Namegafu i gerra ta Ukraine turi ta Pebrero 24, 2022. Ngem rinivu nga Saksi ira ni Jehova i egga lagapa ta parte ira na Ukraine nga grabe i parralaban. Tadday nga grupo na 21 nga brother maggafu ta siudad ira na Ukraine nga Kremenchuk anna Poltava i mangipasa-pasingan tu kurug nga aya ta wawwaragi da. Sigga-paran ira nga umay ta lugar ira nga dian na paggegerra tapenu laman me-rescue da i kapangngurug da anna mangiyangay tu relief supply.

Ta unag laman na annam nga ligguan, mami-80 ngana nga nabbiahe mappange anna palubbe yatun ira nga brother. Ma-50,000 kilometro ngana i biniahe da ta lugar ira nga grabe i parralaban, kagitta na ta Kharkiv. Mga 400 ngana nga wawwaragi i na-rescue da.

Bali, 23 ngana nga tonelada na makan i neyangay da, kasali ngana i medisina, gasolina, anna karuan paga ira nga suplay. Nige nga mabbiahe yatun ira nga brother, planowadda tu mapia nu anni i pinaka-safe nga ruta da tapenu malillitadda i lugar ira nga maddaggun i parralaban. Awayya na nga magadde ta 19 nga oras i tadday nga biahe megafu ta magimmang paga i brother ira ta checkpoint ira nu sitaw me-check i naddian na takeda.

Ta pabbiahe da, egga ira i makkakagag tu eroplano ira nga panggerra. Matala-talebaran na brother ira i nassabug ira nga building anna nadara-daral ira nga tangki anna takay. Nu karuan paga lagu, matageno na brother ira i payyayyag na davvun nu massabug i bomba ira nga aranni laman ta nira.

Turi ta Abril 2, 2022, maddaggun nga mapprepara si Roman tu suplay ira nga iyangena para ta wawwaragi ta Kharkiv tapus gavva nga naguran tu bomba ta dalan. Nattagu labbi yayya ta building nga aranni ta dian na. Tapus nappasa i 30 nga minuto, nasingan na nga napasabug ngana i ruta nakuan nga dalanan na.

Megafu ta talaga delikadu i situasion, kunnaw i kinagi ni Volodymyr, tadday ta volunteer ira nga mad-drive: “Kanayukkami nga makkiddaw kani Jehova tu sirib tapenu makangngua kami tu fustu ira nga desision.”

Maddian ta Kharkiv i magatawa nga da Oleksandr anna Valentyna kavulu i manakam ngana nga magana ni Oleksandr. Turi ta maddaggun i gerra, masingi-singadda ta bentana i passabug ira nga ma-100 metro laman i karayyu na ta baleda. Gafu ta awan tu takay natun nga familia, ari ira nga makapanaw.

Ngem zimittal i brother ira nga mar-rescue. “Nakimallo kami kani Jehova. Nappabalo kami ta inuffunan nakami na brother ira,” kunni Oleksandr.

Piga aggaw nga nattatagu si Vasyl kavulu i atawa na nga si Natalia anna i tallu nga ána da ta basement na baleda. Turi ta Pebrero 29, 2022, habang mattatagu ira ta basement, egga i nassabug nga bomba aranni ta baleda. Zinaral natun nga passabug i baleda. Manono paga ni Vasyl nga naginna na i kallitang nga passabug tapus nasingan na nga naddo i ngamin nga light ta basement.

Turi ta mediu nagimmang ngana i parralaban, nagali i familia ta tanakuan nga basement ta building na karruba da. Turi ta Marso 3, 2022, nalegan na brother ira yatun nga familia, tapus niyali da ira ta mas safe nga lugar ta nasiodda.

Niyistoria ni Vasyl i natageno na turi ta ne-rescue ngana i familia na anna nakali ngana ira ta mas safe nga lugar: “Mappappabalo kami kani Jehova. Gitta na kitebbayag ngana yaw nga pappasa-pasammi. First time nga makakakkami tu memammo megafu ta ari mi ngana nga agga-nono nu mappeligro paga i ána mi.”

Kinagi na tadday ta driver ira nga si Oleksandr nga yaw nga rescue mission ira i mangipasingan nga egga i pattaradday na totolay ni Jehova. “Megafu taw, nanono ku nga tattangngallan ni Jehova i totolena,” kunna. “Masingakku laman i wawwaragi nga fermi i appabalo da, talaga magayayya ngà ngana.”

Dakal i appabalo tam ta magutu ira nga brother tam anna ipaka-pakimallo tam kani Jehova nga bendisionan na nakuan i passakrifisio da.​—Roma 12:10.