Ta interu Ukraine, magayayya i wawwaragi megafu ta makapallayyagayya ngana uli ira ta publiko anna aru i makasta nga ekspiriensa da. Nireport na circuit overseer ira anna na elder ira tari nga aru nga totolay i magayayya nga makasingan uli ta cart tam ira. Aru paga lagu i nakkomento nga mami-miss da ngana nga masingan ta lugar da i Saksi ira ni Jehova.

Si Tatiana ay taga-Serhiivka Congregation ta Odesa Region. Nanono na nga bisitan danuri nakibbida na nige na pandemic. Istorian na, “Namegafu ta ollu nga pallawammi, nasingakku i pamendision ni Jehova ta pangikagumammi nga mallayyagayya uli ta publiko.” Mittan, binisita na i tadday nga babay nga manaki na nga mappa-Bible study nige na pandemic. Sangaw, kakayà ngana na babay i makibbida meyannung ta Biblia anna insigida nga minanugu yayya nga mappa-Bible study. Kunnaw i makagi ni Tatiana, “Mawag tu toliakku i ngamin nga dati nga return visit ku anna mangiyofer ngà tu Bible study ta kada tadday ta nira!”

Da Yevheniy anna Lilia ay dati bi nga taga-Mariupol. Pinanawadda i baleda anna maddian ngana ira sangawe ta mas safe nga lugar ta Ukraine. Parefu nga regular ira nga mallayyagayya. Istoriadda nga nakoffun ta nira i ministerio tapenu ari da nga agga-nono i problema da ira. Kudda: “Ammu mi nga ari ngana nga manoli ta dati i pattolemi. Kitazziga i mamegafu mana uli, ngem nononopammi tu ari nga ababba i lima ni Jehova. Igigiya nakami na espiritu na, anna sigga-paran i wawwaragi nga uffunakkami ta paddiammi ta bagu nga lugar.”

Ta tanakuan gapa nga parte na Ukraine, makeyawa tu pamakurug i mapia ira nga annangngua na wawwaragi tam. Angngarigan na, egga i wawwaragi ta siudad na Mykolaiv nga inuffunadda i tadday nga internasional nga organisasion. Pinakappiadda i bodega nga pagipayyan tu relief goods. Inayus danatun nga wawwaragi i koneksion na suplay na danum, niprepara da gapa i istante ira, anna binilli-billeda i napakaru nga tonelada na relief goods. Nguri ta ininspeksion na tadday nga representative natun nga organisasion i kingngua na wawwaragi, nakalua yayya. Kinagi na, “Ari ku inekspekta nga kunnaw i pabbalinan na.”

Maski nu kitarriga i situasion na kapangngurug tam ira ta Ukraine, magayayya lagapa ira megafu ta aktibo ira ta ministerio anna ta ‘pangngua ta mapia.’—Galacia 6:9.

Base ta report turi ta Hulio 13, 2022, masingan ta gukag i paddia-paddian na wawwaragi ta Ukraine. Nebase laman i tumunug ira nga bilang ta kumfirmadu nga report maggafu ta wawwaragi tari. Megafu ta mariga nga kontakan i wawwaragi ta nadduruma nga parte na nasion, awayya na tu mas aru paga i aktual nga bilang.

• 42 nga publisher i natay

• 97 nga publisher i nabigaran anna natakitan

• 28,683 nga publisher i nagali ta tanakuan nga lugar

• 524 nga babalay i nadabba

• 588 nga babalay i nadara-daral

• 1,554 nga babalay i baddi laman i daral na

• 5 nga Kingdom Hall i nadabba

• 10 nga Kingdom Hall i nadara-daral

• 36 nga Kingdom Hall i baddi laman i daral na

• 27 nga Disaster Relief Committee (DRC) i mangasikasu ta wawwaragi tam ta Ukraine

• 52,947 nga publisher i inuffunan na DRC ira tapenu makaleg tu mas safe nga paddianan

• 23,863 nga publisher i nagali ta tanakuan nga nasion anna uuffunan ira na kapangngurug da