.”

“Nasurpresa kami tatun nga pinabbisita da!” kagian na tadday nga Ukrainian sister. “Natageno mi nga ikavurungan nakami ni Jehova.”

Kunnaw gapa i nikomento na tadday paga nga Ukrainian sister, “Ta paddattal mi ta Poland, awa-awammi, ngem mappappabalo kami kani Jehova ta sangawe, egga ngana nikami i ngamin nga kawagammi.”

Binisita gapa danatun nga brother i volunteer ira nga mangungnguffun ta refugee ira. Kinagi ni Brother Sanderson ta nira nga ayatan ira na Manangngal nga Baggi. Inusa na i Hebreo 6:10 tapenu ipasiguradu ta nira nga si Jehova, ‘ari na kattaman i kukukuadda.’ Tapus kinagi na paga, “Maski sikami. Ari mi saw nga makattaman i kukukuan nu.” Kinagi na volunteer ira nga pribilehio da nga moffunan i kapangngurug da ira.

Kunnaw gapa i nakagi ni Brother Vesa Väänänen, tadday nga miembro na Poland Branch Committee: “Talaga nattuyag i pangurug ku ta nasingakku mismu nga kontroladu ni Jehova i ngamin nga gannug. Niyawa ni Jehova ta eksakto nga tiempo nu anni talaga i kawagammi gukaban na pangigiya na Manangngal nga Baggi anna na minassakrifisio nga wawwaragi nga kakayà da i manguffun ta tanakuan.”

Megafu ta makka-uffu-uffun i wawwaragi tam tapenu meyawa i pakawagan na kataggi-tadday maski nu anni paga i situasiodda, matageno da i pagayayya nga nipromesa ni Jesus para tari ira ta mangiyawa.​—Kingngua 20:35.