Turi ta Pebrero 24, 2022, inatake na Russia i Ukraine. Maturu tu 129,000 nga Saksi ira ni Jehova kavulu i ána da i maddian ta Ukraine. Nabbuu i branch office tu 27 nga Disaster Relief Committee (DRC) tapenu uffunan i wawwaragi tam ira. Ikakkaguman gapa na wawwaragi tam ira nga mangipasingan tu Cristiano nga aya. Manguffun ira ta praktikal anna banna-bannayadda i kataggi-tadday anna i kalugaradda ira taw nga mariga nga tiempo.

Maddian lagapa i aru nga wawwaragi tam ta Ukraine. Ngem dinesision na karuan nga manaw. Sobra i kapaddu na fila para tari ira ta maya nga manaw. Nagadde paga lagu i karuan nga fila ta 30 nga kilometro. Yari tu naginnag paga ira tu tallu adde ta appa nga aggaw nige da nga nakadde ta customs. Inaleg na wawwaragi ira i kapangngurug da nga egga ta fila tapenu mangiyawa tu kanan, danum, anna tanakuan paga ira nga praktikal nga uffun. Turi ta nakalampas ngana i wawwaragi tam ta border na nasion ira nga kabiko laman na Ukraine, zinafung ira na karuan paga ira nga Saksi nga agga-tammi tu karatula nga jw.org. Nakaprepara yatun ira nga wawwaragi tapenu mamanna-bannay anna mangiyawa tu praktikal ira nga uffun.

• Kaddaraddam nga turi ta Marso 1, 2022, 1 nga brother nga bangngag nga taga-Kharkiv i natay anna grabe i nikabigag na atawa na megafu ta pabbomba

• 3 paga nga sister i nabigaran anna natakitan

• Maturu tu 5,000 nga publisher i nanaw ta babaleda

• 2 nga balay i nadabba

• 3 nga balay i nadara-daral

• 35 nga balay i baddi laman i daral na

• 2 nga Kingdom Hall i nadaral

• Aru ta publisher ira i nawanan tu kuryente, heating system, danum, anna ari da nga meyusa i telefono da

• 27 nga DRC i nabuu ta Ukraine

• 867 nga publisher ira i inuffunan na DRC tapenu makaleg ira tu paddianadda ta mas safe ira nga lugar

• Ikaguman na DRC nga iyawa i mawag ira nga suplay, kagitta na makan anna danum

I bilang ira ta utun ay nebase pagalaman ta nappollu ira nga report.

Ipakimallo tam nga tulu-tuloy nakuan nga mapeggan tu sirib anna pakalippawa i wawwaragi tam tapenu maattammadda yaw nga mariga nga situasion anna tapenu mepasingadda i pakka-aya-aya na mawwaragi.—Proverbio 9:10; 1 Tesalonica 4:9.