Ta Abril 20, 2022, mallima ragun ngana namegafu turi ta ari nga patas nga pangi-ban na Russia ta aktibidad ira na Saksi ira ni Jehova. a Namegafu tatun nga tiempo, mas nga naggrabe i pameppersigi na gobiernu na Russia ta kada dagun. Nu karuan paga lagu, i-torture da i wawwaragi tam. Ngem gitta na masingattam ta report ira ta jw.org, magutu lagapa anna magatta-attam i iddeddukattam nga wawwaragi.

Tadday tatun si Brother Dennis Christensen. Makakkasta i ehemplo nga ipasa-pasingan na maski nu mallima ragun ngana yayya nga agga-fuku. Turi ta Mayo 2019, naffu yayya ta apela na. Ngem kalmadu anna komfiansa yayya nga nakibbida ta ngamin nga wawwaragi nga minay ta korte tapenu suportan yayya. Kinagi na ta nira: “Kingnguà i adde na mawayyà tapenu passerbian si Jehova. Yatun i kuakku adde noka.”

Kunnatun gapa i determinasion ni Brother Igor Turik. Niyistoria na nga nammammu na si Brother Nikolay Kalibaba nga napeppersigi ta tiempo na Soviet. Nituddu ni Nikolay kani Igor nga megafu ta kapurueba ira, masingan na totolay ni Jehova nu kunnasi na ira nga uuffunan. Niyistoria ni Igor, “Manawag niakan nga tadday nga pribilehio nga mazziga-riga megafu ta pangurug ku.” Adde sangawe, magatta-attam lagapa si Igor maski maddaggun paga i pitu-ragun nga suspended prison sentence na.

Determinadu gapa nga mattalupaddian nga matalo si Brother Yevgeniy Fedin. Kunnaw i kagian na: “Ari tu yaw i tiempo nga makillaban tapenu mala ku i hustisia nga para niakan. Mawag tam nga mattalupaddian nga matalo. Kukua ni Jehova i hustisia. Kukukuattam i adde na mawayya tam tapenu bendisionan na ittam . . . Yatun ira i agga-nono ku tapenu fustu lagapa i pagimamma ku ta kapuruebà ira, maski nu anni paga i mesimmu. I kada kapurueba ay chansa tapenu dayawan si Jehova anna mattalupaddian nga matalo ta nisa.”

Kunnaw gapa i kagian ni Sister Tatyana Zhuk: “Nu nonopattam i nalampasattam ira ngana nga kapurueba, mas nga massikan i nono tam nga attamman paga yaw ira nga kapurueba ta maddaggun. Ebidensia yatun nga uuffunan ittam ni Jehova taw ira nga pappasa-pasattam ta maddaggun. Imposible nga mattalupaddian ittam nga magayayya nu awan i uffun na Yama tam ta langi.”

“Nangaffu ittam!” kagian ni Yevgeniy nga nakagi ganguri. “Maski nu ipay da ittam ta detention center, mangaffu ittam. Umay ittam ta korte, mangaffu ittam. Maski nu mefuku ittam, mangaffu ittam.”

Nige nga neyanunsio i pangi-ban turi ta 2017, kunnaw i nitura na historiador anna eksperto ta Saksi ira ni Jehova ta Soviet Union nga si Dr. Emily Baran: “Nu pabbaseyattam i history, imposible nga mapawan na Russia i Saksi ira ni Jehova.”

Manawag nga matuttuppal i profesiya ta Isaias 54:17 ta wawwaragi tam ta Russia anna ta Crimea: “Awan tu armas nga mapadday kontra [nira] i mavviktoria.”