Approbetchan na single mother nga si Sister Barbara Osmyk-Urban nga taga-Rzeszów, Poland i linigguan nga Family Worship da tapenu tudduan i ána na meyannung ta pamadulo anna pakisimpatia. Mafulu i edad ni Jakub anna walu gapa si Nina nga ána na. Niyaplika natun nga familia i nagigiammu da. Maturu tu 20 ngana nga wawwaragi i pinadulo da namegafu turi ta naggerra ta Ukraine ta Pebrero 24, 2022.

Turi ta nanaw i wawwaragi tam ira ta nasion na Ukraine nga zinara-daral na gerra tapenu umay ta mas safe ira nga lugar, sigga-paran nga pinadulo na Saksi ira ta babaleda ta Poland anna ta tanakuan ira nga nasion yatun ira nga refugee. Nav-volunteer gapa i karuan nu egga paga i tanakuan nga meyuffudda. Sangawe, mga 11,000 ngana nga Saksi ira nga naggafu ta Ukraine i minay ta Poland. Durante na gerra, ari puede nga manaw ta nasiodda i Ukrainian ira nga lallaki nga magedad tu 18 adde ta 60. Ngem nu tallu onu maturu paga i ána da nga menor-de-edad, puede ira nga manaw.

“Para ta nikami, familia mi ta espiritual danatun nga refugee nga naggafu ta Ukraine,” kagian ni Barbara. Iddukan gapa na ána na ira i wawwaragi nga naddian ta baleda. Okay laman para kani Jakub anna Nina nga ipekkaw i kuarto da ta wawwaragi. Maski nu makkaduma i lengguahe da, nakka-alippawa lagapa ira gukaban na pangngizzi, paggakko, anna pattangi. Turi ta nanaw ngana i refugee ira, nekawa si Jakub megafu ta awan ngana tu totolay ta baleda, yayya nga nikiddona ta yena na nu awayya da paga kari i mamadulo tu mas aru paga nga wawwaragi.

Nav-volunteer da Brother Łukasz Cholewiński anna Rafał Jankowski tapenu ibiahe i relief goods ira ta Ukraine. Inistoria danatun nga brother nga nakasingan ira tu aru nga makatatangi nga babbay anna abbarabbing nga maginnag tapenu makalampas ira ta border anna makaleg tu mas safe nga lugar. Kinagi ni Łukasz: “Talaga nerumu-ruma i wawwaragi tam megafu ta turi ta nasingammi ira, magayayya ira.”

Magadde ta appa nga oras i round trip nga biahe ta Ukraine. Oras tu zimittal ngana i relief goods ta Ukraine, i brother ira tari i mangitaneg tatun ira nga relief goods ta duma paga ira nga lugar ta nasion. Aru nga wawwaragi i mav-volunteer nga mabbiahe mappange ta Ukraine maski nu delikadu. “Talaga dakal nga pribilehio para ta nikami i manguffun,” kinagi ni Rafał.

Kunnaw i inistoria ni Sister Elżbieta Ustrzycka nga taga-Rzeszów nga natageno na turi ta inalawa na i Ukrainian ira nga Saksi ta balena: “Talaga na-touch ngà turi ta nasingakku i elder ira ta kongregasiommi nga nangiyangay tatun ira nga familia ta tangnga-na-gabi. Egga paga lagu i abbing ira nga agga-gabbeda nga katrug. Ari ku vuluvuga nga makattaman yatun.”

Tadday si Brother Bartłomiej Figura ta elder ira nga malallappo nga manguffun. Kavulu na i atawa na nga si Estera nga umay ta border onu ta istasion ira na tren tapenu sunduadda i wawwaragi anna iyangeda ira ta mas safe nga lugar. Egga ira i tiempo nga mawag tu ipeyusa da labbi i interu nga apartment da. Manguffun gapa ira ta material nu egga i pakawayya da.

“Makkakafamilia ittam ngamin ta espiritual,” kagian ni Bartłomiej. “Matageno mi nga close kami ta wawwaragi. Kada uffunammi i tanakuan, masingammi mismu nu kunnasi nga iyawa ni Jehova i espesipiko nga pakawagan na wawwaragi tam.”

Sangawe, ma-23,000 ngana nga karton na relief goods i neprepara na Polish ira nga wawwaragi tam. Egga i makan anna tanakuan paga ira nga essential nga gannug ta unag natun ira nga karton.

Makasiguradu ittam nga tulu-tuloy i pangiyawa ni Jehova ta pakawagan na Ukrainian ira nga wawwaragi tam gukaban na kinavuka-palag na kapangngurug tam ira.—Proverbio 11:24; Roma 12:13.