Tulu-tuloy lagapa nga makka-uffu-uffun i wawwaragi tam ta Ukraine. Ari lagapa ira nagimmang nga mangipasingan tu minassakrifisio nga aya para ta kataggi-tadday.

Si Sister Olena ay 81 anios. Tagga ta Hunio 6, egga i bomba nga nassabug aranni laman ta balena. Zinabba natun nga passabug i balay na karruba na anna narresulta yatun ta tadday nga avvu nga siete metro i karalam na. Kitassikan yatun nga passabug yatutta nadara-daral maski i balay ni Sister Olena.

Istorian na: “Makkakkatrug ngà bi tapus nadabba i pader ta biko ku anna maggi kinanna natun i ulù. Kitazzibbo i pallevu anna ginavu. Nakkewara gapa i bidru anna bata-batu. Mappabalo ngà kani Jehova ta matolay ngà paga.” Piga minuto laman kabalin natun nga passabug, inangngayan na wawwaragi si Sister Olena. Minay maski i tadday nga brother nga nadara-daral gapa i balena. Istorian paga ni Sister Olena: “Kustu zimittal ngana ira i wawwaragi, nakaddagan ira yatutta awan tu makagi da. Ngem napasikan i nono ku ta pinaggangay da. Mapia ngana laman ta kavulu ku ira.”

Kunnaw i istorian ni Serhii, tadday nga elder nga kanayun nga mabbisita kani Sister Olena kavulu i abbarabbing ta kongregasion: “Kustu nadumug ku i passabug aranni ta balay ni Sister Olena, nanassingan ngà anna mavurung ngà. Nalappawan laman i panageno ku kustu nasingakku tu egga laman ira i pasa-pasà na anna ari yayya nga grabe nga nabigaran. Fuguran nu tu i ollu nga gamit nga nikiddaw ni Sister Olena kustu nadaral i balena ay i literatura na Biblia nga nalawa na piga aggaw nige natun nga passabug.”

Mapia ngana laman ta nakaleg i paparientes ni Sister Olena tu bagu nga paddianan na. Tulu-tuloy gapa yayya nga uffunan na wawwaragi ta kongregasion anna kadaggaw yayya nga tawagan na elder ira. Nigatangan gapa na wawwaragi tu hearing aid si Sister Olena tapenu mabbenefisio yayya ta study ira. Istorian na: “Nu mittan, makkakafi ngà ngem massikan i nono ku megafu ta study ira. Kanayuddà nga tawagan na kapangngurug ku ira. Kuruga ipappabalo ku yatun.”

Istorian na tadday nga magatawa i ekspiriensa da kustu nattagu ira ta basement na Kingdom Hall kavulu i 200 paga nga wawwaragi. Nitura na babay: “I talaga pinabbilivakku ay i panangngal nari ira na meddu nga elder. Nanono ku ta nira si David nga maggi nepatayan na i makillaban ta leon anna ta oso tapenu laman ipaliag i karneru. Pinappeligro na elder ira ta basement i inango da tapenu laman makala tu makan anna danum kunne na gapa i gasolina tapenu egga i light mi. Dakal nga uffun yatun. Megafu gare tatun, nakapa-study kami anna nakapammiting para ta pallayyagayya. Maski kustu maddaggun i grabe nga pabbomba, kanayun nga bisitan danatun nga elder i wawwaragi nga nabattang ta gibbalayadda tapenu iyangayan ira tu makan anna danum anna tapenu banna-bannayan ira. Dakal i respetò tatun ira nga elder. Nige gare na gerra, ammù mabba tu manuddu ira anna mallayyagayya. Ngem sangawe, naekspiriensà mismu tu pastor gapa balo ira nga mapattalakkattam. Dakal i appabalo ku ta ehemplo da ta pabbalin tu magutu, minangngikavurung, anna mapaddependeyan!”

Egga ira i wawwaragi ta tadday nga kongregasion ta Ukraine nga nattura ta branch office tari meyannung ta brother ira nga mangirollu ta pangiyawa tu relief: “Kuruga mappappabalo kami ta nira. Ma-touch kami ta panangngal ni Jehova ta nikami gukaban na kapangngurug mi ira. Napakurug mi mismu i kinagi ni Jesus: ‘Nu egga nikamu i pakka-aya-aya, kannammuan ngamin na totolay tu disipulo takamu.’”—Juan 13:35.

Base ta report turi ta Hunio 21, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 42 nga publisher i natay

• 83 nga publisher i nabigaran anna natakitan

• 31,185 nga publisher i nagali ta tanakuan nga lugar

• 495 nga babalay i nadabba

• 557 nga babalay i nadara-daral

• 1,429 nga babalay i baddi laman i daral na

• 5 nga Kingdom Hall i nadabba

• 8 nga Kingdom Hall i nadara-daral

• 34 nga Kingdom Hall i baddi laman i daral na

• 27 nga Disaster Relief Committee (DRC) i mangasikasu ta wawwaragi tam ta Ukraine

• 52,348 nga publisher i inuffunan na DRC ira tapenu makaleg tu mas safe nga paddianan

• 23,433 nga publisher i nagali ta tanakuan nga nasion anna uuffunan ira na kapangngurug da