Ta uffun ni Jehova, makapagattam lagapa da Sister Liudmyla Mozul anna Kateryna Rozdorska ta ziga-riga anna paddaddam megafu ta gerra. I gi-attawadda nga da Petro Mozul anna Dmytro Rozdorskyi i ollu ira nga Saksi ni Jehova nga napatay ta Ukraine. Kaddaraddam ta 34 ngana nga wawwaragi tam i natay megafu tatun nga gerra.

Nabaptize da Petro anna Liudmyla turi ta 1994 anna 43 dagun ngana ira nga kasal.

“Kadaggaw nga banna-bannayan nà na kapangngurug ku ira,” kagian ni Liudmyla. “Kanayuddà nga tawa-tawagan. Nakatangi ngà gapa turi ta egga i nalawa ku nga tura na branch ta Ukraine nga makipaddaddam ira ta nesimmu.”

Namegafu i gerra turi ta Pebrero 24, 2022. Si Petro ay 67 anios anna massesserbi bilang ministerial nga aripan ta sign language nga kongregasion. Turi ta Marso 1, 2022, megafu ta grabe i pabboromba ta Kharkiv, napatay si Petro durante nga mattattammang ira na familia na.

Piga aggaw ngana bi i pabboromba ta Kharkiv. Ngem tatun nga aggaw, mappakagag ngana ira tu fighter jet ira tapus atakeyadda i siudad. Ina na familia da yari ira i pinakakawagadda. Tapus awan paga tu 30 minuto ay nanaw ngana ira. Nattakay ta tadday nga takay da Petro anna Liudmyla. Tapus egga gapa ta tadday nga takay i ana da nga si Oleksii anna i atawa na nga si Maryna. “Turi ta mabbiahe kami ngana, gavva tu egga i fighter jet ira nga nangidanna tu bomba,” kagian ni Liudmyla. “Nagugguyag i takay mi megafu tari ira ta passabug na bomba.”

Kinabig ni Petro i manubela tapenu ari na nga madumpar i takay da Oleksii, ngem nadisgrasia lagapa ira. Nekaru si Petro anna si Liudmyla ta hospital, ngem natay gabbalaman si Petro. Nabigaran gapa si Liudmyla ta takki anna ta san na megafu tari ira ta metal na simmabug nga bomba. Awan tu nesimmu kada Oleksii anna Maryna. Nammuan laman ni Liudmyla nga natay ngana si Petro tallu aggaw kabalin na nga nallawan ta hospital.

Kagian ni Liudmyla: “Kada nononopakku i kinasippo ni Jehova anna i makakkasta nga gakkag na, mabbalin tu mas memammo i panageno ku. Siguradu ngà nga sonu bagu nga mundo, magga masingakku saw uli i atawà, anna excited ngà ngana tatun nga makapagayayya nga tiempo.”

Walu ragun ngana gapa nga kasal da Dmytro anna Kateryna. Egga bi ta trabahu si Dmytro turi ta tinawagan na si Kateryna, tapus i last ira nga kinagi na ta nisa ay, “Palabbe ngà ngana.”

Piga oras i nappasa, ta aggaw ngana na Marso 8, 2022, timmawag i katrabahu ni Dmytro kani Kateryna, tapus kinagi na nga nakebatay si Dmytro tu bomba, anna nekarela ta hospital. Natay si Dmytro lima oras kabalin na nga naopera.

Kunnaw i istorian ni Kateryna turi ta nakannammuan na nga natay si Dmytro: “Tatun nga gabi, ari laman tu sinammi ni Jehova i limà, ginabbay nà. Natageno ku nga araranni nio si Jehova.”

Si Dmytro nga 28 anios ay na-baptize turi ta 2006 anna nasserbi bilang elder ta Donetsk Region ta Ukraine.

Kabalin nga netanam si Dmytro, nabbiahe si Kateryna tu 12 oras tapenu magali ta mas safe nga lugar ta Ukraine. “Nakalawa ngà tu pamagaram maggafu ta wawwaragi ira ta interu Ukraine anna maski ta tanakuan nga nasion. Nipatageno da ta nio nga meddeddu ngà, yari tu nalappawan i panageno ku.”

Kinagi na paga: “Mabanna-bannayan ngà gapa kada mallayyagayya ngà. . . . Tapus nu grabe i matageno ku nga daddam, vuyatakku tu masikan i teksto ira na Biblia, kagitta na Filipos 4:6, 7.”

Makkomfiansa ittam nga magga tulu-tuloy nga iyawa ni Jehova i kawagan nga sikan anna banna-bannay para ta meddu nga wawwaragi tam nga natayan megafu ta gerra ta Ukraine.​—Salmo 61:1-3.